રાષ્ટ્રવાદી કોંગ્રેસ પક્ષ (એનસીપી - એસપી)નાં દિગ્ગજ નેતા સુપ્રિયા સુળે (Supriya Sule) એ શનિવારે દેશભરમાં સ્પર્ધાત્મક પરીક્ષાઓમાં થઈ રહેલી ગેરરીતિઓ અને વિરોધ કરી રહેલા વિદ્યાર્થીઓ સામે પોલીસ બળના ઉપયોગ અંગે ગંભીર ચિંતા વ્યક્ત કરી છે. તેમણે ચોક્કસ સમય મર્યાદામાં ઉચ્ચ સ્તરીય એસઆઈટી (SIT) તપાસ કરવાની પ્રબળ માંગ કરી છે. આ સાથે જ તેમણે શિક્ષણ પ્રણાલીમાં પારદર્શિતા લાવવા માટે સર્વપક્ષીય બેઠક અથવા સંયુક્ત સંસદીય સમિતિ (JPC) બોલાવવાની પણ હાકલ કરી છે.
વિદ્યાર્થીઓનો આક્રોશ અને રાજકારણ નહીં પણ ન્યાયની લડાઈ:
સંવાદદાતાઓ સાથેની ખાસ વાતચીતમાં સુપ્રિયા સુળેએ જણાવ્યું હતું કે, દેશની યુવા પેઢી આ પ્રકારે પરેશાન થાય તે અત્યંત ચિંતાનો વિષય છે. અમે આ મુદ્દે કોઈ રાજકારણ નથી કરી રહ્યા, પરંતુ માત્ર અને માત્ર દેશના ભવિષ્ય સમાન બાળકો માટે ન્યાય અને પારદર્શક પરીક્ષાઓ ઇચ્છીએ છીએ. પેપર લીક અને પરીક્ષા કૌભાંડનો ભોગ બનેલા દરેક પ્રભાવિત વિદ્યાર્થીને ન્યાય મળવો જ જોઈએ.
નવા પેપર લીક વિરોધી ખરડા સામે અસંતોષ:
સુપ્રિયા સુળેનું સ્પષ્ટપણેવું હતું કે સંસદમાં પસાર થયેલા નવા પેપર લીક વિરોધી ખરડાથી વિદ્યાર્થીઓ કે વિપક્ષી નેતાઓ સંતુષ્ટ નથી. ઉલ્લેખનીય છે કે, જાહેર પરીક્ષા (ગેરરીતિ નિવારણ) સુધારો ખરડો, ૨૦૨૬ આ અઠવાડિયાની શરૂઆતમાં જ સંસદના બંને ગૃહો દ્વારા પસાર કરવામાં આવ્યો છે. આ નવા કાયદામાં કડક સજાની જોગવાઈ કરવામાં આવી છે, જેમાં ઓછામાં ઓછી પાંચ વર્ષથી લઈને મહત્તમ ૧૦ વર્ષ સુધીની જેલની સજા અને ૫૦ લાખ રૂપિયા સુધીના ભારે દંડની જોગવાઈનો સમાવેશ થાય છે. છતાં ગ્રાઉન્ડ લેવલ પર વિદ્યાર્થીઓના રોષને શાંત કરવા માટે વધુ સઘન પગલાં લેવાની આવશ્યકતા પર તેમણે ભાર મૂક્યો હતો.
