ફરીથી વિલનના પાત્રમાં જોવા મળશે આ અભિનેતા

દક્ષિણની બ્લોકબસ્ટર ફિલ્મ KGF 2માં વિલન અધિરાની ભૂમિકા ભજવનાર બોલિવૂડ સ્ટાર સંજય દત્ત ફરી એક વાર વિલનની ભૂમિકામાં જોવા મળશે. હાલમાં અભિનેતા તેમની ફિલ્મ ‘લિયો’ના શૂટિંગમાં વ્યસ્ત છે. આ ફિલ્મમાં સંજય દત્ત વિલનની ભૂમિકામાં છે. આ પાત્ર ઘણું અઘરું છે, જેને માટે તે પરસેવો પાડી રહ્યો છે.
માસ્ટર અને વિક્રમ ફેમ ડિરેક્ટર લોકેશ કનાગરાજની પેન ઈન્ડિયા રિલીઝ ફિલ્મ ‘લિયો’નું શૂટિંગ હાલમાં કાશ્મીરમાં ચાલી રહ્યું છે. આ ફિલ્મમાં નિર્માતાઓએ વિલનના રોલ માટે સંજય દત્તને સાઈન કર્યા છે. આ ફિલ્મમાં સંજયની સાથે તમિલ સુપરસ્ટાર થાલાપથી વિજય પણ જોવા મળશે. ‘લિયો’માં બંને વચ્ચે જોરદાર લડાઈ જોવા મળશે.
આ પહેલીવાર નથી જ્યારે સંજય દત્ત વિલનની ભૂમિકામાં જોવા મળશે. આ પહેલા પણ સંજય દત્ત ઘણી ફિલ્મોમાં વિલનની ભૂમિકા ભજવી ચુક્યો છે. ખલનાયકથી લઈને અગ્નિપથ સુધી અભિનેતાએ ઘણી ફિલ્મોમાં ભયાનક ખલનાયકનું પાત્ર ભજવીને દર્શકોને હચમચાવી દીધા હતા. આ સિવાય તેણે બ્લોકબસ્ટર ફિલ્મ KGF 2માં અધિરાના પાત્રથી ભારે ઝંઝાવાત સર્જ્યો હતો. એમ લાગે છે કે સાઉથના ફિલ્મ નિર્માતાઓ માટે વિલનના પાત્ર માટે સંજય દત્ત શ્રેષ્ઠ પસંદગી બની ગયો છે.