Homeદેશ વિદેશસોનામાં રૂ. ૨૦૧ અને ચાંદીમાં રૂ. ૩૭૭ની પીછેહઠ

સોનામાં રૂ. ૨૦૧ અને ચાંદીમાં રૂ. ૩૭૭ની પીછેહઠ

(વાણિજ્ય પ્રતિનિધિ તરફથી)
મુંબઈ: લંડન ખાતે આજે સત્રના આરંભે હાજરમાં સોનાના ભાવ સાંકડી વધઘટે અથડાઈને ટકેલા રહ્યા હતા. જોકે, આજે પણ રોકાણકારોનો નવી લેવાલીમાં સાવચેતીનો અભિગમ રહ્યો હોવાથી ફેડરલ રિઝર્વ આક્રમક ધોરણે વ્યાજદરમાં વધારો કરે તેવા દબાણ હેઠળ ડૉલર ઈન્ડેક્સની મજબૂતી સાથે સતત સાતમાં મહિનામાં આજે વૈશ્ર્વિક સોનાના ભાવમાં ઘટાડો આગળ ધપે તેવી શક્યતા સૂત્રો વ્યક્ત કરી રહ્યા છે. આમ વૈશ્ર્વિક નિરુત્સાહી અહેવાલ ઉપરાંત સ્થાનિક ફોરેક્સ માર્કેટમાં આજે આ અહેવાલ લખાઈ રહ્યો છે ત્યારે ડૉલર સામે રૂપિયામાં સાધારણ ત્રણ પૈસાનો સુધારો દર્શાવાઈ રહ્યો હોવાથી સોનાની આયાત પડતરોમાં ઘટાડો થવાની શક્યતાને ધ્યાનમાં લેતા સ્થાનિક ઝવેરી બજારમાં મધ્યસત્ર દરમિયાન સોનાના ભાવમાં ૧૦ ગ્રામદીઠ રૂ. ૨૦૦થી ૨૦૧નો અને ચાંદીના ભાવમાં કિલોદીઠ રૂ. ૩૭૭નો ઘટાડો આવ્યો હતો.
બજારનાં સાધનોના જણાવ્યાનુસાર આજે મધ્યસત્ર દરમિયાન સોનામાં સ્ટોકિસ્ટો અને રોકાણકારોનો નવી લેવાલીમાં અભાવ તેમ જ જ્વેલરી ઉત્પાદકો તથા રિટેલ સ્તરની લેવાલી પણ ખપપૂરતી મર્યાદિત રહેતાં હાજરમાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૨૦૦ ઘટીને રૂ. ૫૦,૧૦૦ અને ૯૯.૯ ટચ સ્ટાન્ડર્ડ સોનાના રૂ. ૨૦૧ ઘટીને રૂ. ૫૦,૩૦૧ના મથાળે રહ્યા હતા. વધુમાં આજે .૯૯૯ ટચ ચાંદીમાં વૈશ્ર્વિક નિરુત્સાહી અહેવાલે સ્ટોકિસ્ટોની વેચવાલીનું દબાણ ઉપરાંત ઔદ્યોગિક વપરાશકારો અને જ્વેલરી ઉત્પાદકોની માગ ખપપૂરતી મર્યાદિત રહેતાં ભાવ કિલોદીઠ રૂ. ૩૭૭ના ઘટાડા સાથે રૂ. ૫૭,૦૪૨ના મથાળે ક્વૉટ થઈ રહ્યા હતા.
દરમિયાન આવતીકાલથી શરૂ થઈ રહેલી અમેરિકી ફેડરલ રિઝર્વની બે દિવસીય નીતિવિષયક બેઠક પર રોકાણકારોની નજર હોવાથી આજે લંડન ખાતે સત્રના આરંભે રોકાણકારોએ સોનામાં નવી લેવાલીમાં સાવચેતીનો અભિગમ અપનાવતા હાજરમાં ભાવ સાંકડી વધઘટે અથડાઈને ઔંસદીઠ ૧૬૪૩.૧૩ ડૉલર આસપાસ ક્વૉટ થઈ રહ્યા હતા, જ્યારે વાયદામાં ભાવ આગલા બંધથી ૦.૧ ટકાના સુધારા સાથે ઔંસદીઠ ૧૬૪૬.૯૦ ડૉલર આસપાસ અને હાજરમાં ચાંદીના ભાવ આગલા બંધથી ૦.૪ ટકા ઘટીને ઔંસદીઠ ૧૯.૧૬ ડૉલર આસપાસ ક્વૉટ થઈ રહ્યા હતા.
આવતીકાલથી શરૂ થઈ રહેલી બે દિવસની નીતિવિષયક બેઠકના અંતે ફેડરલ રિઝર્વ વ્યાજદરમાં કેટલો વધારો કરશે અને ભવિષ્યમાં વ્યાજદરમાં વધારો કરવા અંગે કેવા અણસાર આપે છે તેના પર બજાર વર્તુળોની નજર હોવાનું આઈજી માર્કેટનાં સ્ટ્રેટેજિસ્ટે જણાવતાં ઉમેર્યું હતું કે હાલને તબક્કે સોનામાં તેજીનું વલણ જોવા મળે તેવી શક્યતા બહુ પાતળી છે. આથી જ રોકાણકારોની સોનામાં વેચવાલીનું દબાણ રહે છે. પ્રાપ્ત આંકડાકીય માહિતી અનુસાર ગત શુક્રવારે વિશ્ર્વમાં સોનાના સૌથી મોટા એક્સ્ચેન્જ ટ્રેડેડ ફંડ એસપીડીઆર ગોલ્ડ ટ્રસ્ટનું સોનાનું હૉલ્ડિંગ આગલા દિવસની તુલનામાં ૦.૨૮ ટકા ઘટીને માર્ચ ૨૦૨૦ પછીની સૌથી નીચી ૯૨૨.૫૯ ટનની સપાટીએ રહ્યું હતું. અમુક વિશ્ર્લેષકોના મતાનુસાર હાલમાં વૈશ્ર્વિક સોના માટે ઔંસદીઠ ૧૬૩૯ ડૉલરની સપાટી મહત્ત્વની ટેકાની સપાટી પુરવાર થાય તેમ છે, જ્યારે વધીને ૧૬૫૩થી ૧૬૬૧ ડૉલર સુધી પહોંચે તેવી શક્યતા નકારી ન શકાય.

 

RELATED ARTICLES

Most Popular