ભારત-ઓસ્ટ્રેલિયાની ટીમો ઈન્દોરમાં ત્રીજી ટેસ્ટ મેચ રમી રહી છે, આ દરમિયાન ICCએ તાજેતરની ટેસ્ટ રેન્કિંગ જાહેર કરી છે. ભારતના સ્ટાર ઓફ સ્પિનર રવિચંદ્રન અશ્વિન પુરુષો માટે તાજેતરની ICC ટેસ્ટ બોલિંગ રેન્કિંગમાં ટોચના સ્થાને પહોંચી ગયો છે. તેણે જેમ્સ એન્ડરસનને પાછળ છોડી દીધો છે. અશ્વિને તેના તાજેતરના પ્રદર્શનના કારણે આ સ્થાન હાંસલ કર્યું હતું. તેણે ઓસ્ટ્રેલિયા સામેની વર્તમાન શ્રેણીની બીજી ટેસ્ટમાં ભારતની જોરદાર જીતમાં 6 વિકેટ (3/57 અને 3/59) લીધી હતી. તેને બે સ્થાનનો ફાયદો થયો છે. વેલિંગ્ટન ટેસ્ટમાં ન્યૂઝીલેન્ડ સામે ઈંગ્લેન્ડની હાર બાદ એન્ડરસન બીજા સ્થાને આવી ગયો હતો.
36 વર્ષીય અશ્વિને પ્રથમ વખત 2015માં નંબર-1 ટેસ્ટ બોલર બનવાનું ગૌરવ પ્રાપ્ત કર્યું હતું. આ પછી તે ઘણી વખત ટોપ પર આવી ચુક્યો છે. દિલ્હીમાં ભારતની જીતમાં અશ્વિને મોટી વિકેટ લીધી હતી. તેણે પ્રથમ દાવની એક જ ઓવરમાં માર્નસ લાબુશેન અને સ્ટીવ સ્મિથને પરત કર્યા. આ પછી અશ્વિને એલેક્સ કેરીને ખાતું ખોલાવ્યા વગર જ પેવેલિયન મોકલી દીધો હતો. બીજા દાવમાં, ઓલરાઉન્ડર ઓફ-સ્પિનરે ફરીથી ટોચની પાંચમાંથી ત્રણ વિકેટ લીધી, જ્યારે તેના સ્પિન-બોલિંગ પાર્ટનર રવિન્દ્ર જાડેજાએ બીજા છેડે ઓસ્ટ્રેલિયાના બાકીના પ્લેયરોને પેવેલિયનમાં ધકેલી દીધા હતા. ઓસ્ટ્રેલિયા સામે ચાલી રહેલી બોર્ડર-ગાવસ્કર ટ્રોફી શ્રેણીમાં બાકીની બે ટેસ્ટ મેચોમાં શાનદાર પ્રદર્શન કરીને અશ્વિન પાસે નંબર-1 પર રહેવાની તક છે.
અશ્વિનના હાલમાં 864 રેટિંગ પોઈન્ટ્સ છે જ્યારે જેમ્સ એન્ડરસનના 859 રેટિંગ પોઈન્ટ્સ છે. છેલ્લા ત્રણ સપ્તાહમાં અશ્વિન ત્રીજો બોલર છે જે ટેસ્ટ રેન્કિંગમાં ટોચ પર પહોંચ્યો છે. ગત વખતે એન્ડરસને ઓસ્ટ્રેલિયાના કેપ્ટન પેટ કમિન્સને હરાવીને ટોચનું ન મેળવ્યું હતું. કમિન્સ તાજેતરની રેન્કિંગમાં ત્રીજા સ્થાને છે. ઓસ્ટ્રેલિયા સામેની બીજી ટેસ્ટમાં 10 વિકેટ ઝડપનાર જાડેજા બોલિંગ રેન્કિંગમાં પણ 8મા સ્થાને પહોંચી ગયો છે. જાડેજા અને અશ્વિન ટેસ્ટ ઓલરાઉન્ડર રેન્કિંગમાં પ્રથમ બે સ્થાન પર છે. એટલે હવે ટેસ્ટ બોલરોની રેન્કિંગમાં ત્રણ ભારતીય ખેલાડીઓ ટોપ-10માં છે. જસપ્રીત બુમરાહ હવે નંબર-4 પર પહોંચી ગયો છે, તેના સિવાય જાડેજા પણ નંબર-8 પર છે.
