Supreme Court નો મોટો ચુકાદો, મુસ્લિમ મહિલાઓ પણ પતિ પાસેથી ભરણપોષણ મેળવવા હકદાર

નવી દિલ્હી : સુપ્રીમ કોર્ટે(Supreme Court) મુસ્લિમ મહિલાઓને લઈને મોટો ચુકાદો આપ્યો છે કોર્ટે એક મહત્વપૂર્ણ નિર્ણયમાં ફરી સ્પષ્ટ કર્યું છે કે સીઆરપીસીની કલમ 125 હેઠળ મુસ્લિમ મહિલા તેના પતિ પાસેથી ભરણપોષણની માંગ કરી શકે છે. એક મુસ્લિમ વ્યક્તિએ તેની પત્નીને ભરણપોષણ આપવાના તેલંગાણા હાઈકોર્ટના આદેશને સુપ્રીમ કોર્ટમાં પડકાર્યો હતો. બુધવારે આ અરજી પર સુનાવણી કરતા કોર્ટે ભરણપોષણને લઈને મહત્વનો નિર્ણય સંભળાવ્યો છે. મોહમ્મદ અબ્દુલ સમદ નામના વ્યક્તિએ સુપ્રીમ કોર્ટમાં અરજી કરી હતી.

10,000 રુપિયાનું ભરણપોષણ ચૂકવવાનો નિર્દેશ

જસ્ટિસ બીવી નાગરથના અને ઓગસ્ટિન જ્યોર્જ મસીહની સુપ્રીમ કોર્ટની બેન્ચે સીઆરપીસીની કલમ 125 હેઠળ છૂટાછેડા લીધેલી પત્નીને ભરણપોષણ ચૂકવવાના નિર્દેશ સામે મોહમ્મદ અબ્દુલ સમદ દ્વારા દાખલ કરવામાં આવેલી અરજીને ફગાવી દીધી હતી. કોર્ટે જણાવ્યું હતું કે ‘મુસ્લિમ મહિલા અધિનિયમ 1986’ બિનસાંપ્રદાયિક કાયદા પર હાવી થઈ શકે નહીં. જસ્ટિસ નાગરથ્ના અને જસ્ટિસ મસીહે અલગ-અલગ, પરંતુ સર્વસંમત ચુકાદો આપ્યો. હાઈકોર્ટે મોહમ્મદ સમદને 10,000 રુપિયાનું ભરણપોષણ ચૂકવવાનો નિર્દેશ આપ્યો હતો.

કલમ 125 તમામ મહિલાઓને લાગુ પડે

ચુકાદો આપતાં જસ્ટિસ નાગરથનાએ કહ્યું, “અમે એ નિષ્કર્ષ સાથે ફોજદારી અપીલને ફગાવી રહ્યા છીએ કે સીઆરપીસીની કલમ 125 તમામ મહિલાઓને લાગુ પડે છે અને માત્ર પરિણીત મહિલાઓને જ નહીં.”
કોર્ટે પોતાના નિર્ણયમાં એમ પણ કહ્યું કે જો સીઆરપીસીની કલમ 125 હેઠળ અરજીની પેન્ડન્સી દરમિયાન સંબંધિત મુસ્લિમ મહિલાના છૂટાછેડા થઈ જાય છે, તો તે ‘મુસ્લિમ વિમેન (પ્રોટેક્શન ઓફ રાઈટ્સ ઓન ડિવોર્સ) એક્ટ 2019’ની મદદ લઈ શકે છે. કોર્ટે કહ્યું કે ‘મુસ્લિમ એક્ટ 2019’ સીઆરપીસીની કલમ 125 હેઠળના ઉપાય સિવાયના ઉપાયો પૂરા પાડે છે.

સીઆરપીસી ની કલમ 125 શું છે?

શાહબાનો કેસમાં ચુકાદો આપતી વખતે સુપ્રીમ કોર્ટે કહ્યું હતું કે સીઆરપીસીની કલમ 125 એક ધર્મનિરપેક્ષ જોગવાઈ છે, જે મુસ્લિમ મહિલાઓને પણ લાગુ પડે છે. જો કે, તેને ‘મુસ્લિમ વિમેન (પ્રોટેક્શન ઓફ રાઈટ્સ ઓન ડિવોર્સ) એક્ટ, 1986’ દ્વારા રદ કરવામાં આવ્યો હતો. આ પછી, 2001 માં કાયદાની માન્યતા જાળવી રાખવામાં આવી હતી. સીઆરપીસીની કલમ 125માં પત્ની, બાળકો અને માતા-પિતાના ભરણપોષણની જોગવાઈ છે.

સીઆરપીસીની કલમ 125 જણાવે છે કે જો કોઈ વ્યક્તિ તેની પત્ની, બાળક અથવા માતા-પિતાને જાળવી રાખવાનો ઇનકાર કરે છે. તે આમ કરવા સક્ષમ હોય તો આવી સ્થિતિમાં કોર્ટ તેમને ભરણપોષણ આપવાનો આદેશ આપી શકે છે.