સોનામાં રૂ. ૬૨નો ઘસરકો, ચાંદી વધુ રૂ. ૨૦૬ ઘટી

બિઝનેસ

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વ દ્વારા વ્યાજદરમાં વધુ આક્રમક ધોરણે વધારો કરવામાં આવે તેવી શક્યતા અને તેને કારણે આર્થિક વૃદ્ધિ પણ ખોરંભાઈ જવાની ભીતિ સાથે આજે અમેરિકી ટ્રેઝરીની યિલ્ડમાં વધારો થવાથી વૈશ્ર્વિક બુલિયન માર્કેટમાં આજે સોનાના ભાવમાં ટકેલું વલણ રહ્યું હતું, જ્યારે ચાંદીના ભાવમાં ધીમો સુધારો આવ્યો હતો. જોકે, સ્થાનિક ઝવેરી બજારમાં આજે મધ્ય સત્ર દરમિયાન બન્ને કીંમતી ધાતુઓમાં સ્ટોકિસ્ટોની છૂટીછવાઈ વેચવાલી સામે નવી લેવાલીનો અભાવ રહેતાં સોનાના ભાવ ૧૦ ગ્રામદીઠ રૂ. ૬૨ અને ચાંદીના ભાવ કિલોદીઠ રૂ. ૨૦૬ ઘટીને ક્વૉટ થઈ રહ્યા હતા.

બજારનાં સાધનોના જણાવ્યાનુસાર આજે મધ્ય સત્ર દરમિયાન ખાસ કરીને .૯૯૯ ટચ ચાંદીમાં સ્ટોકિસ્ટોની વેચવાલીના દબાણ સામે નવી લેવાલીનો અભાવ તેમ જ ઔદ્યોગિક વપરાશકારો અને જ્વેલરી ઉત્પાદકોની માગ ખપપૂરતી મર્યાદિત રહેતાં ભાવ કિલોદીઠ રૂ. ૨૦૬ ઘટીને રૂ. ૬૦,૭૭૩ની સપાટીએ રહ્યા હતા. વધુમાં આજે સોનામાં પણ સ્ટોકિસ્ટો અને જ્વેલરી ઉત્પાદકોની લેવાલી નિરસ રહેવા ઉપરાંત ઔદ્યોગિક વપરાશકારો અને રિટેલ સ્તરની માગ ખપપૂરતી મર્યાદિત રહેતાં ભાવ ૧૦ ગ્રામદીઠ રૂ. ૬૨ ઘટીને ૯૯.૫ ટચ સ્ટાન્ડર્ડ સોનાના રૂ. ૫૦,૭૩૯ અને ૯૯.૯ ટચ સ્ટાન્ડર્ડ સોનાના રૂ. ૫૦,૯૪૩ના મથાળે રહ્યા હતા.

ક્રૂડતેલના ભાવ વધારા સાથે વૈશ્ર્વિક સ્તરે ફુગાવામાં થઈ રહેલા વધારાને અંકુશમાં રાખવા માટે વૈશ્ર્વિક કેન્દ્રવર્તી બૅન્કોએ વ્યાજદરમાં વધારા કરવા સહિત ઘણાં આશ્ર્ચર્યજનક પગલાંઓ લેતા ડૉલર ઈન્ડેક્સમાં આજે ઊંચા મથાળેથી સાધારણ ઘટાડો આવ્યો હતો, પરંતુ અમેરિકી ટ્રેઝરીની યિલ્ડ ઊંચી સપાટીએ રહેતાં લંડન ખાતે સત્રના આરંભે હાજરમાં સોનાના ભાવ ઔંસદીઠ ૧૮૩૮.૨૬ ડૉલર અને વાયદામાં ભાવ ૧૮૩૯.૯૦ ડૉલર આસપાસની સપાટીએ ટકેલા રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૦.૩ ટકા વધીને ઔંસદીઠ ૨૧.૬૫ ડૉલર આસપાસ ટકેલા રહ્યા હતા.

એકંદરે હાલના તબક્કે રોકાણકારોની નજર આ સપ્તાહના અંતમાં અમેરિકી ફેડરલ રિઝર્વના અધ્યક્ષ જૅરૉમ પૉવૅલના વક્તવ્ય પર સ્થિર થઈ છે. આ વક્તવ્યમાં ફેડરલ રિઝર્વ લાંબાગાળાની નીતિ અંગે સ્પષ્ટ સંકેતો આપે તેવો આશાવાદ રોકાણકારો સેવી રહ્યા છે. વિશ્ર્લેષકોના મતાનુસાર વ્યાજદરમાં કરવામાં આવેલા વધારાની જો અર્થતંત્ર પર માઠી અસર પડી રહી છે, એવા નિર્દેશો મળે તો જ સોનામાં સલામતી માટેની માગનો ચમકારો જોવા મળે તેવી શક્યતા વિશ્ર્લેષકો વ્યક્ત કરી રહ્યા છે.

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.