ગુજરાતમાં કોવિડ-19ની બન્ને રસી લેનારા 5.4 કરોડ લોકોમાંથી ત્રીજો એટલે કે બુસ્ટર ડોઝ માત્ર 1.96 કરોડ લોકોએ લીધો છે જે 36 ટકા થાય છે. જોકે બુસ્ટર ડોઝ લેનારાઓની રાષ્ટ્રિય સરેરાશ ટકાવારી માત્ર 24 ટકા છે અને દેશમાં સૌથી વધારે બુસ્ટર ડોઝ લેનારા રાજ્યોમાં ગુજરાતે પાંચમે સ્થાને છે, તેવી માહિતી લોકસભામાં રજૂ કરાયેલા આંકડા પરથી મળી છે.
લોકસભામાં રજૂ કરાયેલા આંકડા પરથી જાણવા મળે છે કે બુસ્ટર ડોઝ લેનારા રાજ્યોમાં તેલંગણા 43 ટકા સાથે ટોચ પર છે. તેના પછી બીજો નંબર ઓડિશા 40 ટકા, આંધ્ર પ્રદેશ 39 ટકા, છત્તીસગઢ અને હિમાચલ પ્રદેશ 37 ટકા સાથે ચોથા નંબર પર છે. ગુજરાત પછી ઉત્તર પ્રદેશ 27 ટકા, પશ્ચિમ બંગાળ અને મધ્ય પ્રદેશ 24 ટકા અને બિહારમાં 23 ટકા લોકોએ બુસ્ટર ડોઝ લીધો હતો.
રાજ્યના આરોગ્ય વિભાગના સૂત્રોએ જણાવ્યું હતું કે ગત ડિસેમ્બર મહિનામાં કોરોનાના કેસ વધતા લોકોએ બુસ્ટર ડોઝ લીધો હતો. પરંતુ પછીથી કેસોની સંખ્યા નહિવત થતાં લોકોએ બુસ્ટર ડોઝ લીધા નથી. ખાસ કરીને શહેરી વિસ્તારોમાં લોકો બુસ્ટર ડોઝ લેવામાં ઉદાસીન રહ્યા હતા પરંતુ ગ્રામ્ય વિસ્તારોમાં પ્રમાણમાં વધુ લોકોએ બુસ્ટર ડોઝ લીધો હતો.