સ્ટોકિસ્ટોની વેચવાલીના દબાણે સોનામાં રૂ. ૬૩નો અને ચાંદીમાં રૂ. ૮૪૭નો ઘટાડો

બિઝનેસ

(વાણિજ્ય પ્રતિનિધિ તરફથી)

મુંબઈ: વૈશ્ર્વિક બુલિયન માર્કેટમાં આજે ડૉલર ઈન્ડેક્સમાં નરમાઈ અને અમેરિકા-ચીન વચ્ચેના રાજકીય-ભૌગોલિક તણાવને કારણે રોકાણકારોની સોનામાં સલામતી માટેની માગ રહેતાં ભાવમાં સુધારાતરફી વલણ રહ્યું હોવાના અહેવાલ છતાં સ્થાનિક ઝવેરી બજારમાં આજે મધ્ય સત્ર દરમિયાન બન્ને કીંમતી ધાતુઓમાં સ્ટોકિસ્ટોની વેચવાલીનું દબાણ અને સાર્વત્રિક સ્તરેથી માગ નિરસ રહેતાં ભાવમાં ઘટાડાતરફી વલણ રહ્યું હતું, જેમાં સોનાના ભાવમાં ૧૦ ગ્રામદીઠ રૂ. ૬૩નો ઘટાડો આવ્યો હતો. જોકે, આજે ફોરેક્સ માર્કેટમાં ડૉલર સામે રૂપિયો ૪૨ પૈસા નબળો ક્વૉટ થઈ રહ્યો હોવાથી સોનાની આયાત પડતરોમાં વધારો થવાને કારણે ભાવઘટાડો મર્યાદિત રહ્યો હતો, જ્યારે ચાંદીના ભાવમાં કિલોદીઠ રૂ. ૮૪૭નો ઘટાડો આવ્યો હતો.
બજારનાં સાધનોના જણાવ્યાનુસાર આજે મધ્ય સત્ર દરમિયાન ખાસ કરીને .૯૯૯ ટચ ચાંદીમાં સ્ટોકિસ્ટોની આક્રમક વેચવાલીનું દબાણ ઉપરાંત ઔદ્યોગિક વપરાશકારો અને જ્વેલરી ઉત્પાદકોની માગ નિરસ રહેતાં ભાવ કિલોદીઠ રૂ. ૮૪૭ના ઘટાડા સાથે રૂ. ૫૭,૦૫૭ના મથાળે રહ્યા હતા. વધુમાં આજે સોનામાં પણ મધ્ય સત્ર દરમિયાન સ્ટોકિસ્ટો અને રોકાણકારોની નફારૂપી વેચવાલી સામે નવી લેવાલીનો અભાવ તેમ જ જ્વેલરી ઉત્પાદકો અને રિટેલ સ્તરની લેવાલી ખપપૂરતી રહેતાં ભાવ ૧૦ ગ્રામદીઠ રૂ. ૬૩ ઘટીને ૯૯.૫ ટચ સ્ટાન્ડર્ડ સોનાના રૂ. ૫૧,૨૮૦ અને ૯૯.૯ ટચ સ્ટાન્ડર્ડ સોનાના રૂ. ૫૧,૪૮૬ના મથાળે રહ્યા હતા. જોકે, આજે રૂપિયો નબળો પડ્યો હોવાથી સોનામાં ભાવઘટાડો સીમિત રહ્યો હતો.
દરમિયાન ગઈકાલે વૈશ્ર્વિક વિનિમય બજારમાં ડૉલર ઈન્ડેક્સમાં ૦.૮ ટકાનો ઉછાળો આવ્યા બાદ આજે સાધારણ નરમાઈતરફી વલણ રહ્યું હતું. તેમ છતાં અમેરિકા-ચીન વચ્ચેના તણાવ ઉપરાંત વૈશ્ર્વિક આર્થિક વૃદ્ધિની ચિંતાને ધ્યાનમાં લેતા આજે લંડન ખાતે સત્રના આરંભે રોકાણકારોની સોનામાં સલામતી માટેની માગને ટેકે ભાવમાં સુધારાતરફી વલણ રહ્યું હતું અને હાજરમાં ભાવ ગઈકાલના બંધથી ૦.૪ ટકા વધીને ઔંસદીઠ ૧૭૬૬.૫૯ ડૉલર અને વાયદામાં ભાવ ગઈકાલના બંધથી ૦.૫ ટકા ઘટીને ૧૭૮૦.૮૦ ડૉલર આસપાસ કવૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૦.૨ ટકા ઘટીને ઔંસદીઠ ૧૯.૯૧ ડૉલર આસપાસ ક્વૉટ થઈ રહ્યા હતા.
વૈશ્ર્વિક સોનું ગઈકાલે ઔંસદીઠ ૧૭૮૫થી ૧૭૯૦ ડૉલરની પ્રતિકારક સપાટીએથી પાછું ફર્યું હતું. તેમ જ અમેરિકી ફેડરલ રિઝર્વના નીતિઘડવૈયાઓએ વ્યાજદરમાં આક્રમક ધોરણે વધારો કરવાનો અણસાર આપતા અમેરિકી ટ્રેઝરીની યિલ્ડમાં પણ વધારો થવાથી સોનામાં પીછેહઠ જોવા મળી હોવાનું ડેઈલી એફએક્સનાં સ્ટ્રેટેજિસ્ટ લ્યા સ્પિવિકે જણાવ્યું હતું. નોંધનીય બાબત એ છે કે ગઈકાલે વિશ્ર્વના સોનાના સૌથી મોટા એક્સચેન્જ ટ્રેડેડ ફંડ એસપીડીઆર ગોલ્ડ ટ્રસ્ટનું સોનાનું હોલ્ડિંગ ગત સોમવારની સરખામણીમાં ૦.૩ ટકા ઘટીને ૧૦૦૨.૯૭ ટનની સપાટીએ રહ્યું હતું.

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.