આવું 62 વર્ષમાં પહેલીવાર બન્યું
બોલિવૂડની જેમ હોલીવૂડમાં પણ એવોર્ડ સમારોહનું આગવું મહત્વ છે અને કોઇ પણ એવોર્ડ સેરેમનીમાં રેડ કાર્પેટનું પણ અનેરુ મહત્વ છે. ફેન્સ રેડ કાર્પેટ પર સેલિબ્રિટીના લુકને જોવા માટે આતુર રહેતા હોય છે. નાનો હોય કે મોટો એવોર્ડ સમારોહ હોય, સેલિબ્રિટીઓ તેમના ગ્લેમરસ લુક સાથે રેડ કાર્પેટ પર ચાહકોના દિલમાં છવાઇ જાય છે. 95મો ‘ઓસ્કાર એવોર્ડ્સ 2023’ 12 માર્ચે લોસ એન્જલસના ડોલ્બી થિયેટરમાં યોજાશે, પરંતુ 62 વર્ષમાં પહેલીવાર એવું થઇ રહ્યું છે કે કાર્પેટનો રંગ લાલ નથી.
સિનેમાની દુનિયામાં ફિલ્મ પ્રેમીઓ અને કલાકારોમાં ઓસ્કાર એવોર્ડ સમારોહનો ભારે ક્રેઝ છે. તેથી ઓસ્કાર એવોર્ડ સમારોહની રેડ કાર્પેટનું પણ એટલું જ મહત્વ છે. સેલિબ્રિટીઓ ઓસ્કારમાં રેડ કાર્પેટ પર ચાલવા માટે કોઈ કસર છોડતા નથી. રેડ કાર્પેટ પર અલગ દેખાવા માટે સેલિબ્રિટીઝમાં ગળાકાપ હરીફાઈ ચાલતી હોય છે, પરંતુ આ વર્ષના ઓસ્કારમાં રેડ કાર્પેટ નહીં હોય. આ વર્ષે કાર્પેટનો રંગ બદલવામાં આવ્યો છે. જોકે, કાર્પેટનો રંગ બદલાયો હોવાથી સેલિબ્રિટીઓ નારાજ છે.
1961થી, ઓસ્કારમાં રેડ કાર્પેટનો સમાવેશ થાય છે. ત્યારથી કાર્પેટનો રંગ લાલ રાખવામાં આવ્યો હતો, પરંતુ આ વર્ષે ઓસ્કારની રેડ કાર્પેટનો રંગ બદલાયો છે. 1961ના એકેડેમી એવોર્ડ સમારોહથી દર વર્ષે રેડ કાર્પેટ પાથરવામાં આવે છે. પરંતુ હવે 62 વર્ષ બાદ કાર્પેટનો રંગ બદલાવા જઈ રહ્યો છે. ઓસ્કારનું આયોજન કરી રહેલી એકેડમી ઓફ મોશન પિક્ચર્સે આ વખતે લાલને બદલે સફેદ રંગ પસંદ કર્યો છે.
આ વખતે ‘ઓસ્કાર 2023’ ભારત માટે ખુબ જ ખાસ છે. એસ એસ રાજામૌલીની ફિલ્મ ‘RRR’ ના નાટૂ…. નાટૂ… ગીતને ઓસ્કર માટેનોમિનેટ કરવામાં આવ્યું છે. તમામ ભારતીય સિનેમા પ્રેમીઓનું ધ્યાન ‘ઓસ્કાર 2023’ પર છે. લોકોને ‘RRR’ ના નાટૂ…. નાટૂ… ગીત ઓસ્કર જીતી લાવે એવી આશા છે.
લોસ એન્જલસના ડોલ્બી થિયેટરમાં 12 માર્ચે એવોર્ડ સમારોહ યોજાશે. ભારતીયો 13 માર્ચે સવારે 5.30 કલાકે એવોર્ડ સમારોહ જોઈ શકશે.