મુંબઈ/નાંદેડઃ મહારાષ્ટ્રના નાંદેડ જિલ્લામાં પ્રવર્તમાન દુષ્કાળની સ્થિતિને ધ્યાનમાં રાખીને, પશુધન માટે પૂરતા પ્રમાણમાં ઘાસચારાનો પુરવઠો સુનિશ્ચિત કરવાના હેતુથી જિલ્લા વહીવટીતંત્રે 'ફોડર ફ્રેન્ડ્સ' પહેલ શરૂ કરવાની યોજના બનાવી છે. આ કાર્યક્રમનો ઉદ્દેશ્ય પશુપાલકોને આગામી મહિનાઓમાં સંભવિત અછત સામે પહોંચી વળવામાં મદદ કરવાનો છે.
રાજ્ય સરકારે રાજ્યના કુલ ૩૦૫ તાલુકાઓમાં દુષ્કાળ જાહેર કર્યો છે. નાંદેડમાં ૧૬ તાલુકાઓ આવેલા છે, જેમાંથી ૧૪ તાલુકાઓને દુષ્કાળગ્રસ્ત જાહેર કરવામાં આવ્યા છે. 'ફોડર ફ્રેન્ડ્સ' પહેલ હેઠળ, જે ખેડૂતો કે વ્યક્તિઓ પાસે પાણીની સુલભતા છે અને જેઓ પશુચારાના પાક ઉગાડવા માટે તૈયાર છે, તેમને ઓછા પાણીની જરૂર પડતી હોય તેવી ઝડપથી વિકસતી જાતોના બિયારણો વિના મૂલ્યે આપવામાં આવશે.
ખેડૂતો સૌપ્રથમ તેમણે ઉગાડેલા ઘાસચારાનો ઉપયોગ પોતાના પશુધનની જરૂરિયાતો પૂરી કરવા માટે કરશે. ત્યારબાદ, વધારાનો જથ્થો ઘાસચારાની અછતનો સામનો કરી રહ્યા હોય એવા અન્ય પશુપાલકોને ઉપલબ્ધ કરાવવામાં આવશે, તેમ કલેક્ટર રાહુલ કર્દિલે જણાવ્યું હતું.
વહીવટીતંત્ર આ પહેલનો અમલ જિલ્લાના ૧૮૨ પશુ ચિકિત્સા દવાખાનાઓ દ્વારા કરવાની યોજના ધરાવે છે, જેઓ માહિતીનો પ્રસાર કરશે અને નોંધણીની પ્રક્રિયામાં મદદ કરશે.
કર્દિલે પાણીની સુવિધા ધરાવતા ખેડૂતોને ઘાસચારાની ખેતીમાં પહેલ કરવાની અને સમગ્ર જિલ્લામાં પશુધન માટે ઘાસચારાની ઉપલબ્ધતા સુનિશ્ચિત કરવામાં યોગદાન આપવાની અપીલ કરી છે. તેમણે ખેડૂતો અને પશુપાલકોને વિલંબ વિના નજીકના પશુ ચિકિત્સાલયમાં નોંધણી કરાવવા અને ઘાસચારાની ખેતીમાં સહભાગી થવા પણ અનુરોધ કર્યો છે.