Homeદેશ વિદેશરૂપિયો ૪૮ પૈસા મજબૂત થતાં સોનામાં રૂ. ૪૦નો ધીમો સુધારો, ચાંદી રૂ....

રૂપિયો ૪૮ પૈસા મજબૂત થતાં સોનામાં રૂ. ૪૦નો ધીમો સુધારો, ચાંદી રૂ. ૧૧૫ વધી

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વ વ્યાજદરમાં ધીમી ગતિએ વધારો કરે તેવી શક્યતાને ધ્યાનમાં લેતાં ડૉલર ઈન્ડેક્સમાં નરમાઈનું વલણ રહેતાં આજે લંડન ખાતે સત્રના આરંભે સોનામાં સુધારાતરફી વલણ જળવાઈ રહ્યું હતું. જોકે, આજે આ અહેવાલ લખાઈ રહ્યો છે ત્યારે સ્થાનિક ફોરેક્સ માર્કેટમાં ડૉલર સામે રૂપિયામાં ૪૮ પૈસાનો સુધારો આવ્યો હોવાથી સોનાની આયાત પડતરોમાં ઘટાડો થવાને કારણે મધ્યસત્ર દરમિયાન ભાવમાં ૧૦ ગ્રામદીઠ સાધારણ રૂ. ૩૭થી ૪૦નો ધીમો સુધારો આવ્યો હતો, જ્યારે ચાંદીના ભાવમાં કિલોદીઠ રૂ. ૧૧૫નો સુધારો આવ્યો હતો.
બજારનાં સાધનોના જણાવ્યાનુસાર આજે મધ્યસત્ર દરમિયાન ખાસ કરીને .૯૯૯ ટચ ચાંદીમાં વૈશ્ર્વિક નિરુત્સાહી અહેવાલ છતાં સ્ટોકિસ્ટોની છૂટીછવાઈ લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૧૧૫ વધીને રૂ. ૫૭,૯૬૬ના મથાળે ક્વૉટ થઈ રહ્યા હતા. વધુમાં આજે સોનામાં ધનતેરસ અને દિવાળી પશ્ર્ચાત્ રિટેલ સ્તરની માગ સાધારણ ખપપૂરતી રહી હતી, પરંતુ આગામી લગ્નસરાની માગને ધ્યાનમાં લેતા જ્વેલરી ઉત્પાદકોની તથા રોકાણકારોની છૂટીછવાઈ માગને ટેકે મધ્યસત્ર દરમિયાન ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૩૭ વધીને રૂ. ૫૦,૫૮૮ અને ૯૯.૯ ટચ સ્ટાન્ડર્ડ સોનાના રૂ. ૪૦ વધીને રૂ. ૫૦,૭૯૧ના મથાળે રહ્યા હતા.
પ્રાપ્ત અહેવાલ અનુસાર અમેરિકી ફેડરલ રિઝર્વ વ્યાજદરમાં વધારાની ગતિ ધીમી પાડે તેવી શક્યતા ઉપરાંત ગઈકાલે કેનેડાની કેન્દ્રવર્તી બૅન્કે અપેક્ષા કરતાં ઓછો વ્યાજ વધારો કર્યાના નિર્દેશો સાથે આજે ડૉલર ઈન્ડેક્સ ઘટીને એક મહિનાની નીચી સપાટી આસપાસ પહોંચ્યાના નિર્દેશ સાથે લંડન ખાતે સત્રના આરંભે હાજરમાં સોનામાં રોકાણકારોની છૂટીછવાઈ લેવાલીને ટેકે ભાવ ગઈકાલના બંધથી ૦.૨ ટકા વધીને ઔંસદીઠ ૧૬૬૭.૪૯ ડૉલર અને વાયદામાં ભાવ ગઈકાલના બંધથી સાંકડી વધઘટે અથડાઈને ઔંસદીઠ ૧૬૭૦ ડૉલર આસપાસ ટકેલા રહ્યા હતા. અત્રે ઉલ્લેખનીય બાબત એ છે કે ગઈકાલે ન્યૂ યોર્ક ખાતે હાજરમાં સોનાના ભાવ એક તબક્કે વધીને બે સપ્તાહની ઊંચી ઔંસદીઠ ૧૬૭૪.૭૬ ડૉલરની સપાટી સુધી પહોંચ્યા હતા. જોકે, આજે સત્રના આરંભે હાજરમાં ચાંદીના ભાવ ૦.૩ ટકા ઘટીને ઔંસદીઠ ૧૬.૫૬ ડૉલર આસપાસ ક્વૉટ થઈ રહ્યા હતા.
જોકે, આજે રોકાણકારોની નજર મોડી સાંજે સમાપન થનારી યુરોપિયન સેન્ટ્રલ બૅન્કની નીતિવિષયક બેઠક પર સ્થિર થઈ હોવાથી હાજર સોનામાં મર્યાદિત સુધારો જોવા મળ્યો હતો. વધુમાં ગઈકાલે અમેરિકામાં એક પરિવાર માટેના ઘરના વેચાણમાં ગત સપ્ટેમ્બર મહિનામાં ઘટાડો થયો હોવાથી ફેડરલ રિઝર્વ વ્યાજદરમાં ઘટાડાની ગતિ ધીમી પાડે તેવી શક્યતા પ્રબળ બની છે. તેમ છતાં બજાર વર્તુળો ફેડરલ રિઝર્વ તેની આગામી નવેમ્બર મહિનાની બેઠકમાં ૭૫ બેઝિસ પૉઈન્ટનો વધારો કરશે અને ત્યાર બાદ ડિસેમ્બર મહિનાની બેઠકમાં વ્યાજદરમાં મામૂલી વધારો કરે તેવી ધારણા મુકાઈ રહી છે.

RELATED ARTICLES

Most Popular