માર્ચ 2026 પહેલા દેશમાંથી ડાબેરી ઉગ્રવાદને સંપૂર્ણપણે નાબૂદ: છ્તીસ ગઢમાં અમિત શાહ
![Completely eliminate left-wing extremism from the country before March 2026: Amit Shah in Chhattisgarh](https://bombaysamachar.com/wp-content/uploads/2024/08/amit-shah-lwe-780x470.webp)
કેન્દ્રીય ગૃહ મંત્રી અને સહકારિતા મંત્રી અમિત શાહની અધ્યક્ષતામાં આજે છત્તીસગઢનાં રાયપુરમાં ડાબેરી ઉગ્રવાદ (ડાબેરી ઉગ્રવાદ) પર સમીક્ષા બેઠક તથા છત્તીસગઢ અને પડોશી રાજ્યોનાં મુખ્ય સચિવો અને પોલીસ મહાનિદેશકો સાથે આંતર-રાજ્ય સંકલન બેઠક યોજાઈ હતી. છત્તીસગઢના મુખ્યમંત્રી વિષ્ણુદેવ સાઈ, નાયબ મુખ્યમંત્રી વિજય શર્મા, કેન્દ્રીય ગૃહ રાજ્યમંત્રી શ્રી નિત્યાનંદ રાય, કેન્દ્રીય ગૃહ સચિવ ગોવિંદ મોહન, ઇન્ટેલિજન્સ બ્યુરો (આઈબી) અને રાષ્ટ્રીય તપાસ એજન્સી (એનઆઈએ)ના નિદેશકો, સીઆરપીએફ, બીએસએફ, એસએસબી અને આઈટીબીપીના મહાનિદેશકોએ આ બેઠકમાં ભાગ લીધો હતો. આંધ્ર પ્રદેશ, ઝારખંડ, મધ્ય પ્રદેશ, મહારાષ્ટ્ર, ઓડિશા અને તેલંગાણાના મુખ્ય સચિવો અને પોલીસ મહાનિર્દેશકો પણ આ બેઠકમાં સામેલ થયા હતા.
બેઠક દરમિયાન ડાબેરી ઉગ્રવાદને પહોંચી વળવા, આંતર-રાજ્ય સંકલન, સુરક્ષા દળોની ક્ષમતાનું નિર્માણ, ડાબેરી ઉગ્રવાદના કેસોની ઝડપી તપાસ અને કાર્યવાહી તથા ડાબેરી ઉગ્રવાદથી અસરગ્રસ્ત વિસ્તારોના વિસ્તૃત વિકાસ માટે વ્યૂહરચના પર ચર્ચા થઈ હતી.
![Completely eliminate left-wing extremism from the country before March 2026: Amit Shah in Chhattisgarh](https://bombaysamachar.com/wp-content/uploads/2024/08/amit-shah-bjp.webp)
બેઠકને સંબોધતા અમિત શાહે જણાવ્યું હતું કે, પ્રધાનમંત્રી નરેન્દ્ર મોદીનાં નેતૃત્વમાં ડાબેરી ઉગ્રવાદ સામેનું અભિયાન હવે નિર્ણાયક તબક્કે છે અને અમે માર્ચ, 2026 અગાઉ દેશમાંથી નક્સલવાદને સંપૂર્ણપણે નાબૂદ કરવા કટિબદ્ધ છીએ. તેમણે કહ્યું કે, નક્સલવાદ વિરુદ્ધ કાર્યવાહીની શરૂઆતમાં જે ગતિ અને તીવ્રતા હતી તેનાથી બમણી ગતિ અને તીવ્રતા સાથે હવે આપણે કામ કરવાની જરૂર છે, તો જ આ સમસ્યા આપણા દેશમાંથી સંપૂર્ણપણે નાબૂદ થઈ શકે છે.
કેન્દ્રીય ગૃહમંત્રી અને સહકારિતા મંત્રીએવધુમાં ઉમેર્યું કે, મોદી સરકાર વિકાસ, કાર્યવાહી અને કામગીરીના ત્રણેય મોરચે વ્યૂહરચના સાથે ડાબેરી ઉગ્રવાદ સામે સફળ લડાઇ લડી રહી છે, જેના પરિણામે હવે આ સમસ્યા ઘણી હદ સુધી ઓછી થઇ ગઇ છે. તેમણે કહ્યું કે હવે આ સમસ્યા છત્તીસગઢના કેટલાક ખિસ્સા સુધી મર્યાદિત છે. શ્રી શાહે જણાવ્યું હતું કે, છત્તીસગઢ સરકારે છેલ્લાં 7 મહિનામાં વધારે સારી કામગીરી કરી છે. તેમણે કહ્યું કે, આ 7 મહિનામાં સૌથી વધુ નક્સલીઓને નિષ્ક્રિય કરવામાં આવ્યા છે, વધુમાં વધુ નક્સલીઓએ આત્મસમર્પણ કર્યું છે અને તેમને પકડવામાં આવ્યા છે. ગૃહમંત્રીએ છત્તીસગઢ સરકારને અભિનંદન આપતાં કહ્યું હતું કે, નવી સરકારની રચના પછી ડાબેરી ઉગ્રવાદ સામેનું અભિયાન ખૂબ જ સારી રીતે આગળ વધી રહ્યું છે.
શ્રી શાહે જણાવ્યું હતું કે, ડાબેરી ઉગ્રવાદ સામેની ઝુંબેશને વધારે વેગ આપવા તમામ પોલીસ મહાનિદેશકોએ દર અઠવાડિયે તેમનાં રાજ્યોમાં નક્સલ અભિયાનો સાથે સંકળાયેલી ટીમ સાથે બેઠકો યોજીને એક કાર્યયોજના તૈયાર કરવી જોઈએ. તેમણે કહ્યું કે આ સાથે જ મુખ્ય સચિવોએ દર પખવાડિયે નક્સલ પ્રભાવિત વિસ્તારો સાથે જોડાયેલા વિકાસ કાર્યોની સમીક્ષા બેઠક યોજવી જોઇએ. તેમણે કહ્યું કે જ્યાં સુધી નક્સલી અભિયાનો પર સતત નજર નહીં રાખવામાં આવે ત્યાં સુધી અમે ઇચ્છિત પરિણામ પ્રાપ્ત કરી શકીશું નહીં.