મુંબઈ: વૈશ્ર્વિક વિનિમય બજારમાં ડૉલર ઈન્ડેક્સમાં ઘટ્યા મથાળેથી સુધારો છતાં બ્રેન્ટ ક્રૂડતેલના વાયદામાં નરમાઈ, સ્થાનિક ઈક્વિટી માર્કેટમાં ઉછાળો અને ગત બુધવારે વિદેશી સંસ્થાકીય રોકાણકારોની ઈક્વિટીમાં ખરીદી રહી હોવાનું એક્સચેન્જે પ્રાથમિક આંકડાકીય માહિતીમાં જણાવતાં આજે સ્થાનિક ફોરેક્સ માર્કેટમાં ડૉલર સામે રૂપિયો ગત બુધવારના બંધ સામે ૧૪ પૈસાના સુધારા સાથે ૮૨.૨૦ના મથાળે બંધ રહ્યો હતો. ગઈકાલે સ્થાનિક ફોરેક્સ માર્કેટ રામનવમી નિમિત્તે સત્તાવાર ધોરણે બંધ રહી હતી. આજે સ્થાનિકમાં ડૉલર સામે રૂપિયો ગત બુધવારના ૮૨.૩૪ના બંધ સામે સુધારાના ટોને ૮૨.૧૨ની સપાટીએ ખૂલ્યા બાદ સત્ર દરમિયાન નીચામાં ૮૨.૨૬ અને ઉપરમાં ૮૨.૦૯ની રેન્જમાં અથડાઈને અંતે આગલા બંધથી ૧૪ પૈસાના સુધારા સાથે ૮૨.૨૦ની સપાટીએ બંધ રહ્યો હતો. આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે ૧૦૩૧.૪૩ પૉઈન્ટ અને ૨૭૯.૦૫ પૉઈન્ટનો સુધારો આવ્યો હોવાથી તેમ જ ગત બુધવારે વિદેશી સંસ્થાકીય રોકાણકારોની ઈક્વિટીમાં રૂ. ૧૨૪૫.૩૯ કરોડની ચોખ્ખી લેવાલી રહી હોવાના નિર્દેશ ઉપરાંત આજે વિશ્ર્વ બજારમાં બ્રેન્ટ ક્રૂડતેલના વાયદામાં ભાવ ગઈકાલના બંધથી ૦.૨૪ ટકા ઘટીને બેરલદીઠ ૭૯.૦૮ ડૉલર આસપાસ ક્વૉટ થઈ રહ્યા હોવાથી રૂપિયાના સુધારાને ટેકો મળ્યો હતો. જોકે, આજે વિશ્ર્વ બજારમાં ડૉલર ઈન્ડેક્સ ઘટ્યા મથાળેથી ૦.૨૫ ટકાના સુધારા સાથે ૧૦૨.૦૮ આસપાસ ક્વૉટ થઈ રહ્યો હોવાથી રૂપિયામાં સુધારો મર્યાદિત રહ્યો હતો.