વૈશ્ર્વિક સોનું ત્રણ મહિનાની ટોચેથી પાછું ફર્યું છતાં રૂપિયો નબળો પડતાં સ્થાનિકમાં ₹ ૧૪૯ની આગેકૂચ

(વાણિજ્ય પ્રતિનિધિ તરફથી)
મુંબઈ: ગત ઑક્ટોબર મહિનામાં અમેરિકા ખાતે ફુગાવામાં અપેક્ષા કરતાં વધુ ઘટાડો આવ્યો હોવા છતાં ફેડરલ રિઝર્વ ફુગાવાને ડામવા માટે આક્રમક અભિગમ જાળવી રાખે તેવા સંકેત આપતાં આજે લંડન ખાતે સત્રના આરંભે સોનાના ભાવ ત્રણ મહિનાની ઊંચી સપાટીએથી પાછાં ફર્યા હતા. જોકે, સ્થાનિક ફોરેક્સ માકેટમાં આજે ડૉલર સામે રૂપિયો ૪૮ પૈસા ગબડ્યો હોવાથી સોનાની આયાત પડતરમાં વધારો થવાને કારણે સ્થાનિકમાં વિશ્ર્વ બજારથી વિપરીત સોનાના ભાવમાં ૧૦ ગ્રામદીઠ રૂ. ૧૪૮થી ૧૪૯ની આગેકૂચ જળવાઈ રહી હતી, જ્યારે ચાંદીના ભાવ કિલોદીઠ રૂ. ૨૨૯ વધી આવ્યા હતા.
બજારનાં સાધનોના જણાવ્યાનુસાર આજે એકંદરે વિશ્ર્વ બજારમાં નરમાઈના સંકેત હોવા છતાં સ્થાનિકમાં નબળા રૂપિયાને ટેકે સોના-ચાંદીમાં આગેકૂચ જોવા મળી હતી. તેમ જ આજે સોનામાં વધ્યા મથાળેથી રિટેલ સ્તરની તેમ જ જ્વેલરી ઉત્પાદકોની માગ ખપપૂરતી રહેવાની સાથે રોકાણકારો અને સ્ટોકિસ્ટો નવી લેવાલીથી દૂર રહેતાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૪૮ વધીને રૂ. ૫૨,૨૨૦ અને ૯૯.૯ ટચ સ્ટાન્ડર્ડ સોનાના રૂ. ૧૪૯ વધીને રૂ. ૫૨,૪૩૦ના મથાળે રહ્યા હતા. વધુમાં આજે .૯૯૯ ટચ ચાંદીમાં સ્ટોકિસ્ટોની નવી લેવાલીનો અભાવ હતો, પરંતુ ઔદ્યોગિક વપરાશકારો અને જ્વેલરી ઉત્પાદકોની માગને ટેકે ભાવ કિલોદીઠ રૂ. ૨૨૯ના સુધારા સાથે રૂ. ૬૧,૫૮૩ના મથાળે રહ્યા હતા.
ગત ગુરુવારે અમેરિકા ખાતે ફુગાવો શાંત પડી રહ્યો હોવાના સંકેત મળવાની સાથે ફેડરલ રિઝર્વ વ્યાજદરમાં વધારા માટે આક્રમક અભિગમ નહીં અપનાવે એવો આશાવાદ સપાટી પર આવતા ડૉલર ઈન્ડેક્સમાં નરમાઈ અને સોનામાં તેજીનું વલણ જોવા મળ્યું હતું અને ભાવ વધીને ત્રણ મહિનાની ઊંચી સપાટીએ પહોંચ્યા હતા. જોકે, ગઈકાલે (રવિવારે) ફેડરલ રિઝર્વના ગવર્નર ક્રિસ્ટોફર વૉલરે જણાવ્યું હતું કે ફેડરલ રિઝર્વ તેની આગામી બેઠકમાં ભવિષ્યમાં વ્યાજદરમાં ધીમો વધારો કરવાની શક્યતા અંગે કદાચ વિચારણા કરે, પરંતુ ફુગાવા ડામવાની લડતમાં વધુ નમતું જોખે તેવી શક્યતા નથી.
આમ વૉલરના આ નિવેદન પશ્ર્ચાત્ ડૉલર ઈન્ડેક્સ ત્રણ મહિનાની નીચી સપાટીએથી ૦.૫ ટકા વધ્યો હતો. તેમ જ અમેરિકી ટ્રેઝરીની યિલ્ડ પણ એક મહિનાની નીચી સપાટીએથી પાછી ફરતાં લંડન ખાતે સત્રના આરંભે હાજરમાં સોનાના ભાવ આગલા બંધથી ૦.૬ ટકા ઘટીને ઔંસદીઠ ૧૭૬૦.૪૯ ડૉલર અને વાયદામાં ભાવ ૦.૩ ટકા ઘટીને ઔંસદીઠ ૧૭૬૩.૫૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ આગલા બંધથી ૦.૨ ટકા ઘટીને ઔંસદીઠ ૨૧.૬૩ ડૉલર આસપાસ ક્વૉટ થઈ રહ્યા હતા.