(વાણિજ્ય પ્રતિનિધિ તરફથી)
મુંબઈ: અમેરિકાનાં ત્રીજા ત્રિમાસિકગાળાના જીડીપીના ડેટા અને સાપ્તાહિક ધોરણે બેરોજગારીના ડેટાની થનારી જાહેરાત પૂર્વે આજે લંડન ખાતે સત્રના આરંભે સોનાના હાજર તેમ જ વાયદામાં ભાવ સાંકડી વધઘટે અથડાઈને ટકેલા રહ્યા હતા, જ્યારે ચાંદીમાં ધીમો ઘટાડો આવ્યો હતો. આમ વૈશ્ર્વિક બજારનાં મક્કમ વલણ અને સ્થાનિક ઝવેરી બજારમાં ઊંચા મથાળેથી સાર્વત્રિક સ્તરેથી માગ રૂંધાઈ ગઈ હતી. તેમ જ આજે ફોરેક્સ માર્કેટમાં ડૉલર સામે રૂપિયામાં નવ પૈસાનો સુધારો આવતાં ખાસ કરીને સોનાની આયાત પડતર ઘટતાં સોનાના ભાવમાં ૧૦ ગ્રામદીઠ રૂ. એકનો સાધારણ ઘસરકો આવ્યો હતો, જ્યારે ચાંદીમાં વૈશ્ર્વિક નિરુત્સાહી અહેવાલે સ્ટોકિસ્ટોની વેચવાલીનું દબાણ રહેતાં ભાવમાં કિલોદીઠ રૂ. ૫૭૨નો ઘટાડો આવ્યો હતો.
બજારનાં સાધનોના જણાવ્યાનુસાર આજે ખાસ કરીને .૯૯૯ ટચ ચાંદીમાં વૈશ્ર્વિક નિરુત્સાહી અહેવાલે સ્ટોકિસ્ટોની નવી લેવાલીનો અભાવ અને ઔદ્યોગિક વપરાશકારો તથા જ્વેલરી ઉત્પાદકોની લેવાલી છૂટીછવાઈ રહેતાં હાજરમાં ભાવ કિલોદીઠ રૂ. ૫૭૨ના ઘટાડા સાથે રૂ. ૬૭,૬૦૫ના મથાળે રહ્યા હતા. વધુમાં આજે સોનામાં પણ ઊંચા મથાળેથી સ્ટોકિસ્ટો, રોકાણકારો, જ્વેલરી ઉત્પાદકો અને રિટેલ સ્તરની લેવાલી પાંખી રહી હતી. વધુમાં ડૉલર સામે રૂપિયામાં ઘટ્યા મથાળેથી સુધારો આવતા આયાત પડતરમાં ઘટાડો થવાને કારણે હાજરમાં સોનાના ભાવ ૧૦ ગ્રામદીઠ સાધારણ રૂ. એકના ઘટાડા સાથે ૯૯.૫ ટચ સ્ટાન્ડર્ડ સોનાના રૂ. ૫૪,૪૮૦ અને ૯૯.૯ ટચ સ્ટાન્ડર્ડ સોનાના રૂ. ૫૪,૬૯૯ના મથાળે રહ્યા હતા.
વૈશ્ર્વિક સ્તરે રોકાણકારોની નજર આજે મોડી સાંજે જાહેર થનારા અમેરિકાના સાપ્તાહિક ધોરણે જાહેર થતાં બેરોજગારી ભથ્થું મેળવનારાઓના ડેટા તેમ જ ત્રીજા ત્રિમાસિકગાળાના જીડીપીના ડેટાની જાહેરાત પર સ્થિર થઈ હોવાથી લંડન ખાતે સત્રના આરંભે હાજરમાં સોનાના ભાવ સાંકડી વધઘટે અથડાઈને ગઈકાલની ઔંસદીઠ ૧૮૧૫.૩૬ ડૉલર આસપાસની સપાટીએ અને વાયદામાં ભાવ ૧૮૨૪.૧૦ ડૉલરની સપાટીએ ટકેલા રહ્યા હતા, જ્યારે હાજરમાં ચાંદીના ઔંસદીઠ ભાવ ગઈકાલના બંધથી ૦.૮ ટકા ઘટીને ૨૩.૭૯ ડૉલર આસપાસ ક્વૉટ થઈ રહ્યા હતા. જોકે, હવે ક્રિસમસની ઉજવણીનો માહોલ હોવાને કારણે પણ બજારમાં કામકાજો પાંખાં રહ્યાં હોવાનું સૂત્રોએ જણાવ્યું હતું.
તાજેતરમાં ડૉલર ઈન્ડેક્સમાં નરમાઈ તેમ જ ચીન ખાતે કોરોનાવાઈરસથી અસરગ્રસ્તોની વધી રહેલી સંખ્યાને જોતાં તેની વૈશ્ર્વિક આર્થિક વૃદ્ધિ પર માઠી અસર પડે તેવી શક્યતાને કારણે સોનામાં હેજરૂપી માગ જળવાઈ રહેતાં આગામી ટૂંકા સમયગાળા દરમિયાન સોનાના વૈશ્ર્વિક ભાવ વધીને ઔંસદીઠ ૧૮૩૩ ડૉલર સુધી પહોંચે તેવી શક્યતા વિશ્ર્લેષકો વ્યક્ત કરી રહ્યા છે. ઉ