સોનામાં ઘટ્યા મથાળેથી રૂ. ૪૧૨નો અને ચાંદીમાં રૂ. ૧૨૧૨નો ચમકારો

(વાણિજ્ય પ્રતિનિધિ તરફથી)
મુંબઈ: અમેરિકી ફેડરલ રિઝર્વની છેલ્લી નીતિવિષયક બેઠકની આજે મોડી સાંજે જાહેર થનારી મિનિટ્સ પૂર્વે ડૉલર ઈન્ડેક્સમાં નરમાઈનું વલણ રહેતાં લંડન ખાતે સત્રના આરંભે સોના-ચાંદીના ભાવમાં ઘટ્યા મથાળેથી ધીમો સુધારો જોવા મળ્યો હતો. આમ વૈશ્ર્વિક પ્રોત્સાહક અહેવાલ સાથે સ્થાનિક ઝવેરી બજારમાં સપ્તાહના આરંભે સ્ટોકિસ્ટો અને રોકાણકારોની છૂટીછવાઈ લેવાલી ઉપરાંત નીચા મથાળેથી જ્વેલરી ઉત્પાદકોની માગને ટેકે મધ્યસત્ર દરમિયાન ચાંદીના ભાવમાં કિલોદીઠ રૂ. ૧૨૧૨નો અને સોનાના ભાવમાં ૧૦ ગ્રામદીઠ રૂ. ૪૧૦થી ૪૧૨નો ચમકારો આવ્યો હતો. જોકે, આજે આ અહેવાલ લખાઈ રહ્યો છે ત્યારે સ્થાનિક ફોરેક્સ માર્કેટમાં ડૉલર સામે રૂપિયામાં ૧૭ પૈસાનો સુધારો દર્શાવાઈ રહ્યો હોવાથી સ્થાનિકમાં સોનાની આયાત પડતરમાં થનારા અપેક્ષિત ઘટાડાને ધ્યાનમાં લેતાં સોનામાં સુધારો મર્યાદિત રહ્યો હતો.
બજારનાં સાધનોના જણાવ્યાનુસાર આજે સ્થાનિક ઝવેરી બજારમાં મધ્યસત્ર દરમિયાન ખાસ કરીને સોનામાં ઘટ્યા મથાળેથી સ્ટોકિસ્ટો અને રોકાણકારોની છૂટીછવાઈ લેવાલી ઉપરાંત જ્વેલરી ઉત્પાદકો અને પ્રવર્તમાન લગ્નસરાની રિટેલ સ્તરની માગનો ટેકો મળતાં હાજરમાં ૯૯.૫ ટચ સ્ટાન્ડર્ડ સોનાના ભાવ રૂ. ૪૧૦ વધીને રૂ. ૫૬,૩૬૦ અને ૯૯.૯ ટચ સ્ટાન્ડર્ડ સોનાના રૂ. ૪૧૨ વધીને રૂ. ૫૬,૫૮૭ પ્રતિ ૧૦ ગ્રામના મથાળે રહ્યા હતા. તે જ પ્રમાણે .૯૯૯ ટચ ચાંદીમાં સ્ટોકિસ્ટોની સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૧૨૧૨ વધીને ફરી રૂ. ૬૫,૦૦૦ની સપાટી પાર કરીને રૂ. ૬૫,૭૧૨ના મથાળે રહ્યા હતા.
દરમિયાન આજે મોડી સાંજે અમેરિકી ફેડરલ રિઝર્વની છેલ્લની નીતિ વિષયક બેઠકની જાહેર થનારી મિનિટ્સમાં આગામી વ્યાજદરમાંં વધારા અંગે કેવું વલણ અપનાવવામાં આવશે તેના અણસારની રાહે આજે લંડન ખાતે સત્રના આંભે હાજરમાં સોનાના ભાવ સાંકડી વધઘટે અથડાઈને આગલા બંધથી સાધારણ ૦.૧ ટકા વધીને ઔંસદીઠ ૧૮૪૪.૨૪ ડૉલર અને વાયદામાં ભાવ ૦.૨ ટકાના વધારા સાથે ૧૮૫૩.૧૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ આગલા બંધથી ૦.૨ ટકા વધીને ઔંસદીઠ ૨૧.૭૬ ડૉલર આસપાસ ક્વૉટ થઈ રહ્યા હતા.
તાજેતરમાં જાહેર થયેલા અમેરિકાના આર્થિક ડેટાઓ પ્રોત્સાહક હોવાથી ફુગાવો વધવાની શક્યતાને ધ્યાનમાં લેતાં બજાર વર્તુળો અમેરિકી ફેડરલ રિઝર્વ વ્યાજદર વધારવામાં પુન: આક્રમક અભિગમ અપનાવે તેવી શક્યતા સપાટી પર આવતાં સોનાના ભાવ દબાણ હેઠળ આવી રહ્યા હોવાનું જિઓજીત ફાઈનાન્સિયલ સર્વિસીસના કૉમૉડિટી રિર્સ હેડે જણાવતા ઉમેર્યું હતું કે આગામી ટૂંકા સમયગાળા દરમિયાન સોનાના ભાવમાં નરમાઈતરફી વલણ જળવાઈ રહે તેવી શક્યતા નકારી ન શકાય.