(વાણિજ્ય પ્રતિનિધિ તરફથી)
મુંબઈ: વૈશ્ર્વિક વિનિમય બજારમાં આજે ડૉલર ઈન્ડેક્સમાં ઘટ્યા મથાળેથી સુધારાતરફી વલણ રહેતાં આજે લંડન મેટલ એક્સચેન્જ ખાતે ધાતુમાં વધ્યા મથાળેથી નરમાઈનું વલણ જોવા મળ્યું હોવાના નિર્દેશો સાથે સ્થાનિક જથ્થાબંધ ધાતુ બજારમાં આજે એકમાત્ર ટીનમાં સ્ટોકિસ્ટોની ઘટ્યા મથાળેથી લેવાલી નીકળતાં ભાવમાં જોવા મળેલા કિલોદીઠ રૂ. ૩૭ના સુધારાને બાદ કરતાં નિકલ, લીડ ઈન્ગોટ્સ, ઝિન્ક સ્લેબ અને કોપર તથા બ્રાસની અમુક વેરાઈટીઓમાં સ્ટોકિસ્ટોની નફારૂપી વેચવાલી રહેતાં ભાવમાં કિલોદીઠ રૂ. ૧થી ૬૨ સુધીનો ઘટાડો આવ્યો હતો. આ સિવાય કોપર યુટેન્સિલ્સ સ્ક્રેપ, બ્રાસ અને એલ્યુમિનિયમમાં ટકેલું વલણ રહ્યું હતું. આજે સ્થાનિકમાં એકમાત્ર ટીનમાં સ્ટોકિસ્ટોની લેવાલી ઉપરાંત વપરાશકાર ઉદ્યોગ અને સ્થાનિક ડીલરોની માગને ટેકે ભાવ કિલોદીઠ રૂ. ૩૭ વધીને રૂ. ૨૩૨૫ના મથાળે રહ્યા હતા. આ સિવાય આજે મુખ્યત્વે નિકલ અને કોપર વાયરબારમાં સ્ટોકિસ્ટોની આક્રમક વેચવાલીનું દબાણ અને ઔદ્યોગિક વપરાશકાર તથા સ્થાનિક ડીલરોની માગ નિરસ રહેતાં ભાવ અનુક્રમે કિલોદીઠ રૂ. ૬૨ ઘટીને રૂ. ૧૯૮૮ અને રૂ. ૧૨ ઘટીને રૂ. ૭૯૭ના મથાળે રહ્યા હતા.
વધુમાં આજે અન્ય ધાતુઓ જેમાં સ્ટોકિસ્ટોની છૂટીછવાઈ વેચવાલી અને સાર્વત્રિક સ્તરેથી માગ નિરસ રહેતાં ભાવમાં નરમાઈનું વલણ રહ્યું હતું, તેમાં લીડ ઈન્ગોટ્સના ભાવ કિલોદીઠ રૂ. ૮ ઘટીને રૂ. ૧૮૫, ઝિન્ક સ્લેબના ભાવ કિલોદીઠ રૂ. ૬ ઘટીને રૂ. ૨૫૬, બ્રાસ શીટ કટિંગ્સના ભાવ કિલોદીઠ રૂ. પાંચ ઘટીને રૂ. ૫૩૦, કોપર સ્ક્રેપ હેવીના ભાવ કિલોદીઠ રૂ. ૨ ઘટીને રૂ. ૭૫૫ અને કોપર કેબલ સ્ક્રેપના ભાવ કિલોદીઠ રૂ. ૧ ઘટીને રૂ. ૭૬૫ના મથાળે રહ્યા હતા.