પુણે: ભરતી પ્રક્રિયામાં પારદર્શિતા અને વિવિધ પરીક્ષાઓમાં કથિત પેપર લીક અને ગેરરીતિ સામે કાર્યવાહીની માંગણી સાથે આજે પુણેમાં મોટી સંખ્યામાં એમપીએસસી ઉમેદવારોએ વિરોધ મોરચો કાઢ્યો હતો.
દેખાવકારોએ મહારાષ્ટ્ર પબ્લિક સર્વિસ કમિશન (એમપીએસસી)ના અધ્યક્ષ અને સચિવના રાજીનામા અને સ્વચ્છ છબી ધરાવતા અધિકારીઓની તાત્કાલિક નિમણૂકની માંગ કરી હતી. મોરચાના અંતે વિરોધીઓએ એમપીએસસીની કામગીરી અને પરીક્ષા પ્રક્રિયાઓ સંબંધિત માંગણીઓ ઉઠાવી હતી. એનસીપી (એસપી)ના વિધાનસભ્ય રોહિત પવાર અને કોંગ્રેસના વિધાનસભ્ય વિશ્વજીત કદમ દેખાવકારો સાથે જોડાઈ તેમની માંગણીઓને ટેકો આપ્યો હતો.
વિરોધીઓએ માંગ કરી હતી કે કમિશન આઠ દિવસની અંદર ડ્રગ ઇન્સ્પેક્ટર (ગ્રુપ-બી) પરીક્ષા અંગે ઉઠાવવામાં આવેલા વાંધાઓ અંગે સમજૂતી આપે અને કથિત ગેરરીતિની તપાસ શરૂ કરે. અન્ય માંગણીઓ ઉપરાંત, ઉમેદવારોએ 2025 રાજ્ય સેવા મુખ્ય પરીક્ષા અને કૃષિ સેવા પરીક્ષાના વર્ણનાત્મક પેપર્સના મૂલ્યાંકનમાં કથિત ભૂલોની તપાસની માંગ કરી હતી. માર્ચમાં યોજાયેલી એમપીએસસી ડ્રગ ઇન્સ્પેક્ટર (ગ્રુપ-બી) સ્ક્રીનીંગ પરીક્ષાના પ્રશ્નપત્ર લીકની તપાસ મુંબઈ ક્રાઈમ બ્રાન્ચ કરી રહી છે.
ઉમેદવારોએ અન્ય પરીક્ષાઓના પરિણામો અંગે વિદ્યાર્થીઓ દ્વારા ઉઠાવવામાં આવેલી શંકાઓની સ્વતંત્ર તપાસ અને શંકાસ્પદ પરિણામો અને સફળ ઉમેદવારોનું ફોરેન્સિક ઓડિટ કરાવવાની પણ માંગ કરી હતી.
મહારાષ્ટ્રમાં આદિવાસી વિદ્યાર્થીઓ અને નોકરી મેળવવા માગતા લોકોએ હોસ્ટેલની કંગાળ હાલત, વિદ્યાર્થીઓની સલામતી અને પરીક્ષાના પેપર લીકને લઈને વિરોધ પ્રદર્શનો કર્યા છે, જેના પગલે રાજ્ય સરકારે મુખ્ય માંગણીઓ સ્વીકારી અને એક નવી પરીક્ષા સુધારણા પેનલની સ્થાપના કરી છે.
