નરસિંહ મહેતા, ‘ઘાટ ઘડયા પછી નામરૂપ જુજવા અંતે તો હેમનું હેમ હોય’ કહી ગયા છે. સાહેબ બળ્યું પૂળો મેલોને નામમાં !!
ઊડતી વાત -ભરત વૈષ્ણવ
બખડજંતર ચેનલ તરફથી હું એટલે ગિરધર ગરબડિયા-મુખ્ય-ગૌણ જે કંઇ કહો તે રિપોર્ટર અને કેમેરામેન રાજુ રદી એક નગરપાલિકાની બેઠકનું કવરેજ કરવા સ્પોટ પર પહોંચ્યા.
બેઠકમાં ભાગ લેનાર પરિમલ ગાર્ડનમાં ટહેલતા હોય તેમ આવી રહ્યા છે. તેમના મુખકમળ ગુટકા,પડીકીને ન્યાય આપી રહ્યા છે. જો કે, બેઠકના હોલની દીવાલો પર તમાકુ ચાવવી અપરાધ છે, તેના માટે ફલાણા કાયદાની ઢીંકણી કલમ મુજબ દંડ થઇ શકે છે. ઝભ્ભા-લેંઘા- કોટીમાં સજજ સભ્યશ્રીઓ થિયેટરના કલાકોરો સમાન ભાસતા હતા.!!
બેઠક શરૂ થવામાં વાર હતી. બે-ત્રણ સભ્યોએ શાક માર્કેટમાં રીંગણા સો ના કિલો એવી બૂમ મારતા બકાલીની જેમ ગરમી બહુ છે, એસી મિનિમમ ટેમ્પરેચર પર સેટ કરવા સેવકોને આદેશ આપતા હતા. ત્રણ-તાર ભૂખાળવા( આમ તો દરેક ખાવા માટે તલપાપડ હોય!! હાઇ કમાન્ડ ભલે ખુદ ખાય નહીં અને ખાવા દેવાની મનાઇ ફરમાવે) સભ્યોએ પ્રલંબ બગાસાંની શૃંખલા વચ્ચે ચપટી વગાડીને નાસ્તો ન આપો તો કાંઇ નહીં પણ હાઇકલાસ ચા તો પીવડાવો એવો પેયાત્મક આદેશ કરતા હતા. થોડાક બેઠકના સભ્યો સમય અંગે કચકચ
કરતા હતા. કેટલાક એજન્ડા શું છે તેની પૃચ્છા કરતા હતા. ટુંકમાં બેઠક પહેલાંનો પ્રમાદાત્મક માહોલ .સેક્રેટરી જેવો દેખાતો બુડથલ
બાબુ માઇક ટેસ્ટિંગ હેલાવ હેલાવ કરતો
હતો.
પ્રમુખ સાહેબ પધાર્યા. બધા મને કમને ઊભા થઇ આદર આપવાનો ડોળ કર્યો.જાતજાતની જય બોલાઇ. કમિશનર શાંતિ જાળવવા વિનંતી કરી અને બેઠક શરૂ કરવા અનુમતિ માંગી. પ્રમુખે ડોકું હકારમાં ધૂણાવી સંમતિ આપી.
કમિશનરે પ્રારંભિક ઉદબોધન કરવા પ્રમુખને વિનંતી કરી.
પ્રમુખે ભાઇઓ.,,. કહી બોલવાનું શરૂ કર્યું.
સાહેબ અમારી હાજરીની નોંધ લેજો પ્રમુખની માનીતી છમકછલ્લોએ કામુક અંદાજમાં કોમેન્ટ કરી.
તમારી તો દિવસ કરતા રાતે પણ નોંધ લઇએ છીએ.લાળ ટપકાવતા પ્રમુખ મહોદય વદ્યા!!
સાહેબ, બેઠકનો આ એજન્ડા નથી. બેઠક પછી રસિક થજો. પ્રમુખ વિરોધી દળના અસંતુષ્ટ પ્રમુખની ફિરકી લીધી.નગરપાલિકાએ બનાવેલ બ્રિજના નામકરણ માટે ખાસ બેઠક બોલાવેલી.
બેઠકના પ્રારંભમાં વિવાદનો મધપૂડો છેડી શાસકપક્ષના અને હાલના પ્રમુખને દબડાવી પ્રમુખ થવાના દિવાસ્વપ્નો જોતાં સભ્યે સિકસર ફટકારતા કહ્યું, પપ્પુ પુલ નામ રાખીએ.
સામેવાળા ઊભા થઇ ગયા . કાગળો ફાડ્યા,ઉછાળ્યા. કૂવો ન હોવા છતાં વેલ તરીકે ઓળખાતી જગ્યાએ ધસી આવ્યા. માઇકો તોડ્યા, ખુરશીની ગાદીઓ ફંગોળી. પ્રમુખે માંડમાંડ મામલો રફેદફે કર્યો.
આપણે પુલનું નામ જ ન રાખીએ તો? એસ્ટેટ શાખાના અધિકારીએ ચાંપલાશ કરી.
સાહેબ તમારે પાંત્રીસ-ચાલીસ વરસ નોકરો કરી પેન્શન ખાવાનું છે. અમારે પાંચ વરસે પબ્લિક પાસે જઇ મત માગવાના છે, તમારે મત મેળવવા જવાનું નથી!! સ્ટેન્ડિંગ કમિટીના ચેરમેને અકળામણ વ્યક્ત કરી.
બ્રિજનું નામ મહાનુભાવના નામ પરથી રાખીએ વરસો લગી સત્તાની લોલીપોપ તિસમારખાં પરિવારવાદી પક્ષના સભ્યે સૂચન કર્યું.
ભાઇ તમારે ત્યાં આવાં નામોની લંગાર છે. અમારે ખાટલે ખોડ છે. ગણીને સાડા ત્રણ નામમાં યાદી પૂરી થઇ જાય છે.!!!
પરમ આદરણીય દાઉદ ઇબ્રાહીમનું નામ પુલ સાથે જોડો. કોઇ માઇનો લાલ પુલ સામે આંખ ઊંચી કરશે નહીં. અલબત, નબળી ગુણવત્તા હોય અને પુલ તૂટી જાય તો વાત અલગ છે. ધ.ધૂ. પ.પુ. દાઉદ, તેલગુ, હાજી મસ્તાને દેશને વરસો લગી ચૂનો -ડિસ્ટેમ્પર લગાવવાની અદ્ભુત કામગીરી નિસ્વાર્થભાવે કરી છે બકરા દાઢીવાળા સભ્યશ્રીએ દરખાસ્ત એટલે મમરો મૂકયો.
ભાઇ અમારા છોટા રાજન, બડા રાજન, અરૂણ ગવળી મરી નથી ગયા કે ચૂડીઓ નથી પહેરી . પંડિતનુમા સભ્યે વાંધો ઉઠાવ્યો!!!
પ્રમુખ સાહેબ નદી અને પર્વતોના નામ સર્કિટહાઉસના ઓરડાને આપી ચુકયા છીએ. હવે ડ્ઢ ુ ુ બ્રિજ નામ આપીએ તે એબ્સર્ડ લાગશે તેમ કમિશનરે કહ્યું.
આ ચર્ચા સાંભળીને કળી ખીલું ખીલું થઇને પુષ્પમાં પરિવર્તિત થવાની કોશિશ કરતી હોય તેમ રાજુ રદી બોલવા ઊંચોનીચો થતો હતો, તલપાપડ થતો હતો.
પ્રમુખ સાહેબ આપની મંજૂરીની અપેક્ષાએ મારે સૂચન કરવું છે. સાહેબ બ્રિટિશ સાહિત્યકાર શેકસપિયર વ્હોટ ઇઝ ઇન ધી નેઇમ એવું કહી ગયા છે. નરસિંહ મહેતા પણ ઘાટ ઘડયા પછી નામરૂપ જુજવા અંતે તો હેમનું હેમ હોય’ કહી ગયા છે. સાહેબ બળ્યું પૂળો મેલોને
નામમાં !!સાહેબ કંકોડા બ્રિજ નામાભિધાન
કરી દો એટલે ભોડાકૂટ પતે!!રાજુ રદીએ અભિનવ હકારાત્મક નૂતન દરખાસ્ત
મુકી !!
રાજુ રદીની દરખાસ્ત પર કોઇ વાંધાવિરોધ વિના સર્વાનુમતે સંમત થઇ ગયા!!
