ડૉલર સામે રૂપિયામાં દસ પૈસાનો સુધારો

(વાણિજ્ય પ્રતિનિધિ તરફથી)
મુંબઈ: વૈશ્ર્વિક વિનિમય બજારમાં આજે ડૉલર ઈન્ડેક્સમાં નરમાઈનું વલણ રહ્યું હોવાથી સ્થાનિક ફોરેક્સ માર્કેટમાં ડૉલર સામે રૂપિયામાં ૧૦ પૈસાનો સુધારો આવ્યો હતો અને ૮૨.૨૮ની સપાટીએ બંધ રહ્યો હતો. જોકે, આજે બ્રેન્ટ ક્રૂડતેલના વાયદામાં ભાવવધારો, સ્થાનિક ઈક્વિટી માર્કેટમાં નરમાઈ અને ગઈકાલે સ્થાનિક ઈક્વિટી માર્કેટમાં વિદેશી સંસ્થાકીય રોકાણકારોની રૂ. ૧૧૩૧.૬૭ કરોડની વેચવાલી રહી હોવાના અહેવાલને કારણે રૂપિયામાં સુધારો મર્યાદિત રહ્યો હોવાનું સૂત્રોએ જણાવ્યું હતું.
આજે સ્થાનિકમાં ડૉલર સામે રૂપિયો ગઈકાલના ૮૨.૩૮ના બંધ સામે સુધારાના ટોને ૮૨.૩૦ની સપાટીએ ખૂલ્યા બાદ સત્ર દરમિયાન નીચામાં ૮૨.૩૩ અને ઉપરમાં ૮૨.૦૮ સુધી મજબૂત થયા બાદ અંતે ગઈકાલના બંધથી ૧૦ પૈસા વધીને ૮૨.૨૮ની સપાટીએ બંધ રહ્યો હતો. ફોરેક્સ ટ્રેડરોના જણાવ્યાનુસાર હવે રોકાણકારોની નજર આગામી સપ્તાહની વૈશ્ર્વિક કેન્દ્રવર્તી બૅન્કોની નીતિવિષયક બેઠકમાં વ્યાજદરમાં વધારા અંગેના નિર્ણયો પર સ્થિર થઈ છે. જોકે, અમેરિકી ફેડરલ રિઝર્વ વ્યાજદરમાં ૫૦ બેસિસ પૉઈન્ટના વધારાનો નિર્ણય લે તેવી ધારણા બજાર વર્તુળો મૂકી રહ્યા છે. જ્યારે વિશ્ર્લેષકો આગામી ટૂંકા સમયગાળા દરમિયાન ડૉલર સામે રૂપિયો ૮૨.૨૦થી ૮૨.૮૦ની રેન્જમાં અથડાતો રહે તેવી ધારણા મૂકી રહ્યા છે.
દરમિયાન આજે વિશ્ર્વ બજારમાં ડૉલર ઈન્ડેક્સ ગઈકાલના બંધથી ૦.૦૬ ટકા ઘટીને ૧૦૪.૭૧ આસપાસ ક્વૉટ થઈ રહ્યો હોવાથી રૂપિયાના સુધારાને ટેકો મળ્યો હતો. જોકે, આજે વિશ્ર્વ બજારમાં બ્રેન્ટ ક્રૂડતેલના વાયદામાં ભાવ ૧.૨૨ ટકા વધીને બેરલદીઠ ૭૭.૦૮ આસપાસ ક્વૉટ થઈ રહ્યા હોવાથી તેમ જ સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે ૩૮૯.૦૧ પૉઈન્ટનો અને ૧૧૨.૭૫ પૉઈન્ટનો ઘટાડો આવતાં રૂપિયામાં સીમિત માત્રામાં સુધારો જોવા મળ્યો હોવાનું સૂત્રોએ ઉમેર્યું હતું.