(વાણિજ્ય પ્રતિનિધિ તરફથી)
મુંબઈ: વૈશ્ર્વિક વિનિમય બજારમાં ડૉલર ઈન્ડેક્સમાં નરમાઈનું વલણ રહેતાં આજે લંડન ખાતે સોનાના ભાવમાં સુધારાતરફી વલણ રહ્યું હતું. જોકે, એકંદરે રોકાણકારોની નજર આવતીકાલના અમેરિકી ફેડરલના અધ્યક્ષ જૅરૉમ પૉવૅલનાં બ્રૂકિંગ્સ ઈન્સ્ટિટયુશન ખાતેનાં વક્તવ્ય પર સ્થિર થઈ હોવાથી તેઓની લેવાલી મર્યાદિત રહી હતી. જોકે, વિશ્ર્વ બજારમાં ડૉલર નબળો પડતાં સ્થાનિક ફોરેક્સ માર્કેટમાં આ અહેવાલ લખાઈ રહ્યો છે ત્યારે ડૉલર સામે રૂપિયામાં એક તબક્કે ૧૧ પૈસાનો સુધારો જોવા મળ્યા બાદ બે પૈસાનો સુધારો દર્શાવાઈ રહ્યો હતો. આમ રૂપિયામાં સુધારાતરફી વલણ રહેતાં સોનાની આયાત પડતરમાં ઘટાડો થવાથી મધ્યસત્ર દરમિયાન ભાવમાં ૧૦ ગ્રામદીઠ રૂ. ૧૩૬થી ૧૩૭નો ઘટાડો આવ્યો હતો, જ્યારે ચાંદીમાં સ્ટોકિસ્ટોની ઊંચા મથાળેથી નફારૂપી વેચવાલીનું દબાણ રહેતાં ભાવ કિલોદીઠ રૂ. ૫૨૦ ઘટી આવ્યા હતા.
બજારનાં સાધનોના જણાવ્યાનુસાર આજે ખાસ કરીને .૯૯૯ ટચ ચાંદીમાં મધ્યસત્ર દરમિયાન સ્ટોકિસ્ટોની સટ્ટાકીય વેચવાલીના દબાણ ઉપરાંત જ્વેલરી ઉત્પાદકો અને ઔદ્યોગિક વપરાશકારોની લેવાલી ખપપૂરતી રહેતાં ભાવ કિલોદીઠ રૂ. ૫૨૦ના ઘટાડા સાથે રૂ. ૬૧,૫૯૦ના મથાળે રહ્યા હતા. તે જ પ્રમાણે સોનામાં પણ રૂપિયો મજબૂત થવાથી આયાત પડતર ઘટવાને કારણે વિશ્ર્વ બજારથી વિપરીત ભાવમાં નરમાઈનું વલણ રહ્યું હતું. તેમ છતાં જ્વેલરી ઉત્પાદકો, સ્ટોકિસ્ટો અને રોકાણકારો નવી લેવાલીથી દૂર રહ્યા હતા, પરંતુ રિટેલ સ્તરની લેવાલી ખપપૂરતી જળવાઈ રહી હતી અને મધ્ય સત્ર દરમિયાન ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૩૬ ઘટીને રૂ. ૫૨,૫૦૪ અને ૯૯.૯ ટચ સ્ટાન્ડર્ડ સોનાના ભાવ રૂ. ૧૩૭ ઘટીને રૂ. ૫૨,૭૧૫ના મથાળે રહ્યા હતા.
અમેરિકી ફેડરલ રિઝર્વના બે અધિકારીઓ જેમ્સ બુલાર્ડ અને જ્હોન વિલિયમ્સે ફૂગાવા સામેની લડત લાંબી ચાલશે, એવું જણાવતાં ગઈકાલે ન્યૂ યોર્ક મર્કન્ટાઈલ એક્સચેન્જ ખાતે સોનાના ભાવમાં એક ટકા જેટલો ઘટાડો આવી ગયો હતો. જોકે, આજે ડૉલર ઈન્ડેક્સ ૦.૪ ટકા જેટલો નબળો પડતાં લંડન ખાતે સત્રના આરંભે હાજર સોનામાં ભાવ ઘટ્યા મથાળેથી ૦.૭ ટકા વધીને ઔંસદીઠ ૧૭૫૩.૩૪ ડૉલર અને વાયદામાં ભાવ ૦.૭ ટકા વધીને ૧૭૫૨.૬૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૧.૪ ટકા વધીને ઔંસદીઠ ૨૧.૨૦ ડૉલર આસપાસ ક્વૉટ થઈ રહ્યા હતા.
જો આવતીકાલના વક્તવ્યમાં ફેડરલના અધ્યક્ષ વ્યાજદરમાં વધારા અંગે આક્રમક અભિગમ અપનાવવાનો અણસાર આપશે તો ડૉલર ઈન્ડેક્સ મજબૂત થતાં સોનાના ભાવ ફરી દબાણ હેઠળ આવશે અને જો હળવા અભિગમનો અણસાર આપશે તો સોનામાં સુધારાતરફી વલણ જોવા મળશે, એવું વિશ્ર્લેષકોનું માનવું છે. વધુમાં સોનાના વૈશ્ર્વિક અગ્રણી વપરાશકાર દેશ ચીનમાં સરકારે કોવિડ-૧૯ના પ્રસાર નિયંત્રણમાં રાખવા અપનાવેલી ઝીરો ટોલરન્સ પૉલિસીનાં વિરોધમાં બીજિંગ અને શાંઘાઈમાં થઈ રહેલા દેખાવોને ડામવા ભારે સલામતી ગોઠવવામાં આવી હોવાના અહેવાલ હતા.