અમેરિકા (USA)નો બાંગલાદેશ સામે ઐતિહાસિક સિરીઝ-વિજય, હવે ભારતે વર્લ્ડ કપમાં ચેતવું પડશે
પ્રેઇરી વ્યૂ (હ્યુસ્ટન): ક્રિકેટમાં નવીસવી ગણાતી અમેરિકાની ટીમે જાણીતા ખેલાડીઓનો સમાવેશ ધરાવતી બાંગલાદેશની ટીમને ગુરુવારે ટી-20 સિરીઝ (T20 Series)ની બીજી મૅચમાં પણ હરાવીને ત્રણ મૅચની શ્રેણીમાં 2-0થી ઐતિહાસિક વિજયી-સરસાઈ મેળવી લીધી હતી. મૂળ આણંદનો મોનાંક પટેલ (42 રન, 38 બૉલ, એક સિક્સર, ચાર ફોર) અને મૂળ પાકિસ્તાનનો પેસ બોલર અલી ખાન (પચીસ રનમાં ત્રણ વિકેટ) આ જીતના બે હીરો હતા.
અમેરિકાએ બૅટિંગ મળ્યા બાદ છ વિકેટે 144 રન બનાવ્યા હતા જેમાં કૅપ્ટન મોનાંક ઉપરાંત આરૉન જોન્સ (35 રન) અને સ્ટીવન ટેલર (31 રન)ના પણ યોગદાન હતા. મુસ્તફિઝૂર રહમાન સહિત ત્રણ બોલરે બે-બે વિકેટ લીધી હતી.
બાંગલાદેશની ટીમ 19.3 ઓવરમાં 138મા રને ઑલઆઉટ થતાં અમેરિકાનો છ રનથી વિજય થયો હતો. 138 રનમાં કૅપ્ટન શૅન્ટોના 36 રન અને શાકીબ-અલ-હસનના 30 રન હતા. મોનાંક પટેલ વિકેટકીપર છે અને તેણે છેલ્લી ઓવરમાં રિશાદ હુસેન (9)નો કૅચ પકડીને અમેરિકાને વિજય અપાવ્યો હતો. ભારતીય મૂળના સૌરભ નેત્રાવલકરે બે તેમ જ જસદીપ સિંહે એક વિકેટ લીધી હતી.
વર્લ્ડ કપમાં ભારતવાળા ગ્રૂપ ‘એ’માં અમેરિકા તેમ જ પાકિસ્તાન, આયરલૅન્ડ અને કૅનેડાની ટીમ સામેલ છે. અમેરિકાની જીત સાથે હવે આ ગ્રૂપની દરેક ટીમે વર્લ્ડ કપમાં એનાથી ચેતવું પડશે.
