ગ્રહ સંકેત -વિનોદ રાવલ
આ સપ્તાહમાં સૂર્ય અને ગુરુનું ક્રાંતિસામ્ય થાય છે. સાથે બુધ અને શુક્રનું ક્રાંતિસામ્ય થાય છે. ગુરુ અને શનિ સ્વગૃહી છે. આ ગ્રહયોગો બજારને કઈ દિશા આપશે તે જોઈએ…
શૅરબજાર: શૅરબજારમાં સપ્તાહની શરૂઆત નરમાઈથી થઈને મજબૂતાઈ તરફ જઈ શકે છે. પણ બજારમાં વેચીને વેપાર કરવો લાભદાયી થઈ શકે છે. આ સપ્તાહના ગ્રહયોગો બતાવે છે કે સપ્તાહના મધ્યમાં બજારમાં ઝડપી અને મોટી વેચવાલી આવી શકે છે. ચાલુ બજારે વેચવાલી આવતા ઈન્ડેક્ષમાં નરમાઈ જોવા મળે. સપ્તાહના મધ્યથી અંત સુધીમાં એકાદ દિવસ નફારૂપી લેવાલી આવી શકે છે. પણ તેજીનો વેપાર કરવો નહીં. માટે નફો બુક કરતાં રહેવો.
એકંદરે આ સપ્તાહમાં બે તરફી બજાર જોવા મળે પણ વધઘટે બજારની ચાલ નરમાઈ તરફી જોવા મળે. આ સપ્તાહમાં ખુલતાં ઈન્ડેક્ષ કરતાં સપ્તાહના અંતિમ દિવસોનો ઈન્ડેક્ષ સારો નરમ જોવા મળે. આ સપ્તાહમાં સ્ટીલ, બૅંક, ફાઈનાન્સ, ઓટો, રિલાયન્સ, ફાઈનાન્સ સેક્ટરમાં વધઘટ જોવા મળી શકે.
સોના-ચાંદી: સોના અને ચાંદીમાં મજબૂતાઈથી સપ્તાહની શરૂઆત જોવા મળી શકે છે. સોના અને ચાંદી વાયદા અને હાજરમાં આ સપ્તાહના શરૂઆતના દિવસથી જ બજારમાં વેચીને વેપાર ગોઠવવાથી લાભ મળી શકે છે ખાસ ચાંદીમાં વેચીને વેપાર કરવો લાભદાયી રહે. એકાદ દિવસ મોટી અને ઝડપી વેચવાલી આવતાં ભાવમાં સારી નરમાઈ જોવા મળે. સપ્તાહના શરૂઆતના દિવસોમાં અને મધ્યના દિવસોમાં બજારમાં વેચવાલી આવી શકે છે. સપ્તાહની મધ્યમાં નફારૂપી લેવાલી આવતા ભાવમાં સામાન્ય મજબૂતાઈ જોવા મળે. નફો બુક કરતા જવો. બજારમાં નરમ ધ્યાન રાખીને વેપાર કરવો. પણ વધઘટ બન્ને સાઈડ આવી શકે છે માટે નફો બુક કરતાં જવો. આ સપ્તાહમાં દરેક ઊંચા ભાવે વેચીને વેપાર કરવો લાભદાયી થઈ શકે છે.
ક્રુડ ઓઈલ: આ સપ્તાહમાં ક્રુડ ઓઈલમાં મજબૂત ભાવ જોવા મળે. ક્રુડ ઓઈલમાં શરૂઆતના દિવસથી સ્ટોક કરીને તેજીનો વેપાર ગોઠવવો. સપ્તાહની મધ્યના દિવસમાં બજાર બે તરફી ચાલ બતાવી શકે છે. આ સપ્તાહમાં શરૂઆતના દિવસોથી મજબૂત ધ્યાન રાખીને વેપાર કરવો. સપ્તાહના અંતિમ દિવસો સુધી તેજીનો વેપાર રાખી શકાય. સપ્તાહના અંતિમ દિવસોમાં ક્રુડ ઓઈલમાં મજબૂત ભાવ રહી શકે છે.
કોમોડિટી: આ સપ્તાહમાં કોમોડિટી બજારમાં મજબૂત ભાવ જોવા મળી શકે છે. સિંગતેલ, કપાસિયાં તેલ, તેલીબિયાં અને દિવેલમાં સપ્તાહની શરૂઆત મજબૂત ભાવથી થાય. સપ્તાહની શરૂઆતના દિવસથી જ તેજી ધ્યાન રાખીને વેપાર ગોઠવતા જવો. આ સપ્તાહમાં તેલ તેલીબિયાં, કપાસિયાં, એરંડા, દિવેલ, તેલમાં તેજી ધ્યાન રાખીને વેપાર દરેક ભાવે કરવો. સપ્તાહના મધ્યના દિવસો સુધી સ્ટોક કરતાં જવું લાભદાયી રહે. આ દિવસોમાં એકાદ દિવસ બજારમાં સામાન્ય નરમાઈ અથવા સાંકડી વધઘટ જોવા મળે. પણ મંદીનો વેપાર કરવો નહીં. કપાસિયાં, એરંડા અને દિવેલ, તેલમાં હાજર અને વાયદામાં મજબૂતાઈ જોવા મળે.
