મુંબઈ: બોલિવૂડના અભિનેતા સિદ્ધાર્થ મલ્હોત્રા અને એક્ટ્રેસ તમન્ના ભાટિયા સ્ટારર ફિલ્મ ‘ધ વન’નું ટ્રેલર રિલીઝ થઈ ગયું છે. ટ્રેલરમાં એક એવી રસપ્રદ દુનિયાની ઝલક જોવા મળે છે, જેમાં આસ્થા, લોકકથાઓ અને રહસ્યનું અનોખું સંયોજન જોવા મળે છે. સિદ્ધાર્થ મલ્હોત્રા અને તમન્ના ભાટિયા પોતાની આગામી ફિલ્મ ‘ધ વન’ને લઈને ચર્ચામાં છે. ફિલ્મનું ટીઝર રિલીઝ થયું ત્યારથી જ દર્શકોમાં તેના વિશે ઉત્સુકતા જોવા મળી રહી છે. તાજેતરમાં જ મેકર્સે ફિલ્મનું પહેલું ગીત ‘છઠ્ઠી મૈયા’ પણ રિલીઝ કર્યું હતું, જેને દર્શકો તરફથી સારો પ્રતિસાદ મળ્યો હતો. હવે મેકર્સે ફિલ્મનું ટ્રેલર પણ રિલીઝ કરી દીધું છે.

‘ધ વન’નું ટ્રેલર થયું રિલીઝ

‘ધ વન’ના ટ્રેલરની શરૂઆત એક રહસ્યમય જંગલથી થાય છે. આ જંગલમાં એવી અલૌકિક શક્તિઓ હોવાનો સંકેત મળે છે, જેનો સામનો સામાન્ય માણસ માટે સરળ નથી. ટ્રેલર પરથી સ્પષ્ટ થાય છે કે ફિલ્મ માત્ર સામાન્ય હોરર અથવા પૌરાણિક કથાના ફોર્મ્યુલા પર આધારિત નથી. 

તેમાં લોકકથા, ફેન્ટસી અને એડવેન્ચરનું અનોખું મિશ્રણ જોવા મળે છે. ફિલ્મની સ્ટોરી એક એવા રહસ્યમય જંગલની આસપાસ ફરે છે, જ્યાં સૂર્યાસ્ત બાદ પ્રવેશ પ્રતિબંધિત છે. ત્યાર બાદ વીર (સિદ્ધાર્થ મલ્હોત્રાના પાત્ર)ની એન્ટ્રી થાય છે. વીરને અલૌકિક શક્તિઓમાં વિશ્વાસ નથી, પરંતુ જ્યારે તેનો સામનો આ રહસ્યમય શક્તિઓ સાથે થાય છે, ત્યારે તેને પોતાની અંદર રહેલી એક અજાણી શક્તિનો અહેસાસ થાય છે.

ટ્રેલર પર યુઝર્સની પ્રતિક્રિયા

‘ધ વન’ના ટ્રેલરને સોશિયલ મીડિયા પર યુઝર્સ તરફથી પણ પ્રતિક્રિયા મળી રહી છે. એક યુઝરે લખ્યું હતું કે ‘મારો ફર્સ્ટ ડે ફર્સ્ટ શો તો કન્ફર્મ છે.' અન્ય એક યુઝરે ટ્રેલર અને તેના બેકગ્રાઉન્ડ મ્યુઝિકના વખાણ કરતાં લખ્યું કે ટ્રેલર શાનદાર છે અને તેને જોઈને રોમાંચ થઈ ગયો.એક અન્ય યુઝરે ફિલ્મના કન્સેપ્ટને ‘ભારતીય લોકકથાઓ અને મનોવૈજ્ઞાનિક રહસ્ય’નું અનોખું કોમ્બિનેશન' ગણાવ્યું હતું. 

સિદ્ધાર્થ અને તમન્ના પહેલીવાર સાથે જોવા મળશે

‘ધ વન’માં સિદ્ધાર્થ મલ્હોત્રા અને તમન્ના ભાટિયા મુખ્ય ભૂમિકામાં છે. બંને કલાકારો પહેલીવાર એકસાથે સ્ક્રીન શેર કરતા જોવા મળશે. ટ્રેલરમાં બંનેની કેમેસ્ટ્રીની પણ ઝલક જોવા મળે છે. ફિલ્મની કહાની બિહારના 16મી સદીના રહસ્યમય મંદિર વન દેવી સાથે જોડાયેલી હોવાનું જણાવવામાં આવ્યું છે. 

ફિલ્મની દુનિયાનો પરિચય ‘ધ લેજન્ડ ઑફ વન’ નામની કોમિક બુક દ્વારા પહેલેથી જ કરાવવામાં આવ્યો છે. સિદ્ધાર્થ મલ્હોત્રા અને તમન્ના ભાટિયા ઉપરાંત ફિલ્મમાં મનીષ પૉલ, શ્વેતા તિવારી, અનૂપ સોની અને સુનીલ ગ્રોવર પણ મહત્વપૂર્ણ ભૂમિકામાં જોવા મળશે. ‘ધ વન’ ફિલ્મ 25 સપ્ટેમ્બરે સિનેમાઘરોમાં રિલીઝ થશે.