Homeટોપ ન્યૂઝવૈશ્વિક સોનું નવ મહિનાની ઊંચી સપાટીએ પહોંચતા સ્થાનિકમાં રૂ. ૩૫૨નો ઉછાળો, ચાંદી...

વૈશ્વિક સોનું નવ મહિનાની ઊંચી સપાટીએ પહોંચતા સ્થાનિકમાં રૂ. ૩૫૨નો ઉછાળો, ચાંદી રૂ. ૧૧૨૧ ઉછળી

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વ વ્યાજદરમાં ધીમી ગતિએ વધારો કરે તેવી શક્યતા સપાટી પર આવવાની સાથે ડૉલર ઈન્ડેક્સમાં નરમાઈનું વલણ રહેતાં ગત શુક્રવારે ન્યૂ યોર્ક ખાતે એક તબક્કે ભાવ વધીને નવ મહિનાની ઊંચી ઔંસદીઠ ૧૯૨૯ ડૉલરની સપાટી સુધી પહોંચી ગયા બાદ ૧૯૧૮.૬૬ ડૉલરના મથાળે બંધ રહ્યા હતા. તેમ જ આજે પણ લંડન ખાતે સત્રના આરંભે ભાવ ગત શુક્રવારની સપાટી આસપાસ જ ટકેલા રહ્યા હતા, જ્યારે ચાંદીના ભાવમાં વધુ ૦.૫ ટકાનો સુધારો આગળ ધપ્યો હતો. વધુમાં સ્થાનિક ઝવેરી બજારમાં આજે સત્રના આરંભે વૈશ્વિક પ્રોત્સાહક અહેવાલ અને ફોરેક્સ માર્કેટમાં આ ઇહેવાલ લખાઈ રહ્યો છે ત્યારે ડૉલર સામે રૂપિયો ૨૬ પૈસા નબળો ક્વૉટ થઈ રહ્યો હોવાથી સોનાની આયાત પડતરમાં વધારો થવાથી મધ્યસત્ર દરમિયાન ભાવ ૧૦ ગ્રામદીઠ રૂ. ૩૫૧થી ૩૫૨ વધી આવ્યા હતા, જ્યારે ચાંદીના ભાવ કિલોદીઠ રૂ. ૧૧૨૧ ઉછળીને ફરી રૂ. ૬૯,૦૦૦ની સપાટી પાર કરી ગયા હતા. 

સ્થાનિક ઝવેરી બજારમાં ખાસ કરીને .૯૯૯ ટચ ચાંદીમાં મધ્યસત્ર દરમિયાન વૈશ્વિક પ્રોત્સાહક અહેવાલ તેમ જ ઔદ્યોગિક વપરાશકારોની માગને ટેકે ભાવ કિલોદીઠ રૂ. ૧૧૨૧ના ઉછાળા સાથે રૂ. ૬૯,૨૩૬ના મથાળે રહ્યા હતા. જોકે, આજે ઊંચા મથાળેથી જ્વેલરી ઉત્પાદકોની અને રિટેલ સ્તરની લેવાલી પાંખી રહી હતી. તે જ પ્રમાણે સોનામાં પણ મધ્યસત્ર દરમિયાન વિશ્વ  બજાર પાછળ ભાવ વધી આવ્યા હતા, પરંતુ સ્ટોકિસ્ટો, રોકાણકારો, જ્વેલરી ઉત્પાદકો તથા રિટેલ સ્તરની લેવાલી પાંખી રહેતાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૩૫૧ વધીને રૂ. ૫૬,૫૮૭ના મથાળે અને ૯૯.૯ ટચ સ્ટાન્ડર્ડ સોનાના રૂ. ૩૫૨ વધીને રૂ. ૫૬,૮૧૪ના મથાળે રહ્યા હતા. 

અમેરિકી ફેડરલ રિઝર્વ વ્યાજદરમાં વધારાની ગતિ ક્રમશ ધીમી પાડીને બંધ કરે તેવી શક્યતાને ધ્યાનમાં લેતાં આજે લંડન ખાતે સત્રના આરંભમાં હાજરમાં સોનાના ભાવ ઔંસદીઠ ૧૯૧૮.૬૬ ડૉલરની સપાટીએ મક્કમ રહ્યા હતા, જ્યારે વાયદામાં ભાવ આગલા બંધથી ૦.૧ ટકા વધીને ઔંસદીઠ ૧૯૨૩.૨૦ ડૉલર આસપાસ ક્વૉટ થઈ રહ્યા હતા. જોકે, વૈશ્વિક સ્તરે ગ્રીન એનર્જીનાં વધી રહેલા વ્યાપ અને તેમાં ચાંદીની માગ પ્રબળ રહે તેવી ધારણા વચ્ચે સોનાની સાથે સાથે ચાંદીમાં પણ તેજીનું વલણ જળવાઈ રહેતાં ભાવ આગલા બંધથી ૦.૫ ટકા વધીને ઔંસદીઠ ૨૪.૩૭ ડૉલર આસપાસ ક્વૉટ થઈ રહ્યા હતા. 

એકંદરે આજે વિશ્વ બજારમાં ડૉલર ઈન્ડેક્સમાં નરમાઈનું વલણ રહેતાં સોનામાં મક્કમ વલણ જળવાઈ રહ્યું હોવાનુંવિશ્લેષકો એ જણાવતાં ઉમેર્યું હતું કે હાલના તબક્કે વૈશ્વિક સોનામાં ઔંસદીઠ ૧૯૦૦થી ૧૯૨૦ ડૉલરની સપાટી મહત્ત્વની ટેકાની સપાટી અને ઔંસદીઠ ૧૯૭૦ ડૉલરની સપાટી મહત્ત્વની પ્રતિકારક સપાટી પુરવાર થાય તેવી શક્યતા જણાય છે. જોકે, હવે રોકાણકારોની નજર આગામી બુધવારે જાહેર થનારા રિટેલ વેચાણનાં આંકડાઓ અને પહેલી જાન્યુઆરી અને બીજી જાન્યુઆરીએ યોજાનારી અમેરિકી ફેડરલ રિઝર્વની બે દિવસીય નીતિવિષયક બેઠક પર સ્થિર થઈ છે. જોકે, આજે માર્ટિન લ્યુથર કિંગ ડે નિમિત્તે અમેરિકાના બજારો બંધ રહેવાના અહેવાલ હતા. 

LEAVE A REPLY

Please enter your comment!
Please enter your name here
Captcha verification failed!
CAPTCHA user score failed. Please contact us!
RELATED ARTICLES

Most Popular