નવી દિલ્હીઃ ઈરાનના રાષ્ટ્રપતિ મસૂદ પેઝેશ્કિઆને જણાવ્યું હતું કે બ્રિક્સે પોતાના રાષ્ટ્રીય ચલણોમાં વેપાર વધારવો જોઈએ અને એક સમાવિષ્ટ વૈશ્વિક આર્થિક માળખા તરફ કામ કરવું જોઈએ કારણ કે વર્તમાન નાણાકીય અને વેપાર પ્રણાલીઓ પર વધુ પડતી નિર્ભરતાને કારણે ઉભરતી અર્થવ્યવસ્થાઓ રાજકીય આંચકાઓ માટે સંવેદનશીલ બની છે.

બે દિવસીય બ્રિક્સ સમિટના સમાપન સત્રમાં પોતાના સંબોધનમાં પેઝેશ્કિઆને પશ્ચિમી શક્તિઓ પર નિશાન સાધતા "એકપક્ષીય પ્રતિબંધો" ની પણ ટીકા કરી હતી અને કહ્યું હતું કે તેની સીધી અસર વૈશ્વિક ખાદ્ય સુરક્ષા અને લોકોના કલ્યાણ પર પડી રહી છે. ઈરાની નેતાની આ ટિપ્પણી અમેરિકા દ્વારા ઈરાન પર નવા આર્થિક પ્રતિબંધો લાદ્યાના અઠવાડિયા પછી આવી છે, જેનાથી બંને પક્ષો વચ્ચે ચાલી રહેલી લશ્કરી તણાવ વચ્ચે તેહરાનની આર્થિક સ્થિતિ પર દબાણ વધ્યું છે.

If Americans are warriors, let them face our valiant military forces. Why wage war on civilian infrastructure, food supplies, and livelihoods? If they're human, why deny people access to water, food, and medicine? Our people can't be bullied into submission. Iran won't surrender.

— Masoud Pezeshkian (@drpezeshkian) September 12, 2026

ઈરાનના રાષ્ટ્રપતિએ કહ્યું કે બ્રિક્સ હવે ફક્ત ઉભરતી અર્થવ્યવસ્થાઓ વચ્ચે સહકાર માટે માત્ર એક માળખું બનવાથી આગળ વધીને વધુ સંતુલિત અને સમાવિષ્ટ વિશ્વની વધતી માંગનું પ્રતિક બની ગયું છે જેમાં "કોઈપણ શક્તિ કેન્દ્રને બીજાનું ભાગ્ય નક્કી કરવાનો અધિકાર નથી". ઈરાની રાષ્ટ્રપતિએ ભાર મૂક્યો કે બ્રિક્સે હવે વધુ સંતુલિત, સમાવિષ્ટ અને ન્યાયી આંતરરાષ્ટ્રીય વ્યવસ્થાના નિર્માણમાં મોટી ભૂમિકા ભજવવી જોઈએ.

ઈરાની રાષ્ટ્રપતિએ કહ્યું કે સુરક્ષા વિના આર્થિક સ્થિતિસ્થાપકતા ટકાવી શકાતી નથી. તેમણે ઈરાન સામે અમેરિકા અને ઈઝરાયલની લશ્કરી આક્રમકતાનો ઉલ્લેખ કર્યો હતો. તેમણે કહ્યું કે ઈરાની આર્થિક, ઉર્જા અને વિકાસ માળખા પરના હુમલાઓની અસર પ્રાદેશિક અને વૈશ્વિક સ્તરે પણ થઈ શકે છે. 

પેઝેશ્કિઆને કહ્યું કે ઈરાની લોકોએ ભારે કિંમત ચૂકવી છે, જેમાં નાગરિકો માર્યા ગયા છે અને દાયકાઓથી બાંધવામાં આવેલા માળખાગત સુવિધાઓને નુકસાન થયું છે. ઈરાની રાષ્ટ્રપતિએ કહ્યું કે આંતરરાષ્ટ્રીય સમુદાયની જવાબદારી છે કે તેઓ નાગરિકોનું રક્ષણ કરે અને "નાગરિક ઠેકાણાઓ પર હુમલાઓને સામાન્ય માનવાની પ્રવૃતિ રોકે.

પેઝેશ્કિઆને બ્રિક્સ સમિટના આયોજન બદલ ભારતના લોકો અને વડાપ્રધાન નરેન્દ્ર મોદીનો આભાર માન્યો હતો અને કહ્યું કે તેની થીમ "સ્થિતિસ્થાપકતા, સહકાર અને ટકાઉપણું" છે તે રાષ્ટ્રોના ભાગ્ય વધુને વધુ એકબીજા સાથે જોડાયેલા હોય ત્યારે મૂળભૂત વૈશ્વિક જરૂરિયાતોને પ્રતિબિંબિત કરે છે.

આર્થિક પડકારો પર વાત કરતા  પેઝેશ્કિઆને કહ્યું કે મર્યાદિત નાણાકીય અને વેપાર પ્રણાલીઓ પર વધુ પડતી નિર્ભરતાને કારણે અર્થતંત્રો રાજકીય આંચકાઓ માટે સંવેદનશીલ બન્યા છે. એકપક્ષીય પ્રતિબંધોથી ખાદ્ય સુરક્ષા અને લોકોના કલ્યાણ પર સીધી અસર પડી છે. 

Thank you to all BRICS leaders for making the Delhi Summit very productive and outcome oriented! pic.twitter.com/C3DMZWGgLL

— Narendra Modi (@narendramodi) September 13, 2026

તેમણે રાષ્ટ્રીય ચલણમાં વેપાર વધારવા અને બ્રિક્સ સભ્યોની આર્થિક મજબૂતી વધારવા માટે ન્યૂ ડેવલપમેન્ટ બેન્કને મજબૂત બનાવવા માટે હાકલ કરી હતી.  ગાઝા અને લેબનોનની પરિસ્થિતિ પર પેઝેશ્કિઆને કહ્યું કે પ્રદેશના લોકો "ગુનાઓ અને નરસંહાર" ના પરિણામોનો સામનો કરી રહ્યા છે. તેમણે ઈરાનની ઊર્જા અને પરિવહન ક્ષમતાઓ પર પ્રકાશ પાડતા કહ્યું કે તેઓ બ્રિક્સ સભ્યો વચ્ચે વેપાર અને ઊર્જા કોરિડોરના વિકાસમાં ફાળો આપી શકે છે.