(વાણિજ્ય પ્રતિનિધિ તરફથી)
મુંબઈ: અમેરિકી ફેડરલ રિઝર્વની નીતિવિષયક બેઠક પૂર્વે રોકાણકારો મોટું જોખમ લેવા માટે તૈયાર ન હોવાથી આજે લંડન ખાતે સત્રના આરંભે રોકાણકારોએ સાવચેતીનો અભિગમ અપનાવતા સોનાના ભાવ સાંકડી વધઘટે અથડાઈ ગયા હતા. આમ વિશ્ર્વ બજારમાં સાંકડી વધઘટ અને સ્થાનિક ફોરેક્સ માર્કેટમાં આ અહેવાલ લખાઈ રહ્યો છે ત્યારે ડૉલર સામે રૂપિયામાં ઘટ્યા મથાળેથી આઠ પૈસાનો સુધારો દર્શાવાઈ રહ્યો હોવાથી સોનાની આયાત પડતર ઘટવાથી મધ્ય સત્ર દરમિયાન સોનાના ભાવમાં ૧દ ગ્રામદીઠ રૂ. ૧૭૩થી ૧૭૪નો ઘટાડો આવ્યો હતો, જ્યારે ચાંદીના ભાવમાં કિલોદીઠ રૂ. ૪૧૦નો ઘટાડો આવ્યો હતો.
બજારનાં સાધનોના જણાવ્યાનુસાર હાલ સોનામાં ભાવઘટાડાનો માહોલ છતાં લગ્નસરાની મોસમ પૂરી થઈ ગઈ હોવાથી રિટેલ સ્તરની લેવાલી છૂટીછવાઈ ખપપૂરતી રહી હતી, જ્યારે જ્વેલરી ઉત્પાદકો અને રોકાણકારોની માગ ખપપૂરતી રહેતાં આજે મધ્ય સત્ર દરમિયાન ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૭૩ ઘટીને રૂ. ૫૦,૨૯૧ અને ૯૯.૯ ટચ સ્ટાન્ડર્ડ સોનાના રૂ. ૧૭૪ ઘટીને રૂ. ૫૦,૪૯૩ની સપાટીએ રહ્યા હતા. વધુમાં આજે વૈશ્ર્વિક બજારમાં ચાંદીના ભાવમાં સુધારાતરફી વલણ રહ્યું હોવા છતાં સ્થાનિકમાં .૯૯૯ ટચ ચાંદીમાં સ્ટોકિસ્ટોની વેચવાલીનું દબાણ ઉપરાંત ઔદ્યોગિક વપરાશકારો અને જ્વેલરી ઉત્પાદકોની માગ ખપપૂરતી રહેતાં ભાવ કિલોદીઠ રૂ. ૪૧૦ના ઘટાડા સાથે રૂ. ૫૫,૨૦૪ના મથાળે રહ્યા હતા.
આગામી ૨૬-૨૭ જુલાઈના રોજ યોજાનારી અમેરિકી ફેડરલ રિઝર્વની નીતિવિષયક બેઠકમાં નીતિઘડવૈયાઓ આક્રમક અભિગમ ધરાવે છે કે કેમ તેની અવઢવ વચ્ચે આજે રોકાણકારોએ સોનામાં નવી લેવાલીમાં સાવચેતીનો અભિગમ અપનાવતા લંડન ખાતે સત્રના આરંભે હાજરમાં ભાવ સાંકડી વધઘટે અથડાઈને ઔંસદીઠ ૧૭૦૮.૩૫ ડૉલર આસપાસ અને વાયદામાં ભાવ ગઈકાલના બંધથી ૦.૩ ટકા ઘટીને ૧૭૦૪.૮૦ ડૉલર આસપાસ ક્વૉટ થઈ રહ્યા હતા. જોકે, ચાંદીમાં રોકાણકારોની ઘટ્યા મથાળેથી છૂટીછવાઈ લેવાલી નીકળતાં ભાવ ગઈકાલના બંધથી ૦.૩ ટકા વધીને ઔંસદીઠ ૧૮.૭૫ ડૉલર આસપાસ ક્વૉટ થઈ રહ્યા હતા.
એકંદરે ગઈકાલે ડૉલર ઈન્ડેક્સ નબળો પડ્યો હોવા છતાં ન્યૂ યોર્ક ખાતે સોનાના ભાવ ઔંસદીઠ ૧૮૨૦ ડૉલરની સપાટી જાળવી રાખવામાં સફળ ન રહ્યા હતા, જે ટેક્નિકલ દૃષ્ટિએ ભવિષ્ય માટે નકારાત્મક વલણ દર્શાવે છે, એમ ઓએનડીએના વિશ્ર્લેષક જેફ્રી હેલીએ જણાવતાં ઉમેર્યું હતું કે અમારા મતે આગામી ટૂંકા સમયગાળા માટે સોનામાં ઔંસદીઠ ૧૭૦૦ ડૉલરની સપાટી મહત્ત્વની ટેકાની સપાટી પુરવાર થશે અને જો આ સપાટી તૂટે તો ભાવ ઘટીને ઔંસદીઠ ૧૬૭૫ ડૉલર સુધી પહોંચે તેવી શક્યતા છે.
પ્રાપ્ત આંકડાકીય માહિતી અનુસાર ગઈકાલે વિશ્ર્વના સોનાના સૌથી મોટા એક્સચેન્જ ટ્રેડેડ ફંડ એસપીડીઆર ગોલ્ડ ટ્રસ્ટનું સોનાનું હોલ્ડિંગ ૦.૫ ટકા ઘટીને જાન્યુઆરી અંત પછીની સૌથી નીચી ૧૦૦૯.૦૬ ટનની સપાટીએ રહ્યું હતું.
