ગુજરાતને મોદીની સુવર્ણ ભેટ

દેશ વિદેશ

ઇન્ટરનેશનલ બુલ્યન એક્સ્ચેન્જનું લોકાર્પણ

લોકાર્પણ: ગાંધીનગરમાં ઇન્ટરનેશનલ બુલ્યન એક્સ્ચેન્જ અને એનએસઇ- આઇએફએસસી-એસજીએસ કનેક્ટના ઉદ્ઘાટન પ્રસંગે વડા પ્રધાન નરેન્દ્ર મોદી, ગુજરાતના મુખ્ય પ્રધાન ભૂપેન્દ્ર પટેલ, નેશનલ સ્ટોક એક્સ્ચેન્જના સીઇઓ આશિષ ચૌહાણ, કેન્દ્રનાં નિર્મલા સીતારમણ. (પીટીઆઇ)

(અમારા પ્રતિનિધિ તરફથી)
ગાંધીનગર: વડા પ્રધાન નરેન્દ્ર મોદીએ શુક્રવારે ગાંધીનગર- ગિફ્ટ સિટી ખાતે ઇન્ટરનેશનલ બુલ્યન એક્સ્ચેન્જ અને એનએસઈ-આઈએફએસઈ-એસજીએક્સ કનેક્ટને લોન્ચ કર્યું હતું. આ પ્રસંગે નાણાં પ્રધાન નિર્મલા સિતારમણ, ગુજરાતના મુખ્ય પ્રધાન ભૂપેન્દ્રભાઈ પટેલ, એનએસઈના સીઈઓ આશિષ ચૌહાણ ઉપસ્થિત રહ્યા હતા. નરેન્દ્ર મોદીએ જણાવ્યું હતું સોના પ્રત્યેનો ભારતીયોનો પ્રેમ કોઇનાથી છૂપો નથી. ગોલ્ડ આપણા સમાજ અને સાંસ્કૃતિકનો એક મહત્ત્વનો ભાગ છે. જેના કારણે ભારત આજે સોના-ચાંદીના ક્ષેત્રમાં એક મોટું બજાર છે, પરંતુ ભારતની ઓળખ માત્ર આટલી જ ન હોવી જોઇએ. ભારતની ઓળખ માર્કિંગ મેકરની પણ હોવી જોઇએ અને આ એ દિશામાં એક મહત્ત્વપૂર્ણ પગલું છે. ગોલ્ડ સાથે જોડાયેલી ઇન્ડસ્ટ્રી, જ્વેલર્સને વિસ્તાર કરવામાં મદદ કરશે. નવા અવસરનો રસ્તો ખૂલશે. તેઓ સીધા જ બુલ્યન ખરીદી શકશે અને ઇન્ટનરનેશનલ પ્રાઇસ ડિસ્કવરીમાં ભાગ લઇ શકશે. સીધા ગોલ્ડમાં ટ્રેડ કરવાની તક મળશે. ગોલ્ડ ટ્રેડિંગની માર્કેટ ઓર્ગનાઇઝડ થશે. ભારતમાં ગોલ્ડની ડિમાન્ડ અને ગોલ્ડની પ્રાઇસને પ્રભાવિત કરશે અને નિર્ધારિત પણ કરશે. આગામી દિવસમાં જે થશે તેનો પ્રભાવ વિશ્ર્વમાં થશે. તેનાથી દુનિયાને દિશા મળશે, તેમ તેમણે જણાવ્યું હતું.
આ સાથે ગિફ્ટ સિટી ખાતે બની રહેલા ઈન્ટરનેશનલ ફાયનાન્સિયલ સર્વિસિઝ સેન્ટર્સ ઓથોરિટી (આઈએફએસસીએ)ની ઈમારતના ભૂમિપૂજન કરતાં વડા પ્રધાન નરેન્દ્ર મોદીએ દેશને આર્થિક મહાશક્તિ બનાવવાનો લલકાર કર્યો હતો. આ પ્રસંગે સંબોધન આપતા મોદીએ જણાવ્યું હતું કે આજનો દિવસ મહત્ત્વનો છે. દેશ આઝાદીનો અમૃત મહોત્સવ ઉજવી રહ્યું છે. આ સેન્ટર ભારતને આર્થિક મહાશક્તિ બનાવવા અવસર ઉપલબ્ધ કરાવશે. આજે એક નવી શરૂઆત થઇ રહી છે. હવે ભારત યુએસએ, યુકે, સિંગાપુર જેવા દેશોની સાથે પહોંચ્યો છે. જ્યાંથી ગ્લોબલ ટ્રેડને દિશા આપવામાં આવે છે. તેમણે સિંગાપુરના સહયોગ બદલ અભિનંદન આપ્યા હતા. બંને દેશો વચ્ચે સંભાવનાઓની તકો ઊભી થઇ છે. પોતાના મુખ્ય પ્રધાન સમયના કાર્યકાળને યાદ કરતા તેમણે જણાવ્યું હતું કે હું ગુજરાતમાં હતો ત્યારે ગિફ્ટ સિટીની પરિકલ્પના કરી હતી. ગિફ્ટી સિટી માત્ર વેપાર પૂરતી જ કલ્પના નથી. દેશના સામાન્ય માણસોની આકાંક્ષાઓ જોડાયેલી છે. ભારતના ભવિષ્યનું વિઝન જોડાયેલું છે. ભારતના સ્વર્ણિમ અતીતના સપનાં પણ જોડાયેલા છે. જાન્યુઆરી ૨૦૧૩માં ગિફ્ટ વનનું લોકાર્પણ કર્યું હતું. ત્યારે લોકો ગુજરાતની સૌથી મોટી બિલ્ડિંગ ગણતા હતા. ઘણા વર્ષો સુધી માત્ર એ જ તેની ઓળખાણ હતી.
ગિફ્ટી સિટી એક એવો આઇડિયા હતો જે તેના સમય કરતા વધું આગળ હતો. ૨૦૦૮માં વૈશ્ર્વિક મંદીનો સમય હતો. ભારતમાં પણ મંદીની અસર જોવા મળી હતી અને પોલિસી પેરાલિસિસ જેવો માહોલ હતો. એ સમયે પણ ગુજરાત ફિનટેક ક્ષેત્રમાં નવા આયામ સર કરી રહ્યું હતું.
ગિફ્ટ સિટી કોમર્સ અને ટેક્નોલોજીનું સંગમ છે. વેલ્થ અને વિઝન બંનેને ગિફ્ટ સિટી સેલિબ્રેટ કરે છે. ગિફ્ટ સિટીથી ભારત વિશ્ર્વમાં સર્વિસ સેક્ટરમાં મજબૂત દાવેદારી સાથે આગળ વધી રહ્યું છે.
અમદાવાદ-ગાંધીનગર અને ગિફ્ટ સિટી ત્રણેય એકસાથે સંકળાયેલા છે. ત્રણેય સ્થળોની અલગ ઓળખાણ છે. અમદાવાદ ગૌરવશાળી ઇતિહાસ ધરાવે છે.
ગાંધીનગર પ્રશાસનનું કેન્દ્ર છે. ગિફ્ટ સિટી અર્થતંત્રનું પ્રમુખ કેન્દ્ર બની રહેશે. ઇઝ ઓફ ડુઇંગ અને ઇઝ ઓફ લિવિંગની કલ્પના સફળ થશે. બેહતર જીવન અને નવા વિકલ્પનું માધ્યમ બનશે. સિટીમાંથી નવા આઇડિયા આવી રહ્યાં છે. સંપત્તિનું સર્જન થઇ રહ્યું છે. ભારતના લોકો વ્યવસાય માટે સમગ્ર વિશ્ર્વમાં ફર્યા છે. વિશ્ર્વના દરેક ખૂણે ભારતના વેપારી પહોંચ્યા છે. નવું ભારત જૂના વિચારોને બદલી રહ્યું છે. પાછલા આઠેક વર્ષમાં ગરીબ માણસ પણ ઔપચારિક રીતે નાણાકીય સંસ્થાઓ સાથે જોડાઈ રહ્યો છે. આથી સમયની માગ છે કે સરકારી સંસ્થા અને ખાનગી એકમો સાથે મળી આગળ વધે. તેમણે ગિફ્ટ સિટીના વધામણા સમગ્ર રાષ્ટ્રને આપ્યા હતા.
અન્ના યુનિવર્સિટીના ૪૨મા પદવીદાન સમારંભને સંબોધન કરતા વડા પ્રધાન નરેન્દ્ર મોદીએ સ્નાતકની ડિગ્રી મેળવનાર વિદ્યાર્થીઓને શુક્રવારે અભિનંદન આપ્યા હતા અને કહ્યું હતું કે સમગ્ર વિશ્ર્વ ભારતના યુવાનો પર આશાભરી મીટ માંડી રહ્યું છે કેમ કે યુવાનો દેશ અને વિશ્ર્વના વિકાસનું એન્જિન છે.
વિદ્યાર્થીઓને સંબોધન કરતા મોદીએ કહ્યું હતું કે તમે તમારા ભવિષ્ય અંગે વિચારી જ રાખ્યું હશે અને એટલે જ આજનો દિવસ માત્ર સિદ્ધિઓનો જ નહિ, પરંતુ મહત્ત્વાકાંક્ષાઓનો પણ દિવસ છે.
માત્ર ભારત જ નહિ, સમગ્ર વિશ્ર્વ યુવાનો પર આશાભરી મીટ માંડી રહ્યું છે એમ જણાવતાં મોદીએ કહ્યું હતું કે યુવાનો તમે દેશના વિકાસનું એન્જિન છો અને ભારત વિશ્ર્વના વિકાસનું એન્જિન છે.
ભૂતપૂર્વ રાષ્ટ્રપતિ એપીજે અબ્દુલ કલામ પણ અન્ના યુનિવર્સિટી સાથે જોડાયેલા હોવાનો ઉલ્લેખ કરતા મોદીએ કહ્યું હતું કે કલામના વિચારો અને મૂલ્યો તમને હંમેશા પ્રેરણા આપતા રહેશે.
ગવર્નર આર. એન. રવી, મુખ્ય પ્રધાન એમ. કે. સ્ટાલિન, રાજ્યના ઉચ્ચ શિક્ષણ ખાતાના પ્રધાન કે. પોનમુડી સહિતના મહાનુભવોએ આ સમારંભમાં હાજરી આપી હતી.
દરમિયાન, વડા પ્રધાન નરેન્દ્ર મોદી શનિવારે નેશનલ થર્મલ પાવર કૉર્પોરેશન લિ.ની રૂ. ૫,૨૦૦ કરોડના મૂલ્યના વિવિધ ગ્રીન ઍનર્જી યોજનાઓની શિલારોપણ વિધિ કરશે.
શનિવારે દિલ્હીસ્થિત વિજ્ઞાન ભવન ખાતે યોજાનારી ડિસ્ટ્રિક્ટ લીગલ સર્વિસ ઑથોરિટીની મળનારી પ્રથમ બેઠકના ઉદ્ઘાટન સત્રને વડા પ્રધાન નરેન્દ્ર મોદી સંબોધન કરશે.
સદીમાં એકાદ વાર જોવા મળે તેવી કોરોનાની મહામારીની કટોકટીનો ભારતે જે આત્મવિશ્ર્વાસ સાથે સામનો કર્યો તે બદલ મોદીએ દેશના વૈજ્ઞાનિકો અને અન્યોનો આભાર માન્યો હતો. (એજન્સી)

 

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.