(વાણિજ્ય પ્રતિનિધિ તરફથી)
મુંબઈ: અમેરિકાના જોબ ડેટાની આજે મોડી સાંજે થનારી જાહેરાત પૂર્વે લંડન ખાતે સત્રના આરંભે સોનામાં નફારૂપી વેચવાલીનું દબાણ રહેતાં ભાવમાં ઘટાડા તરફી વલણ રહ્યું હતું. જોકે, ગઈકાલે ન્યૂ યોર્ક મર્કન્ટાઈલ એકસચેન્જ ખાતે હાજરમાં સોનાના ભાવ એક તબક્કે ગત ૧૦ ઑગસ્ટ પછીની સૌથી ઊચી ઔંસદીઠ ૧૮૦૪.૪૬ ડૉલરની સપાટી સુધી પહોંચ્યા હતા. આમ વૈશ્ર્વિક ઓવરનાઈટ પ્રોત્સાહક અહેવાલે સ્થાનિક ઝવેરી બજારમાં મધ્યસત્ર દરમિયાન સોનાના ભાવ ૧૦ ગ્રામદીઠ રૂ. ૪૨૮થી ૪૩૦ની તેજી સાથે રૂ. ૫૩,૦૦૦ની સપાટી પાર કરી ગયા હતા, જ્યારે ચાંદીના ભાવ કિલોદીઠ રૂ. ૧૦૦૩ની તેજી સાથે રૂ. ૬૪,૦૦૦ની સપાટી કુદાવી ગયા હતા.
બજારનાં સાધનોના જણાવ્યાનુસાર આજે સ્થાનિક ઝવેરી બજારમાં મધ્યસત્ર દરમિયાન ખાસ કરીને સોનામાં જ્વેલરી ઉત્પાદકો, સ્ટોકિસ્ટો અને રોકાણકારોની લેવાલી છૂટીછવાઈ ખપપૂરતી રહી હતી. તેમ જ વિશ્ર્વ બજાર પાછળ ભાવમાં મોટો ઉછાળો આવ્યો હોવાથી પ્રવર્તમાન લગ્નસરાની રિટેલ સ્તરની માગ પણ મર્યાદિત જ રહી હતી. તેમ છતાં વિશ્ર્વ બજાર પાછળ મધ્યસત્ર દરમિયાન ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૪૨૮ વધીને રૂ. ૫૩,૩૯૬ અને ૯૯.૯ ટચ સ્ટાન્ડર્ડ સોનાના રૂ. ૪૩૦ વધીને રૂ. ૫૩,૬૧૧ના મથાળે રહ્યા હતા. વધુમાં આજે .૯૯૯ ટચ ચાંદીમાં પણ મધ્યસત્ર દરમિયાન ઓવરનાઈટ વૈશ્ર્વિક પ્રોત્સાહક અહેવાલે સ્ટોકિસ્ટોની સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૧૦૦૩ની તેજી સાથે રૂ. ૬૪,૦૦૦ની સપાટી પાર કરીને રૂ. ૬૪,૬૮૬ના મથાળે રહ્યા હતા.
અમેરિકી ફેડરલ રિઝર્વ વ્યાજદર વધારવામાં હળવો અભિગમ અપનાવે તેવી શક્યતાને ધ્યાનમાં લેતાં ગઈકાલે ન્યૂ યોર્ક મર્કન્ટાઈલ એક્સચેન્જના કૉમેક્સ વિભાગ પર હાજરમાં સોનાના ભાવ વધીને ગત ૧૦ ઑગસ્ટ પછીની સૌથી ઊંચી ઔંસદીઠ ૧૮૦૪.૪૬ ડૉલરની સપાટી સુધી પહોંચ્યા બાદ આજે અમેરિકાના જોબ ડેટાની જાહેરાત પૂર્વે રોકાણકારોની સોનામાં નફારૂપી વેચવાલી રહેતાં ભાવ ગઈકાલના બંધથી ૦.૨ ટકા ઘટીને ઔંસદીઠ ૧૭૯૯.૮૦ ડૉલર આસપાસ ક્વૉટ થઈ રહ્યા હતા. તેમ જ વાયદામાં ભાવ ગઈકાલના બંધથી ૦.૧ ટકા ઘટીને ૧૮૧૩.૩૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ સાંકડી વધઘટે અથડાઈને ઔંસદીઠ ૨૨.૭૭ ડૉલર આસપાસના મથાળે ટકેલા રહ્યા હતા.
ગત બુધવારે ફેડરલ રિઝર્વના અધ્યક્ષ જૅરૉમ પૉવૅલે વ્યાજદરમાં હળવો વધારો કરવાનો સંકેત આપતાં ડૉલર ઈન્ડેક્સમાં મોટો ઘટાડો થવાથી સોનાના ભાવમાં પણ મોટો ઊછાળો આવ્યો હતો. ગઈકાલે સોનાના ભાવમાં મોટી તેજી અને આજે અમેરિકાના જોબ ડેટાની જાહેરાત થવાની હોવાથી રોકાણકારોની નફારૂપી વેચવાલીનું દબાણ રહ્યું હોવાનું વિશ્ર્લેષકોએ જણાવતાં ઉમેર્યું હતું કે અમારા મતે હાલને તબક્કે વૈશ્ર્વિક સોનામાં ઔંસદીઠ ૧૮૦૫ ડૉલરની સપાટી મહત્ત્વની પ્રતિકારક સપાટી પુરવાર થાય તેવી શક્યતા છે.