મહારાષ્ટ્ર વિધાન ભવનમાં બાળાસાહેબ ઠાકરેની તસવીર લગાવાશે, પણ…

જ્યારથી એકનાથ શિંદેએ શિવસેનાના ઉદ્ધવ ઠાકરેના નેતૃત્વ સામે બળવો કર્યો છે અને મહારાષ્ટ્રમાં ભાજપ સાથે સરકાર બનાવી છે, ત્યારથી શિંદે જૂથ અને ઠાકરે જૂથે એકબીજાને અપમાનિત કરવાની કોઈ તક છોડી નથી. બંનેનું રાજકારણ બાળાસાહેબ ઠાકરેના નામ પર નિર્ભર છે , પરંતુ બંને પક્ષના લોકો એકબીજાની સામે જોવાનું પણ પસંદ કરતા નથી. એકબીજા સામેની આ નફરત ફરી સપાટી પર આવી છે. મહારાષ્ટ્રના વિધાન ભવનમાં શિવસેનાના દિવંગત પ્રમુખ બાળાસાહેબ ઠાકરેનું તૈલચિત્ર લગાવવામાં આવવાનું છે.
આ સંદર્ભમાં 23 જાન્યુઆરીએ એટલે કે બાળાસાહેબ ઠાકરેની જન્મજયંતિના રોજ ભવ્ય કાર્યક્રમનું આયોજન કરવામાં આવ્યું છે. જ્યારે આ તૈલચિત્ર તૈયાર કરવામાં આવ્યું ત્યારે ઠાકરે જૂથે તેની સામે નારાજગી વ્યક્ત કરી હતી. ઠાકરે જૂથે કહ્યું હતું કે આ પેઇન્ટિંગ અપેક્ષા મુજબ થયું નથી. હવે તેના અનાવરણને લગતા કાર્યક્રમને લઈને આમંત્રણ કાર્ડ પ્રસિદ્ધ કરવામાં આવ્યું છે. આમાં ઠાકરે પરિવારના કોઈ સભ્યનું નામ નથી. ઉદ્ધવ ઠાકરેનું નામ પણ નથી.
મુખ્યમંત્રી એકનાથ શિંદે અને નાયબ મુખ્યમંત્રી દેવેન્દ્ર ફડણવીસના હસ્તે આ તૈલ ચિત્રનું અનાવરણ થવાનું છે. વિધાન પરિષદમાં વિપક્ષના નેતા અંબાદાસ દાનવે, વિધાનસભામાં વિરોધ પક્ષના નેતા અજિત પવાર અને સંસદીય કાર્ય મંત્રી ચંદ્રકાંત પાટીલ આને લગતા કાર્યક્રમમાં હાજર રહેશે.
વિધાનસભા અધ્યક્ષ રાહુલ નાર્વેકરે આ મુદ્દાને વધુ મહત્વ ના આપવા અંગે સ્પષ્ટતા કરતા જણાવ્યું હતું કે, શિવસેના પક્ષ પ્રમુખ ઉદ્ધવ ઠાકરે અને મહારાષ્ટ્ર નવનિર્માણ સેના પ્રમુખ રાજ ઠાકરેને પણ આમંત્રણ આપવામાં આવ્યું છે. આ ઉપરાંત વિધાનસભાના ઉપાધ્યક્ષ નરહરિ ઝિરવાલ અને વિધાનસભાના ઉપાધ્યક્ષ નીલમ ગોરહે પણ આમંત્રિતોની યાદીમાં છે.