વિશ્ર્વ બજારથી વિપરીત સોનામાં ₹ ૭૭ની નરમાઈ, ચાંદી ₹ ૪૨૫ ઘટી

(વાણિજ્ય પ્રતિનિધિ તરફથી)
મુંબઈ: વૈશ્ર્વિક વિનિમય બજારમાં ડૉલર ઈન્ડેક્સમાં નરમાઈનું વલણ રહેતાં આજે લંડન ખાતે સોનાના ભાવમાં સુધારાતરફી વલણ રહ્યું હતું. એકંદરે રોકાણકારોની નજર આવતીકાલના અમેરિકી ફેડરલના અધ્યક્ષ જૅરૉમ પૉવૅલનાં બ્રૂકિંગ્સ ઈન્સ્ટિટયુશન ખાતેનાં વક્તવ્ય પર સ્થિર થઈ હોવાથી તેઓની લેવાલી મર્યાદિત રહી હતી. વધુમાં આજે વિશ્ર્વ બજારમાં ડૉલર નબળો પડ્યો હોવા છતાં ક્રૂડતેલના ભાવમાં તેજીનું વલણ રહેતાં રૂપિયો બેતરફી વધઘટે અથડાઈને અંતે સાધારણ ચાર પૈસાના ઘટાડા સાથે બંધ રહ્યો હતો. તેમ જ સાર્વત્રિક સ્તરેથી માગ મર્યાદિત રહેતાં વિશ્ર્વ બજારથી વિપરીત સ્થાનિકમાં સોનાના ભાવમાં ૧૦ ગ્રામદીઠ રૂ. ૭૬થી ૭૭નો અને ચાંદીના ભાવમાં કિલોદીઠ રૂ. ૪૨૫નો ઘટાડો આવ્યો હતો.
આજે ખાસ કરીને .૯૯૯ ટચ ચાંદીમાં સ્ટોકિસ્ટોની સટ્ટાકીય વેચવાલીના દબાણ ઉપરાંત જ્વેલરી ઉત્પાદકો અને ઔદ્યોગિક વપરાશકારોની લેવાલી ખપપૂરતી રહેતાં ભાવ કિલોદીઠ રૂ. ૪૨૫ના ઘટાડા સાથે રૂ. ૬૧,૬૮૫ના મથાળે રહ્યા હતા. તે જ પ્રમાણે સોનામાં પણ જ્વેલરી ઉત્પાદકો, સ્ટોકિસ્ટો અને રોકાણકારો નવી લેવાલીથી દૂર રહ્યા હતા, પરંતુ રિટેલ સ્તરની લેવાલી ખપપૂરતી જળવાઈ રહેતા વિશ્ર્વ બજારથી વિપરીત ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૭૬ ઘટીને રૂ. ૫૨,૫૬૪ અને ૯૯.૯ ટચ સ્ટાન્ડર્ડ સોનાના ભાવ રૂ. ૭૭ ઘટીને રૂ. ૫૨,૭૭૫ના મથાળે રહ્યા હતા. અમેરિકી ફેડરલ રિઝર્વના બે અધિકારીઓ જેમ્સ બુલાર્ડ અને જ્હોન વિલિયમ્સે ફૂગાવા સામેની લડત લાંબી ચાલશે, એવું જણાવતાં ગઈકાલે ન્યૂ યોર્ક મર્કન્ટાઈલ એક્સચેન્જ ખાતે સોનાના ભાવમાં એક ટકા જેટલો ઘટાડો આવી ગયો હતો. જોકે, આજે ડૉલર ઈન્ડેક્સ ૦.૪ ટકા જેટલો નબળો પડતાં લંડન ખાતે સત્રના આરંભે હાજર તથા વાયદામાં સોનાના ભાવ ગઈકાલના બંધથી ૦.૮ ટકા વધીને અનુક્રમે ઔંસદીઠ ૧૭૫૫.૪૦ ડૉલર અને ૧૭૫૩.૯૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૧.૭ ટકા વધીને ઔંસદીઠ ૨૧.૨૬ ડૉલર આસપાસ ક્વૉટ થઈ રહ્યા હતા.
જો આવતીકાલના વક્તવ્યમાં ફેડરલના અધ્યક્ષ વ્યાજદરમાં વધારા અંગે આક્રમક અભિગમ અપનાવવાનો અણસાર આપશે તો ડૉલર ઈન્ડેક્સ મજબૂત થતાં સોનાના ભાવ ફરી દબાણ હેઠળ આવશે અને જો હળવા અભિગમનો અણસાર આપશે તો સોનામાં સુધારાતરફી વલણ જોવા મળશે, એવું વિશ્ર્લેષકોનું માનવું છે. વધુમાં સોનાના વૈશ્ર્વિક અગ્રણી વપરાશકાર દેશ ચીનમાં સરકારે કોવિડ-૧૯ના પ્રસાર નિયંત્રણમાં રાખવા અપનાવેલી ઝીરો ટોલરન્સ પૉલિસીનાં વિરોધમાં બીજિંગ અને શાંઘાઈમાં થઈ રહેલા દેખાવોને ડામવા ભારે સલામતી ગોઠવવામાં આવી હોવાના અહેવાલ હતા.