દક્ષિણ ચીની સમુદ્રમાં ભારતે ત્રણ યુદ્ધ જહાજ તહેનાત કર્યા
નવી દિલ્હીઃ ચીનની દરેક હિલચાલ પર નજર રાખવા ભારતે દક્ષિણ ચીની સમુદ્રમાં ત્રણ યુદ્ધ જહાજ તૈનાત કર્યા હોવાની માહિતી જાણવા મળી છે. ભારતીય નૌકાદળના પ્રવક્તાએ સોશિયલ મીડિયા પ્લેટફોર્મ એક્સ પર જણાવ્યું હતું કે રિયર એડમિરલ રાજેશ ધનખડની આગેવાની હેઠળ દિલ્હી, શક્તિ અને કિલતાન જહાજો સિંગાપોર પહોંચ્યા હતા.
દક્ષિણ ચીની સાગરમાં ચીન દ્વારા તેની સૈન્ય આક્રમકતા દર્શાવવામાં આવી રહી છે ત્યારે ભારતીય નૌસેનાએ કહ્યું કે સિંગાપોરમાં આ ત્રણ જહાજોનું આગમન દક્ષિણ ચીની સાગરમાં ભારતીય નૌકાદળના પૂર્વીય કાફલાની ઓપરેશનલ તૈનાતીનો એક ભાગ છે.
હાલમાં ચીનનું નૌકાદળ દક્ષિણ ચીની સાગરમાં યુએસ સમર્થિત ફિલિપાઈન્સની નેવી સાથે સંઘર્ષમાં છે. ફિલિપાઈન્સે દક્ષિણ ચીન સાગરમાં ‘સેકન્ડ થોમસ શોલ’નો દાવો કર્યો છે, જેનો ચીને સખત વિરોધ કર્યો છે.
ચીન દક્ષિણ ચીન સાગરના મોટા ભાગનો દાવો કરે છે. ફિલિપાઈન્સ, મલેશિયા, બ્રુનેઈ અને તાઈવાન પણ તેના પર દાવો કરે છે. સિંગાપોરના નૌકાદળના કર્મચારીઓ અને સિંગાપોરમાં ભારતના હાઈ કમિશનર દ્વારા ભારતીય જહાજોનું ઉષ્માભર્યું સ્વાગત કરવામાં આવ્યું હતું.
સંરક્ષણ મંત્રાલયે એક નિવેદનમાં જણાવ્યું હતું કે આ ભારતીય જહાજોની આ મુલાકાત ઘણા કાર્યક્રમો અને પ્રવૃત્તિઓ દ્વારા બંને દેશો વચ્ચે લાંબા ગાળાની મિત્રતા અને સહયોગને વધુ મજબૂત બનાવશે.
નિવેદન અનુસાર બંદરમાં આ જહાજોના રોકાણ દરમિયાન, ભારતીય હાઈ કમિશન સાથેની વાતચીત, સિંગાપોર નૌકાદળ સાથે વ્યાવસાયિક સંવાદ તેમજ શૈક્ષણિક અને સમુદાયની ક્રિયાપ્રતિક્રિયા સહિત અન્ય પ્રવૃત્તિઓ હાથ ધરવાનું આયોજન છે જે બંને નૌકાદળના વહેંચાયેલ મૂલ્યોને પ્રતિબિંબિત કરે છે.
તેમાં કહેવામાં આવ્યું છે કે, ભારતીય નૌકાદળ અને સિંગાપોરનાં નૌકાદળ વચ્ચે ત્રણ દાયકાથી વધુ સમયના સહયોગ, સંકલન અને મુલાકાતોના નિયમિત આદાનપ્રદાન અને પરસ્પર તાલીમ વ્યવસ્થાના મજબૂત સંબંધો છે. વર્તમાન જમાવટ બંને નૌકાદળ વચ્ચેના મજબૂત સંબંધોને પ્રતિબિંબિત કરે છે.
