મુંબઈ: આંતરરાષ્ટ્રીય બજારમાં આજે બ્રેન્ટ ક્રૂડતેલના વાયદામાં ભાવ ઘટી આવતાં સ્થાનિક ફોરેક્સ માર્કેટમાં ડૉલર સામે રૂપિયામાં સાધારણ બે પૈસાનો સુધારો આવ્યો હતો. જોકે, ડૉલર ઈન્ડેક્સમાં મજબૂતાઈ, સ્થાનિક ઈક્વિટી માર્કેટમાં નરમાઈ અને ગઈકાલે વિદેશી સંસ્થાકીય રોકાણકારોની ઈક્વિટીમાં વેચવાલી જળવાઈ રહેતાં રૂપિયામાં સુધારો મર્યાદિત રહ્યો હોવાનું સૂત્રોએ જણાવ્યું હતું.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના ૮૧.૬૩ના બંધ સામે સાધારણ સુધારા સાથે ૮૧.૬૨ના મથાળે ખૂલ્યા બાદ સત્ર દરમિયાન નીચામાં ૮૧.૭૬ અને ઉપરમાં ૮૧.૪૯ની રેન્જમાં અથડાઈને અંતે ગઈકાલના બંધથી બે પૈસાના સુધારા સાથે ૮૧.૬૧ની સપાટીએ બંધ રહ્યો હતો. દરમિયાન આજે વિશ્ર્વ બજારમાં ડૉલર ઈન્ડેક્સ ગઈકાલના બંધથી ૦.૧૫ ટકા વધીને ૧૦૨.૦૮ આસપાસ ક્વૉટ થઈ રહ્યો હતો.
આ સિવાય સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે ૭૭૩.૬૯ પૉઈન્ટનો અને ૨૨૬.૩૫ પૉઈન્ટનો કડાકો બોલાઈ જવા ઉપરાંત ગઈકાલે સ્થાનિક ઈક્વિટી માર્કેટમાં વિદેશી સંસ્થાકીય રોકાણકારોની રૂ. ૭૬૦.૫૧ કરોડની ચોખ્ખી વેચવાલી રહેતાં રૂપિયો દબાણ હેઠળ રહ્યો હતો. જોકે, આજે બ્રેન્ટ ક્રૂડતેલના વાયદામાં ભાવ ગઈકાલના બંધથી ૦.૩૪ ટકા ઘટીને ૮૫.૮૪ ડૉલર પ્રતિ બેરલ ક્વૉટ થઈ રહ્યા હોવાથી રૂપિયામાં સાધારણ સુધારાને ટેકો મળ્યો હોવાનું સૂત્રોએ જણાવ્યું હતું.