‘અમૃત કાળ’માં બનાવીશું જનતાના સ્વપ્નનું ગુજરાત

વાદ પ્રતિવાદ

પ્રાસંગિક -ભૂપેન્દ્ર પટેલ

ભારત તેની સ્વતંત્રતાના અમૃત મહોત્સવની ઉજવણી કરી રહ્યું છે. આ અવસર આપણા સ્વાતંત્ર્ય સેનાનીઓ અને ક્રાંતિકારીઓના સંઘર્ષને યાદ કરવાનો છે, જેમણે સેંકડો વર્ષોથી ગુલામીની જંજીરોમાં જકડાયેલી ભારત માતાને આઝાદ કરાવવા માટે પોતાના જીવનનું બલિદાન આપ્યું હતું. દેશ માટે પોતાના પ્રાણ ન્યોછાવર કરનારા મહાન નાયકો અને નામી-અનામી શૂરવીરોના યોગદાનને ઉજાગર કરવા માટે વડા પ્રધાનશ્રી નરેન્દ્ર મોદીએ આઝાદીની ૭૫મી વર્ષગાંઠને ‘આઝાદી કા અમૃત મહોત્સવ’ તરીકે ઉજવવાનું આહ્વાન કર્યું હતું. તેની શરૂઆત ૧૨ માર્ચ, ૨૦૨૧ ના દિવસે અમદાવાદના સાબરમતી આશ્રમથી થઈ હતી.
ગુજરાત આઝાદીના આ ‘અમૃત મહોત્સવ’ને પૂરા ઉમંગ અને ઉત્સાહ સાથે ઉજવી રહ્યું છે. દેશના સ્વાતંત્ર્ય સંગ્રામમાં ગુજરાતના યોગદાનનો સુવર્ણ ઇતિહાસ રહેલો છે. મહાત્મા ગાંધી અને સરદાર પટેલ સહિત ગુજરાતના અનેક સપૂતોએ સ્વાતંત્ર્ય સંગ્રામમાં અમૂલ્ય યોગદાન આપ્યું હતું. સાબરમતી આશ્રમ એ દિવસોમાં સ્વાતંત્ર્ય ચળવળનું કેન્દ્રબિંદુ હતું. દેશભરમાંથી નેતાઓ, ચિંતકો, સમાજસેવકો અને કાર્યકરોનો મેળાવડો અહીં થતો. મહાત્મા ગાંધીના માર્ગદર્શન હેઠળ દેશને અંગ્રેજોની ચુંગાલમાંથી મુક્ત કરાવવા માટે વ્યૂહરચના અને કાર્યક્રમો બનાવવામાં આવ્યા હતા. સાબરમતી આશ્રમથી શરૂ થયેલી દાંડી યાત્રાએ બ્રિટિશ સામ્રાજ્યના પાયા હચમચાવી દીધા હતા.
લોખંડી પુરુષ વલ્લભભાઈ પટેલે અંગ્રેજો સામેની લડતમાં બારડોલી સત્યાગ્રહનું સફળ નેતૃત્વ કર્યું હતું. આ સફળ આંદોલન પછી તેમને ‘સરદાર’નું બિરુદ આપવામાં આવ્યું. સરદાર પટેલે ૫૬૨ રજવાડાઓનું ભારત સંઘમાં વિલીનીકરણ કરી અખંડ ભારતના નિર્માણનું ઐતિહાસિક કાર્ય કર્યું હતું. શ્રી નરેન્દ્ર મોદીએ ભારતમાતાના આ સપૂતની દુનિયામાં સૌથી ઊંચી પ્રતિમા ‘સ્ટેચ્યૂ ઑફ યુનિટી’ ના નિર્માણના માધ્યમથી તેમણે યથોચિત શ્રદ્ધાંજલિ અર્પી છે.
આ ઉપરાંત શ્યામજી કૃષ્ણ વર્મા, મેડમ ભીખાજી કામા અને સરદારસિંહ રાણા જેવા અનેક ગુજરાતીઓએ દેશની આઝાદી માટે યોગદાન આપ્યું હતું.
દેશની આઝાદીની ચળવળમાં ગુજરાતના આદિવાસી સમાજે મહત્ત્વની ભૂમિકા ભજવી હતી. ઇતિહાસમાં આદિવાસી સમાજના યોગદાન સાથે જોડાયેલી કેટલીક ઘટનાઓ અને નાયકોની ઉપેક્ષા કરવામાં આવી હતી. ગોવિંદ ગુરુના નેતૃત્વ હેઠળ, ગુજરાતના માનગઢમાં અંગ્રેજો સામે આઝાદીની લડાઈમાં લગભગ ૧૫૦૦ આદિવાસીઓ શહીદ થયા હતા. સાબરકાંઠા જિલ્લાના પાલ દઢવાવમાં પણ અંગ્રેજોએ ૧૨૦૦થી વધુ નિર્દોષ આદિવાસી સ્વાતંત્ર્ય સેનાનીઓને ગોળીઓથી વિંધ્યા હતા. તેને ગુજરાતનો ‘જલિયાંવાલા કાંડ’ પણ કહેવામાં આવે છે. શ્રી નરેન્દ્ર મોદીના મુખ્યમંત્રી કાળ દરમિયાન આદિવાસીઓની શહાદતને ઉજાગર કરવા માટે અહીં શહીદ સ્મારક બનાવવામાં આવ્યું છે.
૧ મે, ૧૯૬૦ના રોજ ગુજરાત રાજ્યની સ્થાપના થઈ ત્યારે અનેક પડકારો હતા. મુંબઈ જેવા સમૃદ્ધ રાજ્યમાંથી અલગ થયા બાદ ગુજરાતે મક્કમ મનોબળ અને દ્રઢતા સાથે રાજ્ય તરીકેની સફર શરૂ કરી. તે સમયે જ્યારે કૃષિ એ દેશના અર્થતંત્રની કરોડરજ્જુ હતી, ત્યારે ગુજરાત પાણીની તીવ્ર અછત અને અપૂરતા વરસાદને કારણે કૃષિક્ષેત્રે કટોકટીનો સામનો કરી રહ્યું હતું. પરંતુ સ્વાભિમાની અને ઉત્સાહ તેમજ જુસ્સાથી ભરેલા ગુજરાતીઓએ ગુજરાતને કૃષિસહિત તમામ ક્ષેત્રોમાં અગ્રેસર બનાવવા અથાગ પ્રયાસો કર્યા.
જ્યારે શ્રી નરેન્દ્ર મોદીએ રાજ્યના મુખ્યમંત્રી તરીકેનો કાર્યભાર સંભાળ્યો ત્યારથી ગુજરાતની વિકાસગાથામાં એક નવો અને સુવર્ણ અધ્યાયનો પ્રારંભ થયો હતો. તેમણે ગુજરાતને વિનાશક ભૂકંપના આંચકામાંથી બેઠું કરીને વિકાસના પંથે આગળ ધપાવ્યું. તેમણે વહીવટી શિથિલતાના વાતાવરણને સ્ફુર્તિવાન બનાવી લોકોમાં ઉત્સાહનો સંચાર કર્યો. એક નેતા તરીકે શ્રી નરેન્દ્ર મોદીએ તેમની નીતિ-રીતિ અને કાર્યોથી નેતૃત્વની નવી વ્યાખ્યા ઘડી.
રાજ્યના વિકાસને લગતી તેમની સ્પષ્ટ અને અસરકારક નીતિઓના પરિણામે જ ગુજરાત સમગ્ર દેશમાં જ નહિ પરંતુ વિશ્ર્વભરમાં ‘વિકાસ મૉડલ’ તરીકે પ્રસ્થાપિત થયું છે. ગુજરાત દેશના વિકાસના ‘ગ્રોથ એન્જિન’ તરીકે જાણીતું બન્યું છે.
છેલ્લા બે દાયકાથી ગુજરાતની વિકાસયાત્રા લોકો માટે સંશોધનનો વિષય બની છે. ગુજરાતમાં કૃષિક્ષેત્રે શ્રી નરેન્દ્ર મોદીના નેતૃત્વમાં નવી હરિયાળી ક્રાંતિ આવી છે. કૃષિ મહોત્સવની શરૂઆત કરી તેમણે એપ્રિલ અને મે મહિનાના ધગધગતા તાપમાં પણ ગામડે-ગામડે જઈને ખેડૂતોને નવી ટેકનોલોજી અને સાધનોની ભેટ આપી. પરિણામે, વર્ષ ૨૦૦૨માં ૨૩.૪૮ લાખ મેટ્રિક ટન અનાજની સરખામણીએ આજે ૮૩.૨૫ લાખ મેટ્રિક ટનનું ઉત્પાદન કરીને ગુજરાત કૃષિક્ષેત્રે ક્રાંતિનો નવો અધ્યાય લખી રહ્યું છે. સરદાર સરોવર ડેમ અને ૬૯૦૦૦ કિલોમીટર લાંબા નહેર નેટવર્કની સાથે લાખો ચેકડેમોના નિર્માણથી ગુજરાતના ખેડૂતો માટે સિંચાઈની સુવિધા વધુ મજબૂત બની છે. પશુ આરોગ્ય મેળાનું આયોજન કરી અને પ્રાણીઓની સાર-સંભાળ માટે ઝુંબેશ ચલાવવામાં આવી પરિણામે ગુજરાતનું દૂધ ઉત્પાદન વર્ષ ૨૦૦૨માં ૬૦ લાખ મેટ્રિક ટન હતું તે વધીને આજે ૧૫૮ લાખ મેટ્રિક ટન થયું છે.
શિક્ષણ ક્ષેત્રની વાત કરીએ તો, ગુજરાતમાં ક્ધયા શિક્ષણ અને શાળા છોડવાનો દર મુખ્ય ચિંતાનો વિષય હતો. આ માટે શ્રી નરેન્દ્ર મોદીએ ‘ક્ધયા કેળવણી’ અને ‘શાળા પ્રવેશોત્સવ’ જેવા અભિયાન પ્રારંભ કર્યાં અને આજે આ બંને ક્ષેત્રે રાજ્યની પરિસ્થિતિમાં નોંધપાત્ર સુધાર આવ્યો છે. ટેકનોલોજી દ્વારા શિક્ષણનું સ્તર સુધારવા માટે ગુજરાતે ‘વિદ્યા સમીક્ષા કેન્દ્ર’ની સ્થાપના કરી જેની દેશ અને દુનિયામાં પ્રશંસા થઈ રહી છે. ૨૦ વર્ષ પહેલા ગુજરાતમાં યુનિવર્સિટીઓની સંખ્યા ૨૧ હતી, આજે તે વધીને ૧૦૨ થઈ ગઈ છે. તેવી જ રીતે એન્જિનિયરિંગ અને મેડિકલ સીટોમાં પણ નોંધપાત્ર વધારો થયો છે.
ઔદ્યોગિક રાજ્ય તરીકેની પોતાની છબી અનુરૂપ ગુજરાત દેશના વિકાસમાં અગ્રેસર બન્યું છે. શ્રી નરેન્દ્ર મોદીએ વાઈબ્રન્ટ ગુજરાત સમિટનું આયોજન કરીને ગુજરાતમાં રોકાણ અને ઉદ્યોગોને આકર્ષ્યા છે. રાજ્યનું ઔદ્યોગિક ઉત્પાદન ૨૦ વર્ષ પહેલા રૂ. ૧.૨૭ લાખ કરોડથી વધીને આજે રૂ. ૧૬.૧૯ લાખ કરોડ થયું છે. ખજખઊ ઉદ્યોગોની સંખ્યા પણ આજે ૨.૭૪ લાખ વધીને ૮.૬૬ લાખ થઈ છે. વિદેશી મૂડીરોકાણ (ઋઉઈં) મેળવવામાં ગુજરાત દેશમાં પ્રથમ ક્રમે છે. ગુજરાતનું ‘ગિફ્ટ સિટી’ આર્થિક પ્રવૃત્તિના વૈશ્ર્વિક હબ તરીકે પોતાની ઓળખ બનાવી રહ્યું છે.
ગુજરાતમાં આરોગ્ય ક્ષેત્રે પણ નોંધપાત્ર પ્રગતિ થઈ છે. રાજ્યમાં ગરીબ અને મધ્યમ વર્ગના લોકોની સારવાર માટે ‘મા અને મા અમૃતમ’ જેવી યોજનાઓ અમલમાં છે. ૨૦ વર્ષ પહેલાની સરખામણીમાં ડૉકટરો અને નર્સોની સંખ્યામાં ત્રણ ગણો વધારો થયો છે. હૉસ્પિટલમાં પ્રસૂતિ દર ૯૯.૫% છે. બાળ મૃત્યુદરમાં પણ ૫૫ ટકાનો નોંધપાત્ર ઘટાડો થયો છે. ગુજરાત સલામત અને શાંતિપૂર્ણ રાજ્ય છે. ગુજરાત શાંતિ અને સલામતીના પાયા પર વિકાસના પંથે આગળ વધી રહ્યું છે. રમખાણો હવે ભૂતકાળ બની ગયા છે. રાજ્યની પોલીસ બોડી-વોર્ન કેમેરા, ઈન્ટરસેપ્ટર વાન અને સ્પીડ ગનથી સજ્જ છે. ગુજરાતે જાહેર સુરક્ષા માટે મહત્ત્વપૂર્ણ ‘સાયબર આશ્ર્વસ્ત’ અને ‘વિશ્ર્વાસ પ્રોજેક્ટ’ શરૂ કરીને દેશને નવી રાહ ચીંધી છે. ગુજરાતે દેશની પ્રથમ ફોરેન્સિક યુનિવર્સિટીની પણ સ્થાપના કરી છે.
રોજગાર અને સ્ટાર્ટઅપની બાબતમાં ગુજરાતે દેશભરમાં શાનદાર પ્રદર્શન કર્યું છે. ગુજરાતે યુવાશક્તિને પ્રોત્સાહિત કરવા સ્ટાર્ટઅપ પૉલિસી જાહેર કરી છે, જે અંતર્ગત તેમને આકર્ષક પ્રોત્સાહનો આપવામાં આવે છે. ગુજરાત સતત ત્રણ વર્ષથી સ્ટાર્ટઅપ રેન્કિંગમાં દેશમાં ટોચ પર છે.
ઊર્જા ક્ષેત્ર પ્રગતિ, વિકાસ અને સમૃદ્ધિનું પ્રતીક છે. ઊર્જા ક્ષેત્રે ગુજરાતે હરણફાળ ભરી છે. રાજ્યમાં ૨૦ વર્ષ પહેલાં ૮,૭૫૦ મેગાવોટની સરખામણીએ આજે ૪૦,૧૩૮ મેગાવોટ ઉર્જાનું ઉત્પાદન થઈ રહ્યું છે. રિન્યુએબલ એનર્જીનું ઉત્પાદન ૨૦ વર્ષ પહેલા માત્ર ૯૯ મેગાવોટ થતુ હતુ જે વધીને આજે ૧૬,૫૮૮ મેગાવોટ થયું છે. ૩ લાખ સ્થળોએ સોલાર રૂફટોપ લગાવીને ૧,૧૭૧ મેગાવોટ વીજળી ઉત્પન્ન કરવામાં આવી રહી છે. રાજ્યમાં ૪૦,૦૦૦ કિલોમીટરથી વધુ ગેસ પાઈપલાઈન નેટવર્ક છે.
ગુજરાતમાં વંચિત, શોષિત અને પછાત વર્ગના કલ્યાણ માટે વિશેષ યોજનાઓ અમલમાં મૂકવામાં આવી છે. યોજનાનો લાભ છેવાડાના માનવી સુધી પહોંચે તે સુનિશ્ર્ચિત કરવામાં આવ્યું છે. ’સેવા સેતુ’ કાર્યક્રમ દ્વારા ઘરઆંગણે વિવિધ સેવાઓ ઉપલબ્ધ કરાવવામાં આવી છે. ‘ઉજ્જવલા યોજના’ હેઠળ લગભગ ૩૫ લાખ ગેસ કનેક્શન આપવામાં આવ્યા છે, પ્રધાનમંત્રી આવાસ યોજના (શહેરી અને ગ્રામીણ) હેઠળ અનુક્રમે ૬.૨૪ લાખ અને ૩.૨૧ લાખ મકાનો બનાવવામાં આવ્યા છે. ૪૩ લાખથી વધુ ઘરોમાં વ્યક્તિગત શૌચાલયની સુવિધા પૂરી પાડવામાં આવી છે.
‘આઝાદી કા અમૃત મહોત્સવ’ના ઉપલક્ષ્યમાં પ્રધાનમંત્રીશ્રી નરેન્દ્ર મોદીના આહ્વાન પર જળ સંરક્ષણના માધ્યમથી રાજ્યની જળ સુરક્ષા સુનિશ્ર્ચિત કરવા માટે ગુજરાતના દરેક જિલ્લામાં ૭૫ અમૃત સરોવરોનું નિર્માણ કાર્ય પૂરજોશમાં ચાલી રહ્યું છે.
આઝાદીની ૭૫મી વર્ષગાંઠને યાદગાર બનાવવા અને લોકોમાં રાષ્ટ્રભાવ જગાવવાના ઉદ્દેશ્ય સાથે પ્રધાનમંત્રીના ‘હર ઘર તિરંગા’ અભિયાનને ગુજરાતની પ્રજાનું અદ્ભુત સમર્થન મળી રહ્યું છે. સંપૂર્ણ ગુજરાત દેશભક્તિની ભાવના સાથે તિરંગામય બની ગયું છે.
આઝાદીના આ ‘અમૃત કાળ’માં ગુજરાત વિકાસના નવા આયામો સર કરવા સંકલ્પબદ્ધ છે. રાજ્ય સરકાર વિવિધ યોજનાઓ દ્વારા સમાજના દરેક વર્ગના કલ્યાણ અને સમૃદ્ધિ માટે પ્રયત્નશીલ છે. અમે ગુજરાતની સાડા છ કરોડની જનતાના સપનાના ગુજરાતનું નિર્માણ કરવા પ્રતિબદ્ધ છીએ.

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.