Delhi માં પાણી વિના ટળવળતા લોકો, નેતાઓ રાજકારણમાં વ્યસ્ત હોવાનો આક્ષેપ

નવી દિલ્હી : દેશમાં સતત વધી રહેલી ગરમી વચ્ચે દિલ્હીમાં(Delhi)તાપમાન તમામ રેકોર્ડ તોડી રહ્યું છે. તેવા સમયે દિલ્હીવાસીઓ પાણીની તીવ્ર અછત(Water Crisis) અનુભવી રહ્યા છે. જો કે આ બધા વચ્ચે રાજનેતાઓ પાણીના મુદ્દે રાજકારણમાં વ્યસ્ત છે. એક તરફ લોકો પાણી પીવા ટળવળી રહ્યા છે ત્યારે ભાજપ કાર્યકરો આમ આદમી પાર્ટી વિરુદ્ધ દેખાવો કરી રહ્યા છે. ત્યારે દિલ્હીના સીએમ અરવિંદ કેજરીવાલ ભાજપ શાસિત હરિયાણાને પાણીની કટોકટી માટે જવાબદાર માને છે. જ્યારે લોકો નેતાઓ રાજકારણ વ્યસ્ત હોવાનો આક્ષેપ લગાવી રહ્યા છે.

સાથે મળીને આ સમસ્યાનો સામનો કરવો પડશે : કેજરીવાલ

હાલમાં દિલ્હીમાં તાપમાનનો પારો 45 ડિગ્રીની ઉપર યથાવત છે. ઉનાળાની ઋતુમાં પાણીની વધતી માંગ વચ્ચે દિલ્હી પાણીની ગંભીર કટોકટીનો સામનો કરી રહ્યું છે. ત્યારે મુખ્યમંત્રી કેજરીવાલે કહ્યું કે આપણે બધાએ સાથે મળીને આ સમસ્યાનો સામનો કરવો પડશે. તેમણે ભાજપના નેતાઓને હરિયાણા અને યુપી સરકાર સાથે વાત કરીને પાણી મેળવવાની પણ અપીલ કરી હતી.

દિલ્હીમાં વીજળીની સ્થિતિ નિયંત્રણમાં

કેજરીવાલે ટ્વિટર પર પોતાની પોસ્ટમાં કહ્યું કે આ વખતે આખો દેશ અભૂતપૂર્વ ગરમીનો અનુભવ કરી રહ્યો છે જેના કારણે દેશભરમાં પાણી અને વીજળીની કટોકટી છે. ગયા વર્ષે દિલ્હીમાં વીજળીની સૌથી વધુ માંગ 7438 મેગાવોટ હતી. તેની સરખામણીમાં આ વર્ષે પીક ડિમાન્ડ 8302 મેગાવોટ પર પહોંચી ગઈ છે. પરંતુ તેમ છતાં દિલ્હીમાં વીજળીની સ્થિતિ નિયંત્રણમાં છે, અન્ય રાજ્યોની જેમ વીજળી કાપ નથી.

માંગ ઘણી વધી અને પુરવઠો ઘટ્યો

તેમણે કહ્યું કે આટલી કાળઝાળ ગરમીમાં પાણીની માંગ ઘણી વધી ગઈ છે. અને પડોશી રાજ્યોમાંથી દિલ્હીને જે પાણી મળતું હતું તેમાં પણ ઘટાડો થયો છે. એટલે કે માંગ ઘણી વધી અને પુરવઠો ઘટ્યો. આપણે સૌએ સાથે મળીને આનો ઉકેલ લાવવો પડશે.

દિલ્હીના લોકોને રાહત આપીએ

દિલ્હીના સીએમએ કહ્યું કે હું જોઈ રહ્યો છું કે ભાજપના મિત્રો અમારી વિરુદ્ધ વિરોધ કરી રહ્યા છે. આનાથી સમસ્યા ઉકેલાશે નહીં. હું બધાને હાથ જોડીને વિનંતી કરું છું કે આ સમયે રાજનીતિ કરવાને બદલે ચાલો આપણે સાથે મળીને દિલ્હીના લોકોને રાહત આપીએ.

એક મહિના માટે દિલ્હીને થોડું પાણી પહોંચાડે

જો ભાજપ હરિયાણા અને યુપીની તેની સરકારો સાથે વાત કરે અને એક મહિના માટે દિલ્હીને થોડું પાણી પહોંચાડે તો દિલ્હીના લોકો ભાજપના આ પગલાની ખૂબ પ્રશંસા કરશે. આટલી તીવ્ર ગરમી કોઈના કાબૂની બહાર છે. પરંતુ જો આપણે બધા સાથે મળીને કામ કરીએ તો શું આપણે લોકોને રાહત આપી શકીએ?

રાજકીય પક્ષો મત માંગવા આવે છે પાણી આપતા નથી

ચાણક્યપુરીના એક અસરગ્રસ્ત વિસ્તારના રહેવાસી દીપક શ્રીવાસ્તવે સમાચાર એજન્સીને જણાવ્યું હતું કે અમને પાણીની જરૂર છે, નહીં તો અમે મરી જઈશું. અગાઉ છથી સાત પાણીના ટેન્કર આવતા હતા, પરંતુ હવે માત્ર એક જ છે જે સંકટને વધારે છે.

માત્ર ટેન્કરો જ જોયા છે

તે જ વિસ્તારના અન્ય એક રહેવાસી જાનકીએ રાજકીય પક્ષો પર આરોપ લગાવ્યો કે તેઓ માત્ર રાજનીતિમાં વ્યસ્ત છે અને સામાન્ય લોકો વિશે વિચારતા નથી.રાજકીય પક્ષો અહીં મત માંગવા આવે છે, પરંતુ અમને કોઈ પાણી આપતું નથી. હું છેલ્લા 30 વર્ષથી અહીં રહું છું અને માત્ર ટેન્કરો જ જોયા છે. અમને આવનારી સરકાર પાસેથી નળના પાણીની જેમ થોડો વિકાસ જોઈએ છે.