Homeદેશ વિદેશવિશ્ર્વ બજાર પાછળ સોનામાં રૂ. ૪૨૬ અને ચાંદીમાં રૂ. ૯૫૪ તૂટ્યા

વિશ્ર્વ બજાર પાછળ સોનામાં રૂ. ૪૨૬ અને ચાંદીમાં રૂ. ૯૫૪ તૂટ્યા

વ્યાજદરમાં ધીમા વધારાની આશા પર જૅરૉમ પૉવૅલે પાણી ફેરવ્યુ

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વની ગઈકાલે સમાપન થયેલી બે દિવસીય નીતિવિષયક બેઠકના અંતે ફેડરલના અધ્યક્ષ જૅરૉમ પૉવૅલે વ્યાજદરમાં અપેક્ષાનુસાર ૭૫ બેઝિસ પૉઈન્ટનો વધારો કર્યો હતો, પરંતુ ભવિષ્યમાં વ્યાજદરમાં વધારો અટકાવવો કે ધીમો પાડવો તે અંગે નિર્દેશ આપવાનું વહેલાસરનું ગણાશે એમ જણાવતા ગઈકાલે ડૉલર ઈન્ડેક્સમાં મજબૂત વલણ રહેતાં ન્યૂ યોર્ક ખાતે સોનાના ભાવમાં ૦.૮ ટકા જેટલો ઘટાડો આવ્યો હતો. જોકે, આજે લંડન ખાતે સત્રના આરંભે સોનાના હાજર ભાવમાં સાંકડી વધઘટે ટકેલું વલણ રહ્યું હતું અને વાયદામાં વધુ ૦.૬ ટકાનો ઘટાડો આવ્યો હતો. આમ વૈશ્ર્વિક ઓવરનાઈટ નિરુત્સાહી અહેવાલ સાથે સ્થાનિક ઝવેરી બજારમાં મધ્યસત્ર દરમિયાન સોનાના ભાવમાં ૧૦ ગ્રામદીઠ રૂ. ૪૨૦થી ૪૨૬ ઘટી આવ્યા હતા. જોકે, સ્થાનિક ફોરેક્સ માર્કેટમાં આજે આ અહેવાલ લખાઈ રહ્યો છે ત્યારે ડૉલર સામે રૂપિયો સાત પૈસા ઘટીને ક્વૉટ થઈ રહ્યો હોવાથી સોનાની આયાત પડતરમાં વધારો થવાથી વિશ્ર્વ બજારની સરખામણીમાં ભાવવધારો મર્યાદિત રહ્યો હતો. તેમ જ ચાંદીમાં પણ સ્ટોકિસ્ટોની વેચવાલીનું દબાણ રહેતા ભાવમાં પણકિલોદીઠ રૂ. ૯૫૪નો ઘટાડો આવ્યો હતો.
બજારનાં સાધનોના જણાવ્યાનુસાર આજે મધ્યસત્ર દરમિયાન ખાસ કરીને .૯૯૯ ટચ ચાંદીમાં સ્ટોકિસ્ટોની આક્રમક સટ્ટાકીય વેચવાલીનું દબાણ અને વપરાશકાર ઉદ્યોગ તથા જ્વેલરી ઉત્પાદકોની માગ પણ ખપપૂરતી મર્યાદિત રહેતાં ભાવ કિલોદીઠ રૂ. ૯૫૪ના ઘટાડા સાથે રૂ. ૫૭,૬૭૩ના મથાળે રહ્યા હતા. તે જ પ્રમાણે સોનામાં પણ મધ્યસત્ર દરમિયાન સ્ટોકિસ્ટોની વેચવાલી સામે નવી લેવાલીનો અભાવ અને જ્વેલરી ઉત્પાદકો તથા રિટેલ સ્તરની લેવાલી છૂટીછવાઈ ખપપૂરતી રહેતાં હાજરમાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૪૨૦ના ઘટાડા સાથે રૂ. ૫૦,૨૦૦ અને ૯૯.૯ ટચ સ્ટાન્ડર્ડ સોનાના રૂ. ૪૨૬ના ઘટાડા સાથે રૂ. ૫૦,૪૦૧ના મથાળે રહ્યા હતા.
દરમિયાન ગઈકાલે ફેડરલની બેઠક પશ્ર્ચાત્ અધ્યક્ષ જૅરૉમ પૉવૅલે વ્યાજદરમાં ૭૫ બેઝિસ પૉઈન્ટનો વધારો કરતાં જણાવ્યું હતું કે ફુગાવો ઘટીને લક્ષ્યાંકિત સંતોષજનક સપાટી સુધી ન આવે ત્યાં સુધી વ્યાજદરમાં વધારો કરવામાં આવશે એમ જણાવતાં રોકાણકારોની વ્યાજદરમાં વધારાની ગતિ ધીમી પાડવાની અથવા તો વધારો સ્થગિત કરવાની આશા પર પાણી ફરી વળતાં ડૉલર ઈન્ડેક્સમાં મજબૂત વલણ રહ્યું હતું અને ન્યૂ યોર્ક મર્કન્ટાઈલ એક્સચેન્જના કૉમેક્સ વિભાગ પર સોનાના ભાવમાં ૦.૮ ટકા જેટલો ઘટાડો આવ્યો હતો. જોકે, આજે લંડન ખાતે સત્રના આરંભે હાજરમાં સોનાના ભાવ ગઈકાલની જ ઔંસદીઠ ૧૬૩૭.૨૦ ડૉલર આસપાસની સપાટીએ અને વાયદામાં ભાવ વધુ ૦.૬ ટકા ઘટીને ૧૬૪૦.૨૦ ડૉલર આસપાસ ક્વૉટ થઈ રહ્યા હતા. જોકે, હાજરમાં ચાંદીના ભાવ ઘટ્યા મથાળેથી ૦.૩ ટકાના સુધારા સાથે ઔંસદીઠ ૧૯.૩૪ ડૉલર આસપાસ ક્વૉટ થઈ રહ્યા હતા.
એકંદરે ફેડરલની અવઢવભરી ટિપ્પણીને કારણે સોનામાં છેલ્લા બે દિવસમાં આવેલો ૧.૩ ટકા જેટલો સુધારો ધોવાઈ ગયો હોવાનું એક વિશ્ર્લેષકે જણાવતાં ઉમેર્યું હતું કે હવે રોકાણકારોની નજર અમે આવતીકાલે જાહેર થનારા અમેરિકાના જોબ રિપોર્ટ પર સ્થિર થઈ છે. જો જોબ ડેટા પ્રભાવક આવશે તો ડૉલર ઈન્ડેક્સની મજબૂતી સાથે સોનાના ભાવ ઘટીને ઔંસદીઠ ૧૬૧૫ ડૉલર સુધી ઘટે તેવી શક્યતા નકારી ન શકાય.

RELATED ARTICLES

Most Popular