તો શું સલમાન ખાન બિગ બોસ ઓટીટી 3 હોસ્ટ નહીં કરે?

દેશનો લોકપ્રિય રિયાલિટી શો ‘બિગ બોસ’ ઘણી ભાષાઓમાં આવે છે. વિવાદાસ્પદ શો બિગ બોસ’ નું OTT વર્ઝન પણ દર્શકોમાં ઘણું લોકપ્રિય છે. હવે બિગ બોસ OTT-3 ને લઈને દરેક લોકોમાં ઉત્તેજના છે. દર્શકો તેની શરૂઆતની આતુરતાથી રાહ જોઈ રહ્યા છે. આ શોને લઈને એક ચોંકાવનારા સમાચાર સામે આવી રહ્યા છે.

અહેવાલ મુજબ, સલમાન ખાન તારીખોની સમસ્યાનો સામનો કરી રહ્યો છે અને તેથી નિર્માતાઓએ આ શોને હોસ્ટ કરવા માટે અન્ય કેટલાક બોલિવૂડ સુપરસ્ટાર્સનો સંપર્ક કર્યો છે. સલમાન શોને હોસ્ટ કરે એવી ફેન્સની માગણી છે, પરંતુ તેમના વ્યસ્ત શેડ્યૂલને કારણે તેમણે શો છોડવો પડ્યો છે. દરમિયાન શોને હોસ્ટ કરવા માટે સંજય દત્ત, અનિલ કપૂર અને કરણ જોહરનો સંપર્ક કરવામાં આવ્યો છે.

અગાઉ એવા સમાચાર આવ્યા હતા કે આ વર્ષે બિગ બોસ OTT-3 નહીં આવે, પણ પછી એમ જાણવા મળ્યું કે જૂન મહિનાના પહેલા અઠવાડિયામાં આ શો આવશે. ત્યાર પછી લોકોને જાણવા મળ્યું કે આ શો જોવા માટે Jioનું સબસ્ક્રિપ્શન લેવું પડશે. હવે એમ જાણવા મળ્યું છે કે લોકોના લાડિલા ભાઇજાન આ શો હોસ્ટ નહીં કરે.

બિગ બોસ OTT-1 દિવ્યા અગ્રવાલે જીતી હતી જ્યારે નિશાંત ભટ્ટ પ્રથમ રનર અપ હતો. બિગ બોસ OTT-2 યુટ્યુબર એલ્વિશ યાદવ જીત્યો જ્યારે અભિષેક મલ્હાન ફર્સ્ટ રનર અપ રહ્યો. જો મીડિયા રિપોર્ટ્સનું માનીએ તો દિલ્હી વડાપાવ ગર્લ ચંદ્રિકા દીક્ષિત શોની ત્રીજી સિઝનમાં ભાગ લઈ શકે છે.

બિગ બોસ OTT 3 માટેના સ્પર્ધકોની યાદી હજુ સુધી નિર્માતાઓ દ્વારા જાહેર કરવામાં આવી નથી. જો કે, કેટલાક નામો સામે આવ્યા છે, જેમાં પ્રતિક્ષા હોનમુખે, દલજીત કૌર, શહજાદા ધામી, રોહિત ખત્રી, અરહાન બહલ, શીજાન ખાન, મેક્સટર્ન, ઠુગેશ, શ્રીરામ ચંદ્ર, આર્યનશી શર્મા, સાંકી ઉપાધ્યાય, તુષાર સિલાવત વગેરેનો સમાવેશ થાય છે. આ શોનું પ્રીમિયર 4-5 જૂને થશે અને તે Jio સિનેમા પર જોઈ શકાશે.