(વાણિજ્ય પ્રતિનિધિ તરફથી)
મુંબઈ: અમેરિકી ફેડરલ રિઝર્વની આજથી શરૂ થઈ રહેલી બે દિવસીય નીતિવિષયક બેઠક પૂર્વે આજે વિશ્ર્વ બજારમાં ડૉલર ઈન્ડેક્સમાં સાધારણ નરમાઈતરફી વલણ રહ્યું હોવા છતાં લંડન ખાતે સત્રના આરંભે સોનામાં મક્કમથી સુધારાતરફી વલણ રહ્યું હોવાના નિર્દેશ તેમ જ સ્થાનિક ફોરેક્સ માર્કેટમાં આ અહેવાલ લખાઈ રહ્યો છે ત્યારે સ્થાનિક ઝવેરી બજારમાં મધ્યસત્ર દરમિયાન હાજરમાં સોનાના ભાવમાં ૧૦ ગ્રામદીઠ રૂ. ૫૫થી ૫૬નો સુધારો આવ્યો હતો, જ્યારે ચાંદીમાં તેજી થાક ખાઈ રહી હોય તેમ ભાવમાં કિલોદીઠ રૂ. ૧૮નો સાધારણ સુધારો આવ્યો હોવાના અહેવાલ હતા.
બજારનાં સાધનોના જણાવ્યાનુસાર આજે સ્થાનિક ઝવેરી બજારમાં મધ્યસત્ર દરમિયાન સોનામાં સ્ટોકિસ્ટો, રોકાણકારો અને જ્વેલરી ઉત્પાદકોની પાંખી લેવાલી ઉપરાંત રિટેલ સ્તરની માગ પણ ખપપૂરતી રહી હતી. જોકે, વૈશ્ર્વિક પ્રોત્સાહક અહેવાલ અને સ્થાનિક ફોરેક્સ માર્કેટમાં ડૉલર સામે રૂપિયો નબળો પડવાથી આયાત પડતરમાં વધારો થવાને કારણે ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૫૫ વધીને રૂ. ૫૩,૭૪૮ અને ૯૯.૯ ટચ સ્ટાન્ડર્ડ સોનાના રૂ. ૫૬ વધીને રૂ. ૫૩,૯૬૪ના મથાળે રહ્યા હતા. વધુમાં આજે ચાંદીમાં પણ મધ્યસત્ર દરમિયાન સ્ટોકિસ્ટો ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગ ખપપૂરતી મર્યાદિત રહેતાં ભાવ કિલોદીઠ સાધારણ રૂ. ૧૮ વધીને રૂ. ૬૭,૦૪૦ના મથાળે રહ્યા હતા.
દરમિયાન આજથી અમેરિકી ફેડરલ રિઝર્વની શરૂ થઈ રહેલી બે દિવસીય નીતિવિષયક બેઠક તેમ આજે મોડી અમેરિકાના ફુગાવાના ડેટાની જાહેરાત પૂર્વે ડૉલર ઈન્ડેક્સની નરમાઈ સાથે લંડન ખાતે સત્રના આરંભે હાજરમાં સોનાના ભાવ ગઈકાલના બંધથી ૦.૩ ટકા વધીને ઔંસદીઠ ૧૭૮૬.૨૮ ડૉલર અને વાયદામાં ભાવ ૦.૩ ટકા વધીને ૧૭૯૬.૯૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૦.૮ ટકા વધીને ઔંસદીઠ ૨૩.૪૯ ડૉલર આસપાસ ક્વૉટ થઈ રહ્યા હતા.
આજે મોડી સાંજે જાહેર થનારા અમેરિકાના નવેમ્બર મહિનાના ફુગાવામાં ઘટાડો જોવા મળશે અનેઅમેરિકી ફેડરલ રિઝર્વ વ્યાજદરમાં વધારાની ગતિ ધીમી પાડીને બેઠકના અંતે ૫૦ બેસિસ પૉઈન્ટનો વધારો કરે તેવી શક્યતા એએનઝેડના વિશ્ર્લેષકે એક નોટ્સમાં જણાવતાં ઉમેર્યું હતું કે સામાન્યપણે વ્યાજદરમાં ઘટાડાના સંજોગોમાં સોના જેવી વ્યાજની ઊપજ ન આપતી અસ્ક્યામતોમાં રોકાણકારોની માગ રહેતી હોય છે.
