Homeપ્રજામતપ્રજામત

પ્રજામત

જ્યોર્જ સોરોસની ખંડનાત્મક પ્રવૃત્તિ
જ્યોર્જ સોરોસ અબજપતિ નિ:શંક છે, પરંતુ સંપત્તિનું ઉપાર્જન કયા રસ્તે થયેલ તે અભ્યાસ માગી લે છે તેણે શેર માર્કેટમાં હેજ ફંડ, શોર્ટ સેલિંગ મારફત પુષ્કળ આવક રળેલ. તે ઉપરાંત બ્રિટનના પાઉંડના અવમૂલ્યન સમયે ૧ અબજ ડૉલરની કમાણી કરેલ.
જ્યારે શેર માર્કેટમાં અપેક્ષિત કમાણીમાં નિષ્ફળતા મળે ત્યારે હિંડનબર્ગ અને સોરોસ જેવા વિધ્નસંતોષીઓ આ પ્રકારના બફાટ કરે છે. હવે અબજપતિઓ એલનમસ્ક, બેઝોસ, બ્લુમબર્ગ, બીલ ગેટસ વગેરેની પ્રવૃત્તિઓ તરફ જોઈએ તો તેઓ બુદ્ધિ બળ, વિશિષ્ટ સર્જનાત્મકતા અને વ્યાપારિક કુનેહ થકી આટલી ધન વૃદ્ધિ કરી શકયા છે. તેઓમાં ઈર્ષ્યાનું નામનિશાન નથી કે રાજદ્વારી ખંડનાત્મક ટીકાઓમાં પડતા નથી બલકે ભારતીય બુદ્ધિધનને કુંપનીમાં ભરતી કરે છે. સોરોસને ભારત અમેરિકા સાથેની હરીફાઈમાં આગળ તો નહીં વધે તેવી દહેશત છે.
જ્યારે આવા ભારત વિરોધીઓ હિન્દુ-મુસલમાન વિખવાદ જે પરાપૂર્વથી ચાલી આવે છે તેની વાતો કરતા હોય ત્યારે ગોરાકાળાનો ભેદ અને ભયંકર કતલોને શા માટે સહેલાઈથી ભૂલી જાય છે? મુસ્લિમ દેશ ટર્કી ભારતનો વિરોધી દેશ છે છતાં ભૂકંપ બાદ સર્વ મુસ્લિમોને કેવી અદ્ભુત સહાય કરેલ તે તેમની નજરમાં કેમ નથી આવતું?
* * *
પ્રજામતની પુન: શરૂઆત થતા ખુશી થઈ
આપના તરફથી પ્રજામત વિભાગની શરૂઆત પુન: થતા ખુશી અનુભવી રહ્યો છું. ધન્યવાદ. અખબાર સારું વાચન અને ચિંતનાત્મક વિષયો લખે છે અને તે કારણે પ્રતિભાવ આપવાની લાગણી થશેજ સૌને પોતાના વિચારો રજૂ કરવાની તક મળે તેનાથી વધુ રૂડું શું હોઈ શકે? આપનું શનિવારનું જ્યોર્જ સોરોસનું લખાણ મનનીય હતું અને તેના વિશેષ અભ્યાસ ગૂગલની સહાયથી કર્યો. ત્યાર બાદ મારા વિચારો આપને રવાના કરી રહ્યો છું. આશા છે આપ મારા અભ્યાસ અને વાચનની કદરરૂપે મારું લખાણ પસંદ કરી સ્વીકારશો. આપનો સહર્ષ આભાર.
મહેન્દ્ર પ્રા. લોઢવિયા, સાંતાક્રુઝ (ઈસ્ટ)
—————–
જ્યોતિર્લિંગમાં વિવાદ
ભારતનાં ૧૨ જાણીતા જ્યોતિર્લિંગમાં મહારાષ્ટ્રનાં ઔંધાનાગનાથ તેમ જ પરલીના વૈજનાથનો સમાવેશ ગણાય છે, પરંતુ અન્ય અભિપ્રાય પ્રમાણે ઘણાં ગુજરાતમાં નાગેશ્ર્વરના નાગનાથ તથા વૈજનાથ ઝારખંડમાં હોવાનો પણ દાવો કરે છે. વળી હમણાં આસામના મુખ્યમંત્રીએ મહારાષ્ટ્રમાં ભીમાશંકર છે, તે ખરેખર ભીમાશંકર આસામમાં હોવાનો દાવો કર્યો છે. આમ હેવ જ્યોતિર્લિંગ બાબતમાં પણ વિવિધ દાવા થાય છે. આ બાબતમાં કોઈ પ્રખર વિદ્વાન શાસ્ત્રકાર ખુલાસો કરે તે હિતાવદ ગણાશે. જે ભાવિકોએ બાર જ્યોતિર્લિંગના દર્શન કરવાનો સંકલ્પ કર્યો હોય તેની દ્વિધા દૂર થશે અને ખરેખરા જ્યોતિર્લિંગના દર્શન કર્યાનો સંતોષ થશે.
* * *
દેવભાષા-રાષ્ટ્રભાષા
ભારતના પૂર્વ મુખ્ય ન્યાયમૂર્તિ શ્રી બોબડે સાહેબે એક સચોટ સૂચન કર્યું છે કે દેવભાષા સંસ્કૃતને રાષ્ટ્રભાષા ઘોષિત કરવી જોઈએ. આ સૂચન ખરેખર વિચાર માગી લે છે. આપણા દેશમાં સ્થાનિક સ્તરે અનેક ભાષાઓ-બોલીઓ છે, તેના મૂળ સંસ્કૃત ભાષાનાં જ છે.
રાષ્ટ્રભાષા સંસ્કૃત બનાવવાથી અનેક પ્રશ્ર્નો હલ થઈ શકે. જેમ કે દક્ષિણ ભારતીઓ માને છે કે તેમના પર હિન્દી ભાષા થોપવામાં આવી રહી છે. તેની ફરિયાદ દૂર થશે. ઉપરાંત વિવિધ રાજ્યો સ્થાનિક ભાષા ફરજિયાત બાળકો-વિદ્યાર્થીઓને શીખવવાનો આગ્રહ રાખે છે. સંસ્કૃત ભાષા આવડવાથી અન્ય ભાષાઓ શીખવા-સમજવાનું આસાન થશે. આ કારણથી તેને વિવિધ ભાષા શીખવાની કડાકૂટમાંથી છુટકારો મળશે અને પુસ્તકોનો બોજ પણ હળવો થશે. ભારત સરકારે આ બાબત તાત્કાલિક વિચારણા કરી અમલ કરવો જોઈએ.
મહેન્દ્ર જી. ઓઝા, માટુંગા
————–
લઘુતમવાદ (મિનિલિઝમ)
વિશેનો લેખ ઉત્કૃષ્ટ
મેં હાલમાં મુંબઈ સમાચારની પૂર્તિમાં અંકિત દેસાઈનો ‘મિનિલિઝમ અને અધ્યાત્મની યાત્રામાં તેના યોગદાન’ વિશેનો લેખ વાંચ્યો. લેખ અને લેખનશૈલી ખૂબ જ ઉત્કૃષ્ટ, સરળ અને સમજવામાં સહેલોસટ લેખ.
મારી આધ્યાત્મિક યાત્રામાં આ લેખ ઉપયોગી થયો છે. તમારો લેખ તત્ત્વજ્ઞાન અને પ્રેક્ટિકલ શિખામણોના અદ્ભુત મિશ્રણ સમાન હતો. આ લેખથી મને જીવનમાં ભૌતિક ચીજોનો ઉપયોગ ઓછો કરવાની અને સત્યના માર્ગ પર ધ્યાન કેન્દ્રિત કરવાની પ્રેરણા આપે છે. તમારા જ્ઞાનને વાચકો સુધી પહોંચાડવા માટે આભાર. આવા જ વધુ લેખો તમારી પાસેથી વાંચવા મળશે તેવી અપેક્ષા સાથે ખૂબ અભિનંદન.
જિગર શાહ, મુંબઈ.
કસરતથી આયુષ્ય રેખા
લંબાવી શકાય છે….!?
કસરત ગમે તે ઉંમરે શરૂ કરી શકાય છે. જો પિસ્તાલીસ વર્ષની ઉંમરે કસરત શરૂ કરો તો સરેરાશ આયુષ્ય મર્યાદા કરતાં નવ માસ વધારે જીવી શકો. પાંસઠ વર્ષે આરંભ કરો તો વધારે લાંબુ નહીં, પણ વધારે સારું જીવન જરૂર
જીવી શકો.
કસરત ન કરવા માટે આંતરિક પ્રેરણાના અભાવ સિવાય આપણી પાસે બીજું કયું બહાનું હોય છે? મોટા ભાગના લોકો આ પાંચ કારણોમાંથી જ કોઈકને આગળ ધરશે: (૧) સમય મળતો નથી (૨) કસરતના સાધનો નથી (૩) યોગ્ય જગ્યા નથી (૪) પૈસા નથી (૫) કંટાળો આવે છે.
ઉપરોક્ત પાંચ કારણોમાંથી ‘સમય’ એ સૌથી વધારે નડતર બનતી ચીજ છે, પણ કસરત કરવામાં તમારે ખરેખર કેટલા સમયની જરૂર પડે? આવો સાચો જવાબ તમને આશ્ર્ચર્ય પમાડશે. સમય કે સમયનો અભાવ તમને તમારું આરોગ્ય અને આયુષ્ય સુધારતા કઈ રીતે રોકી શકે? સાચી વાત એ છે કસરત માટે તમારે અઠવાડિયામાં ત્રણ કે ચાર દિવસ રોજ ત્રીસ મિનિટ કાઢવાની જરૂર છે.
મધ્યમ વયે પણ કસરત શરૂ કરીને તેને વળગી રહેવાથી મૃત્યુ પ્રમાણ અને અશક્તિમાં ઘટાડો થઈ શકે. વ્યાયામ માટે કોઈ વિશિષ્ટ જગ્યાની જરૂર નથી. કસરત ઘરની અગાસી કે રૂમમાં થઈ શકે છે.
પ્રિન્સિ. કુંવરી અને અનસૂયા બારોટ
અંઘેરી (પ.), મુંબઈ.

LEAVE A REPLY

Please enter your comment!
Please enter your name here
Captcha verification failed!
CAPTCHA user score failed. Please contact us!

RELATED ARTICLES

Most Popular