SCO સમિટમાં સામેલ થવા PM મોદી ઉઝબેકિસ્તાન જવા રવાના, શાહબાઝ શરીફ સાથે વાતચીત અંગે અટકળો

ટૉપ ન્યૂઝ દેશ વિદેશ

શાંઘાઈ કોઓપરેશન ઓર્ગેનાઈઝેશન(SCO) સમિટમાં ભાગ લેવા વડાપ્રધાન નરેન્દ્ર મોદી દિલ્હીથી ઉઝબેકિસ્તાનના સમરકંદ જવા રવાના થઈ રહ્યા છે. કોરોના મહામારી બાદ પ્રથમ વખત આ સંગઠનના તમામ સ્થાયી સભ્ય દેશોના નેતાઓ એક મંચ પર હાજર રહેશે. આ SCO સમિટને ઘણી રીતે ખાસ માનવામાં આવે છે, કારણ કે પાકિસ્તાનના પીએમ શાહબાઝ શરીફ અને ચીનના રાષ્ટ્રપતિ શી જિનપિંગ પણ તેમાં ભાગ લઈ રહ્યા છે. આ સમિટ માટે પીએમ મોદીના પ્રસ્થાન પહેલા વિદેશ મંત્રાલય દ્વારા માહિતી આપવામાં આવી હતી.
વિદેશ સચિવ વિનય મોહન ક્વાત્રાએ પ્રેસ કોન્ફરન્સમાં જણાવ્યું કે, આ સમિટમાં પ્રાદેશિક અને આંતરરાષ્ટ્રીય મુદ્દાઓ પર ચર્ચા કરવામાં આવશે. આ સિવાય આતંકવાદ સામે લડવાના ઉપાયો અંગે પણ ચર્ચા થશે.
SCO સમિટ દરમિયાન પીએમ મોદી ઉઝબેકિસ્તાન મુલાકાત અંગે વિદેશ સચિવે કહ્યું કે પીએમ મોદી ઉઝબેકિસ્તાનના રાષ્ટ્રપતિ સાથે દ્વિપક્ષીય વાતચીત કરશે. આ સાથે પીએમ મોદી અન્ય નેતાઓ સાથે પણ વાતચીત કરશે. જોકે, વિદેશ સચિવ દ્વારા એ સ્પષ્ટ કરવામાં આવ્યું નથી કે પીએમ મોદી ચીનના રાષ્ટ્રપતિ શી જિનપિંગ અને પાક પીએમ શાહબાઝ શરીફને મળશે કે નહીં. જ્યારે વિદેશ સચિવને પૂછવામાં આવ્યું કે શું પીએમ મોદીની ચીનના રાષ્ટ્રપતિ સાથે દ્વિપક્ષીય બેઠક થશે? તેના જવાબમાં તેમણે કહ્યું કે મેં કહ્યું તેમ યજમાન દેશના રાષ્ટ્રપતિ સાથે મુલાકાત સહિત અન્ય નેતાઓને મળશે. હાલ પૂરતું, અમે આનાથી વધુ કંઈ કહેવા માંગતા નથી. જેમ જેમ કાર્યક્રમ આગળ વધશે તેમ અમે તમને માહિતગાર રાખીશું.
વિદેશ મંત્રાલય તરફથી કહેવામાં આવ્યું છે કે આ સમિટ દરમિયાન બિઝનેસ અને પર્યટન પર પણ ચર્ચા કરવામાં આવશે. પીએમ મોદી આજે સાંજ સુધીમાં ઉઝબેકિસ્તાનના સમરકંદ પહોંચશે. જે બાદ તે આવતીકાલે 16 સપ્ટેમ્બરે સમિટમાં ભાગ લેશે. આ સમિટમાં બે સત્રો થશે. પ્રથમ સત્ર SCO દેશોનું જ હશે. જેમાં કાયમી સભ્યો જ ભાગ લઈ શકશે. આ પછી બીજા સત્રમાં નિરીક્ષક દેશો પણ સામેલ થશે.
વિદેશ સચિવે કહ્યું કે આ સમગ્ર સમિટ દરમિયાન સુરક્ષા, કનેક્ટિવિટી, વેપાર, પર્યટન અને અન્ય બાબતો પર વિગતવાર ચર્ચા કરવામાં આવશે. ભારત મધ્ય એશિયા અને પડોશી દેશો સાથે પોતાના સંબંધોને મજબૂત કરવા પર ભાર આપશે.
SCO ના સ્થાપક સભ્ય દેશો ચીન, કઝાકિસ્તાન, કિર્ગિસ્તાન, રશિયા, તાજિકિસ્તાન અને ઉઝબેકિસ્તાન છે. ભારત અને પાકિસ્તાન 2017માં તેના પૂર્ણ-સમયના સભ્યો તરીકે જોડાયા હતા.

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.