કોરોના બાદ દુનિયા પર તોળાઈ રહ્યું છે નવા વાઈરસનું જોખમ?

આખી દુનિયાને ભરડામાં લેનારા કોરોના બાદ હવે દુનિયા પર નવા વાઈરસનું જોખમ તોળાઈ રહ્યું છે. હાલમાં કતરમાં ફિફા વર્લ્ડકપ 2022નો ફીવર છવાયેલો છે, પણ આ ફીવરની સાથે સાથે જ બીજું એક જોખમ પણ તોળાઈ રહ્યું છે આ મેચ જોવા ગયેલાં લોકો પર. આ નવા જોખમનું નામ છે કેમલ ફ્લુ. આ નવા ફ્લુ અંગે નવી એડવાયઝરી જાહેર કરવામાં આવી છે, જેમાં એવું જણાવવામાં આવ્યું અખાતના દેશો કે જ્યાં ઊંટનો સૌથી વધુ ઉપયોગ કરવામાં આવે છે ત્યાં આ નવા વાઈરસનો ફેલાવો થવાનું જોખમ વધુ છે. આ વાઈરસને કોરોના જેવો જ માનવામાં આવી રહ્યો છે, તો આવો જાણીએ આ નવા વાઈરસના લક્ષણો શું છે-
કેમલ ફ્લુ એ એક પ્રકારનો વાઈરસ છે જે ઉંટમાંથી માનવીમાં ફેલાય છે. જે દેશમાં ઉંટની સંખ્યા વધુ છે એ દેશમાં આ વાઈરસ ફેલાવવાનું જોખમ વધુ રહેલું છે. સામાન્યપણે અખાતના દેશોમાં ઉંટનો ઉપયોગ માલ-સામાનની હેરફેર અને દૂધ તેમ જ માંસ માટે કરવામાં આવે છે. આવી પરિસ્થિતિમાં આ બીમારી ફેલાવવાનું જોખમ સૌથી વધુ રહેલું છે. કતારમાં હાલમાં ફૂટબોલ વર્લ્ડકપ ચાલી રહ્યો છે અને લાખોની સંખ્યામાં ફૂટબોલપ્રેમીઓ મેચ જોવા આવ્યા છે, એટલે ત્યાં આ વાઈરસના ફેલાવવાનું જોખમ વધુ રહેલું છે.
2012માં પહેલી વખત સાઉદી અરેબિયામાં આ વાઈરસ જોવા મળ્યો હતો. આ એક પ્રકારનો શ્વસન સંબંધિત બીમારી જ છે અને તે પણ કોરોના જેવી જ એક મહામારી છે, પરંતુ તેને કોરોના કરતાં પણ વધુ જોખમી માનવામાં આવે છે. વર્લ્ડ હેલ્થ ઓર્ગેનાઈઝેશન (હુ) દ્વારા એવી ચેતવણી આપવામાં આવી છે કે માણસથી માણસમાં પણ આ વાઈરસ ફેલાઈ શકે છે અને મુખ્યત્વે તો નજીકના સંપર્કથી આ વાઈરસ ફેલાય છે.
આ વાઈરસથી કઈ રીતે બચી શકાય એ વિશે હુની એડવાઈઝરીમાં એવું જણાવવામાં આવ્યું છે કે આ બીમારીની કોઈ દવા કે વેક્સિન ઉપલબ્ધ નથી એટલે આવી પરિસ્થિતિમાં લોકોએ ઊંટથી દૂર જ રહેવું જોઈએ. આ ઉપરાંત કાચુ માંસ ખાવાનું ટાળવું જોઈએ, તેમ જ પર્સનલ હાઈજિનનું ખાસ ધ્યાન રાખવું જરુરી છે. જો તમે કોઈ પ્રાણીને અડકો છો તો ત્યાર બાદ હાથ સ્વચ્છ રીતે ધોવા જરુરી છે.