ઈન્વેસ્ટમેન્ટના બોધપાઠ મળી શકે છે ગણપતિ બાપ્પાના જીવનમાંથી

ઉત્સવ

સ્પેશિયલ – જયેશ ચિતલિયા
શેરબજાર એક દિવસ તૂટે છે, બીજે દિવસે ઉછળે છે, રોકાણકારો મુંઝાય છે. કયારે લેવાલી કરવી, કયારે વેચવાલી? ક્ધફયુઝન વધતું રહે છે. આવા સંજોગો વારંવાર ઊભા થતા રહે છે ત્યારે ગણપતિ બાપ્પાને યાદ કરવામાં સાર છે, કેમ કે ગણપતિ બાપ્પાની જીવનકથા કે તેમનાં ચોકકસ ગુણોમાંથી બોધપાઠ લઈને શેરબજારમાં સફળ થઈ શકાય છે
દરેક મહત્ત્વના કાર્યનો શુભારંભ આપણે ગણપતિ બાપ્પાના નામ કે પૂજા સાથે કરીએ છીએ, લોકો પૂછતા હોય છે કે શેરબજારમાં ઝંપલાવવાનો ખરો સમય-શુભ સમય કયો કહેવાય? વાસ્તવમાં શેરબજારમાં રોકાણનો પ્રારંભ કોઈ પણ સમયે થઈ શકે છે, પણ વિશેષ સમય મંદીનો હોય ત્યારે ગણાય. જયારે પણ શેરબજારમાં ભાવો નીચે ઉતરી ગયા હોય ત્યારે પ્રવેશ કરવામાં સાર છે. શેરબજારમાં પ્રવેશવાનો કયો સમય ખરો, એ તેણે જ વિચારવાનું હોય છે, જેણે ટૂંકા ગાળા માટે રોકાણ કરવું હોય. શેરબજારમાં લાંબા ગાળા માટે પ્રવેશવાનો દરેક સમય શુભ છે.
પોર્ટફોલિયો ઘડવાનો બોધપાઠ
ગણપતિ બાપ્પા વિશેની કથા મુજબ જયારે તેમને ભાઈ કાર્તિક સાથે પુથ્વીની પ્રદક્ષિણાની સ્પર્ધામાં ઊતરવાનું કહેવામાં આવ્યુ હોય છે ત્યારે કાર્તિક તો પોતાના અવકાશયાનમાં બેસી પુથ્વીની પ્રદક્ષિણા માટે નીકળી પડે છે, પરંતુ ગણપતિજીએ માતા પાર્વતી અને પિતા શંકર ભગવાનની આસપાસ પ્રદક્ષિણા કરી બેસી જાય છે. સમગ્ર એક જબરદસ્ત સંદેશ મળે છે કે માતા-પિતામાં જ સમગ્ર પુથ્વી કે જગત આવી જાય છે. અહીં રોકાણકારોએ સમજવાનું કે તેમણે આખા બજાર પાછળ દોડવાને બદલે પસંદગીની ચોકકસ મર્યાદિત સ્ક્રિપ્સ આસપાસ જ રહેવું જોઇએ. માત્ર કોઈપણ ટિપ્સ કહે એટલે શેરો જમા કરતા જવાને અને રોકાણનો પોર્ટફોલિયો મોટો કરતા જવાને બદલે મર્યાદિત રાખવો સલાહભર્યું છે.પોર્ટફોલિયોમાં મહત્તમ દસ જેટલી સ્ક્રિપ્સ રાખવી આદર્શ છે. સંખ્યા ઓછી હશે તેમ તેના અભ્યાસ કે રિવ્યુ કરવાનું કામ સરળ અને ધ્યાનપૂર્વકનું બનશે.પચાસ સ્ક્રિપ્સ ભેગી કરીને અમુકમાં કમાવાનું અને અમુકમાં ગુમાવવાનુ રાખી સરવાળે કંઈ ખાસ પામવાનું જ ન રહે એવું બનતું હોય છે. અર્થાત્ તમને જે શેર વધુ લાભદાયી કે વૃદ્ધિલક્ષી લાગે તો તેને એક-એક-બે-બે ની સંખ્યામાં પણ જમા કરી શકાય. કેટલાક લોકો શેરના ભાવોને જોઈ તે શેર ખરીદવાનું નકકી કરે છે, એટલે કે શેર રૂપિયા ૨૫-૫૦ની અંદરનાં ભાવે મળતો હોય તો લોકોને એ શેર સસ્તો અને સારો લાગે છે અને કોઈ શેરનો ભાવ રૂપિયા ૫૦૦થી ૧૦૦૦ આસપાસ કે વધુ બોલાતો હોય તો લોકોને તે મોંઘો લાગે છે, પરિણામે લોકો તેનાથી દુર રહે છે. હકીકતમાં પેલો રૂપિયા ૨૫-૫૦નો શેર ભવિષ્યમાં ૪૦ કે ૩૦ રૂપિયા થઈ જાય એમ બની શકે અને રૂપિયા ૧૦૦૦નાં ભાવવાળો શેર રૂપિયા ૧૨૦૦ કે ૧૫૦૦ થઈ ગયો હોય એવું પણ બની શકે છે. તો પછી ખરીદવા માટે લાયક શેર કયો કહેવાય ? ઈન શોર્ટ, રિલાયન્સ કે લાર્સન જેવી સ્ક્રિપ્સ એક-બેની સંખ્યામાં જમા કરતા જવામાં પણ શાણપણ છે.
જ્ઞાનનો ભાર નહીં રાખવાનો બોધપાઠ
મને તો શેરબજારમાં બધી જ ખબર પડે, હું ધારૂં છું એમ જ અહીં થાય છે, હું તો ખોટો પડું જ નહીં, વગેરે જેવા ભ્રમમાં કે અભિમાનમાં રહેનારા માટે ગણપતિ બાપ્પાનો સંદેશ એ જ છે કે તમારી વિવેક ‘બુધ્ધિથી વ્યવહાર કરો. કોઈપણ કામ જયારે શુભ હેતૂથી થતું હોય ત્યારે તે નાનું કે મોટું હોતું નથી અને એટલે જ ગણપતિ બાપ્પા પોતે જ વ્યાસમુનિ પાસે બેસી મહાભારતનાં લહિયા બની ગયા હતા. તેમણે ઉંદર જેવા નાનકડા જીવને પણ અનોખું સ્થાન આપ્યું. તેથી જયાં પણ ગણપતિજીની હાજરી હોય ત્યાં મૂષકની હાજરી હોય જ છે. મીઠાઈ તરીકે બાપાએ મોદકને પણ અનોખી ઓળખ આપી છે. આમ ફરી મેસેજ એ જ છે કે શેરબજારમાં શીખવા સમજવા માટે દરેક નાની-નાની કે નવી બાબતો પણ મહત્ત્વની હોય છે.
પ્રોફિટ બુકિંગનો બોધપાઠ
ગણપતિ બાપ્પાને લાડુ કેટલા વહાલા છે તે પણ જાહેર છે, શેરબજારમાં લાડુ ખાઈ લેવાનો અર્થ પ્રોફિટ ઘરમાં લઈ લેવાનો થાય છે. શેરબજારમાં સમયાંતરે તેજી કે મંદી આવતી રહે છે. રોકાણકારે ચોકકસ સમયે સારો નફો મળતો હોય તો એ લઈ લેવો જોઈએ. અર્થાત્ વળતર બાબત સંતોષ રાખી નફો બુક કરી લેવામાં સાર છે.
વિસર્જનમાંથી બોધપાઠ
શેરબજારમાં રોકાણ કરવું એટલે બજાર પર જ ધ્યાન રાખવું પડે, પણ કાયમ બજારના જ વિચાર કરતા રહેવું પડે એ સ્થિતિ આદર્શ ન ગણાય કે સતત બજારમાં લે-વેચ કરતા રહેવી પડે એ પણ સારી નિશાની નથી. ગણપતિ બાપ્પા વરસમાં એક જ વાર આવે છે અને ઘર-ઘરના કે સાર્વજનિક ઉત્સવોમાં દોઢથી લઈ મહતમ દસ દિવસ રહે છે, ત્યારબાદ પુઢચ્યા વરસી લૌકર યા કહેવામાં આવે છે. આમ ગણપતિ બાપ્પા આપણા જીવનમાં ભલે સદા રહે, પરંતુ ઉત્સવ તરીકે દસ દિવસ માટે જ પધારે છે. તેઓ જયાં સુધી હોય છે ત્યાં સુધી તેમની સેવા-કાળજી બરાબર લેવાની હોય છે. અર્થાત્ રોકાણકાર આનો સંકેત એવો લઈ શકે કે, તેઓ ત્યાં બજારમાં સતત ચોંટી ન રહે. બજારમાં લાંબા ગાળાનો અભિગમ રાખે અને સમયાંતરે તેની સમીક્ષા કરે. પોતાની સ્ક્રિપ્સ પર બરાબર ધ્યાન આપવું .યોગ્ય સમયે બજારમાંથી વિસર્જન પણ લેવાનું હોય છે. તેમાં જ સંપત્તિસર્જનનો પણ માર્ગ રહેલો છે. અહી વિસર્જન એટલે બજારમાંથી નીકળી જવું નહીં, બલકે બજારથી દૂર રહેવું. જેમ વોરેન બફેટ કહે છે, તમે જે દિવસે શેરોમાં રોકાણ કરો ત્યારપછી પાંચ વરસ સુધી બંધ રહેવાનું છે એમ સમજીને રહો.
બજારમાં નહીં ગભરાવાનો બોધપાઠ
ગણપતિજીની કથા કહે છે કે જયારે માતા પાર્વતી ઘરમાં સ્નાનગૃહમાં જાય છે ત્યારે બહાર ગણપતિને ઊભા રહી ચોકી કરવાનું કહે છે અને કોઈને અંદર નહીં આવવા દેવાની સૂચના આપે છે. એ સમયે ભગવાન શંકર ત્યાં આવે છે તો ગણપતિ તેમને પણ ભીતર જવાની ના ફરમાવે છે અને એ વખતે ભગવાન શંકર પોતાના આ પુત્ર વિષે અજાણ હોવાથી ક્રોધમાં આવી ગણપતિનું માથું ધડથી અલગ કરી દે છે. ત્યારબાદ માતા પાર્વતીને આ
વાતની જાણ થતા ભગવાન શંકર અને માતા પાર્વતી વચ્ચે વાર્તાલાપ થાય છે અને ભગવાન શંકર બહાર જઈ માર્ગમાં પહેલા જે કોઈપણ મળે તેનું માથું લઈ આવી ગણપતિનાં ધડ પર બેસાડવાનું નકકી કરે છે, જેમાં સૌપ્રથમ તેમને રસ્તામાં હાથી મળે છે તેથી ભગવાન શંકર હાથીનું માથું કાપી લઈ ગણપતિનાં ધડ પર મૂકે છે. આ કથાનો બોધ શેરબજારમાં એ રીતે લઈ શકાય કે રોકાણકારમાં શેરો કે સંજોગો પ્રત્યે ક્ધવીકશન હોવું જરૂરી છે અને તે આવે છે અભ્યાસ તેમ જ વિશ્ર્વાસ પરથી. જો આપણે સિલેકટ કરેલા શેરોમાં વિશ્ર્વાસ ધરાવતા હોઇશું તો આપણા નિર્ણયને વળગી રહી શકીશું, અન્યથા કોઈપણ વ્યકિત કે વલણ-વહેણ આપણા નિર્ણયને બદલાવી નાંખે કે આપણને ડરાવી નાખે એવી પરિસ્થિતિ પણ ઊભી થઈ શકે છે. આમ રોકાણકારે લાંબા ગાળાનાં રોકાણ નિર્ણય વખતે કે પછી સારી કામગીરીવાળી કંપની પસંદ કરતી વખતે પેનિકમાં આવી જવું જોઇએ નહીં. બજારમાં આપણને ગેરમાર્ગે દોરનારા કે ગભરાવનારા વર્ગો રહેવાનાં જ છે. સાચી સ્ક્રિપ્સ જાળવી રાખી હશે તો મોટેભાગે ચિંતા કરવાની જરૂર રહેશે નહીં. આ બધાં બોધપાઠ સમગ્ર ઈન્વેસ્ટમેન્ટ માર્કેટને લાગુ પડી શકે.

 

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.