રવિવારે નરેન્દ્ર મોદી ભુજમાં: વડા પ્રધાનની મુલાકાતે શહેરના બિસ્માર બની ગયેલા માર્ગોની લીપા-પોતી શરૂ કરાવી

આપણું ગુજરાત

ભુજ: ભુજ શહેરમાં આગામી ૨૮મી ઑગસ્ટ રવિવારે દેશના વડા પ્રધાન નરેન્દ્ર મોદી તેમના આઠ વર્ષના શાસનમાં છઠ્ઠી વખત કચ્છની મુલાકાતે આવવાના છે. તેઓ ભૂકંપમાં માર્યા ગયેલાઓની યાદમાં ભુજીયા ડુંગર પર લાંબા સમયથી બની રહેલા સ્મૃતિવનના લોકાર્પણ ઉપરાંત અનેક પ્રકલ્પોનો પ્રારંભ કરશે. જોકે, નાગિરકો માટે રાહતની વાત એ છે કે મોદીની મુલાકાતને લીધે અહીંના મોટાભાગના રોડ રસ્તાનું સમારકામ શરૂ થઈ ગયું છે.
પ્રથમ તેઓ મુંદ્રા રોડ પર આવેલી કચ્છ યુનિવર્સિટીના પ્રાંગણમાં જાહેરસભાના માધ્યમથી કચ્છ અને ગુજરાતની જનતાને સંબોધન કરશે. ભુજ શહેરમાં સંભવિત વડા પ્રધાનના યોજાનારા ત્રણ કિલોમીટર લાંબા રોડ-શોને અલગ અલગ ૧૪ જેટલા ક્લસ્ટરમાં વહેંચીને પ્રત્યેક ક્લસ્ટર દીઠ કાર્યકરોની સંખ્યા અને વ્યવસ્થા માટે જુદી જુદી ટીમોને વ્યવસ્થા સોંપવામાં આવી છે.
દરમ્યાન, આ વર્ષે સરહદી કચ્છમાં સો આનીથી પણ વધુ વરસાદ થતાં સૂકા મુલકના મોટાભાગના ડેમ, નદી-નાળાં પાલર પાણીથી શોભી રહ્યા છે, તો બીજી તરફ ભુજ, ગાંધીધામ, અંજાર જેવા મોટા શહેરોમાં મુખ્ય માર્ગો સાથે આંતરિક માર્ગોની હાલત અત્યંત બિસ્માર બની છે. ગ્રામ્ય વિસ્તારોને જોડતા અનેક માર્ગોનું ધોવાણ થતાં લોકોને પારાવાર મુશ્કેલીમાં મુકાવું પડ્યું છે તેવામાં વડા પ્રધાન નરેન્દ્ર મોદી આગામી રવિવારે ભુજની ટૂંકી મુલાકાતે આવવાના હોઈ ઊંઘતા ઝડપાયેલા વહીવટીતંત્ર દ્વારા તડામાર તૈયારીઓ ચાલી રહી છે. ભુજ શહેરના ભાંગીને ભંગાર થઇ ગયેલા માર્ગો પર હાલ લીપા પોતીનું પૂરજોશથી કામ કરવામાં આવી રહ્યું છે.
ઍરપોર્ટથી ભુજીયા ડુંગરની તળેટીમાં આકાર પામી રહેલા સ્મૃતિવન વાયા કચ્છ યુનિવર્સિટીના આ ચોમાસામાં અતિબિસ્માર બની ગયેલા માર્ગોનું દિવસ- રાત જોયા વગર ‘રીપેરીંગ’ ચાલી રહ્યું છે. રિંગ રોડને સુંદર બનાવવા માટે ડિવાઈડરોમાં નિયમિત સાફ-સફાઈના અભાવે વધી ગયેલી ઝાડીઓ પણ ‘હજામત’ શરૂ થઈ ગઈ છે. ભાનુશાળી નગરથી કચ્છ યુનિવર્સીટી તરફ જતા માર્ગની સાઈડ પર રહેલા શ્રમજીવીઓના ઝૂંપડાઓ, લારી-ગલ્લાઓને પણ હટાવવાની કામગીરી શરૂ કરી દેવામાં આવી છે. ભુજના ઍરપોર્ટથી છેક સ્મૃતિવન અને સભા સ્થળ સુધીના લગભગ ૧૨ કિલોમીટરના રસ્તાની બન્ને તરફ લોકોને નડી રહેલાં અનેક દબાણોને માત્ર ત્રણ દિવસ પૂરતાં હટાવવા પોલીસ અને નગરપાલિકા દ્વારા સૂચનાઓ આપવાનું શરૂ થઇ ગયું છે.

 

1 thought on “રવિવારે નરેન્દ્ર મોદી ભુજમાં: વડા પ્રધાનની મુલાકાતે શહેરના બિસ્માર બની ગયેલા માર્ગોની લીપા-પોતી શરૂ કરાવી

  1. Dear Prime Minisrer,
    Come to Kutch frequently. Announce that you will be travelling by road. Select destinations far from cities like Bhuj and Gandhidham. This is the only way the condition of roads becomes motorable. Your visits light fire under the authorities’ feet–the way it used to when you used to camp out in Bhuj after the earthquake of 2001.
    Respectfully yours,
    Vasant Joshi

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.