Homeદેશ વિદેશડૉલર સામેે રૂપિયો સુધરતાં સોનામાં રૂ. ૧૮નો ઘસરકો, ચાંદી રૂ. ૮૫૦ ચમકી

ડૉલર સામેે રૂપિયો સુધરતાં સોનામાં રૂ. ૧૮નો ઘસરકો, ચાંદી રૂ. ૮૫૦ ચમકી

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વની આવતીકાલે સમાપન થતી બે દિવસીય નીતિવિષયક બેઠક પૂર્વે આજે આંતરરાષ્ટ્રીય વિનિમય બજારમાં ડૉલર ઈન્ડેક્સમાં વધ્યા મથાળેથી પીછેહઠ જોવા મળતાં લંડન ખાતે સોના-ચાંદીમાં રોકાણકારોની છૂટીછવાઈ લેવાલી નીકળતાં ભાવમાં સુધારો આવ્યો હતો. જોકે, સ્થાનિક ફોરેક્સ માર્કેટમાં આ અહેવાલ લખાઈ રહ્યો છે ત્યારે ડૉલર સામે રૂપિયામાં ૧૫ પૈસાનો સુધારો દર્શાવાઈ રહ્યો હોવાથી સ્થાનિકમાં સોનાની આયાત પડતરમાં ઘટાડો થવાને કારણે મધ્યસત્ર દરમિયાન સોનાના ભાવમાં ૧૦ ગ્રામદીઠ રૂ. ૧૮નો ઘસરકો આવ્યો હતો. જોકે, વૈશ્ર્વિક પ્રોત્સાહક અહેવાલે ચાંદીમાં સ્ટોકિસ્ટોની લેવાલી ઉપરાંત વપરાશકાર ઉદ્યોગની માગને ટેકે ભાવમાં કિલોદીઠ રૂ. ૮૫૦નો ઉછાળો આવ્યો હતો.
દરમિયાન આજે વર્લ્ડ ગોલ્ડ કાઉન્સિલે જાહેર કરેલા એક અહેવાલ અનુસાર ગત સપ્ટેમ્બરના અંતે પૂરા થયેલા ત્રીજા ત્રિમાસિકગાળા દરમિયાન સોનાની વૈશ્ર્વિક માગ વર્ષ ૨૦૨૧ના સમાનગાળાની તુલનામાં ૨૮ ટકા ઘટી છે. જોકે, આ સમયગાળામાં કેન્દ્રવર્તી બૅન્કોની સોનામાં લેવાલી રહી હોવા છતાં રોકાણલક્ષી માગમાં નોંધપાત્ર ઘટાડો થયો છે. વધુમાં સમીક્ષા હેઠળના સમયગાળામાં ખાસ કરીને ભારતમાં ફુગાવો વધતાં ગ્રામીણ માગમાં ઘટાડો થવાને કારણે ભારતની વપરાશી માગમાં પણ ઘટાડો થયો હોવાનું અહેવાલમાં ઉમેર્યું હતું.
આજે વૈશ્ર્વિક ચાંદીના ભાવમાં સત્રના આરંભે ૧.૯ ટકા જેટલો ઉછાળો આવ્યાના નિર્દેશ સાથે સ્થાનિક ઝવેરી બજારમાં મધ્યસત્ર દરમિયાન .૯૯૯ ટચ ચાંદીમાં સ્ટોકિસ્ટોની ઘટ્યા મથાળેથી નીકળેલી સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૮૫૦ની તેજી સાથે ફરી રૂ. ૫૮,૦૦૦ની સપાટી પાર કરીને રૂ. ૫૮,૨૦૦ના મથાળે રહ્યા હતા. જોકે, સોનામાં વૈશ્ર્વિક પ્રોત્સાહક અહેવાલ છતાં સ્થાનિકમાં ડૉલર સામે રૂપિયામાં જોવા મળેલા સુધારાતરફી વલણ ઉપરાંત જ્વેલરી ઉત્પાદકો અને રિટેલ સ્તરની લેવાલી ખપપૂરતી રહેતાં ભાવ ૧૦ ગ્રામદીઠ રૂ. ૧૮ના ઘટાડા સાથે ૯૯.૫ ટચ સ્ટાન્ડર્ડ સોનાના રૂ. ૫૦,૨૬૦ અને ૯૯.૯ ટચ સ્ટાન્ડર્ડ સોનાના રૂ. ૫૦,૪૬૨ના મથાળે રહ્યા હતા.
આજે લંડન ખાતે સત્રના આરંભે ડૉલર ઈન્ડેક્સમાં વધ્યા મથાળેથી પીછેહઠ જોવા મળતાં હાજરમાં સોનાના ઔંસદીઠ ભાવ ગઈકાલના બંધથી ૦.૫ ટકા વધીને ૧૬૪૧.૪૩ ડૉલર અને વાયદામાં ભાવ ગઈકાલના બંધથી ૦.૧ ટકા વધીને ૧૬૪૨.૨૦ ડૉલર આસપાસ ક્વૉટ થઈ રહ્યા હતા. તેમ જ ચાંદીમાં પણ સટ્ટાકીય આકર્ષણ રહેતાં હાજરમાં ભાવ ગઈકાલના બંધથી ૧.૯ ટકાની તેજી સાથે ઔંસદીઠ ૧૯.૫૦ ડૉલર આસપાસ ક્વૉટ થઈ રહ્યાના અહેવાલ હતા.

 

RELATED ARTICLES

Most Popular