નવી દિલ્હી: વડા પ્રધાન નરેન્દ્ર મોદીએ મંગળવારે દાવો કર્યો હતો કે ભારત ઉડ્ડયન ક્ષેત્રમાં ત્રીજું સૌથી મોટું બજાર બનશે. ભારતના ‘મેક ઇન ઇન્ડિયા – મેક ફોર ધ વર્લ્ડ’ વિઝન હેઠળ એરોસ્પેસ મેન્યુફેક્ચરિંગમાં ઘણી નવી તકો ખુલી રહી છે.
ટાટા સન્સના ચેરમેન એન ચંદ્રશેખરને એક ઓનલાઈન ઈવેન્ટને સંબોધતા મંગળવારે જાહેરાત કરી હતી કે એર ઈન્ડિયા એરબસ પાસેથી ૪૦ વાઈડ બોડી પ્લેન સહિત ૨૫૦ એરક્રાફ્ટ હસ્તગત કરશે. આ પ્રસંગે બોલતા વડા પ્રધાન નરેન્દ્ર મોદીએ આ સોદાની પ્રશંસા કરી હતી અને કહ્યું હતું કે ભારતના વિકસતા ઉડ્ડયન ક્ષેત્રને આગામી ૧૫ વર્ષમાં ૨,૦૦૦ થી વધુ એરક્રાફ્ટની જરૂર પડશે.
વડા પ્રધાને કહ્યું હતું કે એર ઇન્ડિયાનો અઢીસો ઍરબસ ખરીદવાનો “સીમાચિહ્નરૂપ સોદો છે અને તેનાથી ભારત અને ફ્રાન્સ વચ્ચેના ગાઢ સંબંધ તેમ જ ભારતના નાગરિક ઉડ્ડયન ક્ષેત્રની સફળતાઓ અને આકાંક્ષાને પ્રતિબિંબિત કરે છે. નાગરિક ઉડ્ડયન ક્ષેત્ર ભારતના વિકાસનો અભિન્ન ભાગ છે અને નાગરિક ઉડ્ડયન ક્ષેત્રને મજબૂત બનાવવું એ સરકારની રાષ્ટ્રીય માળખાગત નીતિનું એક મહત્ત્વપૂર્ણ પાસું છે તેમ જણાવતા તેમણે ઉમેર્યું કે છેેલ્લાં આઠ વર્ષમાં એરપોર્ટની સંખ્યા ૭૪ થી વધીને ૧૪૭ થઈ ગઈ છે. ઉડાન યોજના હેઠળ, દેશના દૂરના ભાગોને પણ ઍર કનેક્ટિવિટી દ્વારા જોડવામાં આવી રહ્યા છે, જે લોકોના આર્થિક અને સામાજિક વિકાસને વેગ આપશે અને નજીકના ભવિષ્યમાં ભારત ઉડ્ડયન ક્ષેત્રે વિશ્ર્વનું ત્રીજું સૌથી મોટું બજાર બની જશે.
ઈન્ડો-પેસિફિક ક્ષેત્રમાં સુરક્ષા અને સ્થિરતાનો મુદ્દો હોય કે પછી વૈશ્ર્વિક ખાદ્ય સુરક્ષા અને સ્વાસ્થ્ય સુરક્ષાનો મુદ્દો હોય, ભારત અને ફ્રાન્સ સાથે મળીને સકારાત્મક યોગદાન આપી રહ્યા છે. આજે, ભારત-ફ્રાન્સ ભાગીદારી આંતરરાષ્ટ્રીય વ્યવસ્થા અને બહુપક્ષીય વ્યવસ્થાની સ્થિરતા અને સંતુલન સુનિશ્ર્ચિત કરવામાં મુખ્ય ભૂમિકા ભજવી રહી છે, એમ તેમણે જણાવ્યું હતું. (પીટીઆઈ)
————–
એર ઈન્ડિયા એરબસ પાસેથી ૨૫૦ વિમાન ખરીદશે
નવી દિલ્હી: ટાટા ગ્રૂપની માલિકીની એર ઈન્ડિયા એરબસ પાસેથી ૪૦ વાઈડ બોડી એ૩૫૦ પ્લેન અને ૨૧૦ નેરો બોડી એરક્રાફ્ટ ખરીદશે, એમ ટાટા સન્સના ચેરમેન એન. ચંદ્રશેખરને મંગળવારે જણાવ્યું હતું. વડા પ્રધાન નરેન્દ્ર મોદી અને ફ્રાન્સના રાષ્ટ્રપતિ ઇમેન્યુઅલ મેક્રોન સહિત અન્ય લોકોની હાજરીમાં આયોજિત વર્ચ્યુઅલ ઇવેન્ટ દરમિયાન, ચંદ્રશેખરને જણાવ્યું હતું કે એરક્રાફ્ટના સંપાદન માટે એરબસ સાથે ઇરાદા પત્ર પર હસ્તાક્ષર કરવામાં આવ્યા છે. વાઈડ બોડી એરક્રાફ્ટનો ઉપયોગ અલ્ટ્રા લોંગ ફ્લાઈટ્સ માટે કરવામાં આવશે. ટાટા ગ્રૂપે જાન્યુઆરીમાં એર ઈન્ડિયાને હસ્તગત કરી હતી.ઉ
ભારત ઉડ્ડયન ક્ષેત્રમાં ત્રીજું સૌથી મોટું બજાર બનશે: મોદી
