ન્યૂ યૉર્કઃ અમેરિકાના 23 વર્ષીય બેન શેલ્ટન (Shelton) અને સ્પેનના 23 વર્ષીય કાર્લોસ અલ્કરાઝ વચ્ચે બુધવારે રમાયેલી યુએસ ઓપનની ક્વૉર્ટર ફાઇનલ ચાર કલાક અને 28 મિનિટ સુધી ચાલી હતી અને પાંચ સેટના એ મૅરથન મુકાબલામાં ડિફેન્ડિંગ ચૅમ્પિયન અલ્કરાઝ (Alcaraz) સામે વિશ્વના ત્રીજા નંબરના પ્લેયર શેલ્ટને 5-7, 6-1, 6-3, 1-6, 10-7થી રોમાંચક વિજય મેળવ્યો હતો.

અમેરિકાના સમય અનુસાર આ મૅચ અગાઉની કેટલીક મૅચો વિલંબિત થવાને કારણે અમેરિકામાં મંગળવારે રાત્રે 11.05 વાગ્યે શરૂ થઈ હતી અને બુધવારે પરોઢિયે 3.33 કલાકે મૅચનો અંત આવ્યો હતો. યુએસ ઓપનના ઇતિહાસમાં સૌથી મોડે સુધી ચાલી હોય એવી મૅચોમાં આ નવો વિક્રમ છે. આ મૅચ મંગળવારે રાત્રે શરૂ થઈ અને બુધવારે મળસ્કે પૂરી થઈ હતી. ભારતીય સમય મુજબ આ મૅચ બુધવારે સવારે 8.35 વાગ્યે શરૂ થઈ હતી અને બપોરે 1.03 વાગ્યાની આસપાસ સમાપ્ત થઈ હતી.

અલ્કરાઝ છેલ્લી જે ગ્રેન્ડ સ્લૅમ ટૂર્નામેન્ટોમાં રમ્યો એમાં તે 18 મૅચ સુધી અપરાજિત રહ્યો હતો, પરંતુ શેલ્ટને તેની એ વિજયકૂચ રોકી દીધી હતી.

શેલ્ટને જીત્યા પછી કહ્યું, `હું ખૂબ થાકી ગયો છું. જાણે હું યુદ્ધ લડ્યો હોઉં એવું લાગી રહ્યું છે. અલ્કરાઝ ગે્રટેસ્ટ ચૅમ્પિયનોમાંથી એક છે. મને કરીઅરમાં આ મૅચ જેવી મજા અગાઉ ક્યારેય નહોતી આવી.' મહિલાઓમાં સબાલેન્કાએ લિન્ડા નૉસ્કોવાને ક્વૉર્ટરમાં 7-1, 3-6, 10-7થી હરાવી હતી.