વૈશ્ર્વિક સોનું બે મહિનાના તળિયે પહોંચતા સ્થાનિકમાં ₹ ૨૯૧નો ઘટાડો, ચાંદી ₹ ૮૮૫ તૂટી

(વાણિજ્ય પ્રતિનિધિ તરફથી)
મુંબઈ: અમેરિકાના આર્થિક ડેટાઓ મજબૂત આવતાં ફેડરલ રિઝર્વ વ્યાજદરમાં આક્રમક ધોરણે વધારો કરે તેવી શક્યતા પ્રબળ બનતાં ગત શુક્રવારે ન્યૂ યોર્ક ખાતે સોનાના ભાવ ઘટીને બે મહિનાની નીચી સપાટીએ પહોંચ્યા હતા, જ્યારે આજે લંડન ખાતે સત્રના આરંભે સોનામાં રોકાણકારોનો નવી લેવાલીમાં નિરુત્સાહ રહેતાં ભાવમાં ટકેલું વલણ રહ્યું હતું, જ્યારે ચાંદીના ભાવમાં વધુ ૦.૪ ટકા જેટલો ઘટાડો આવ્યો હતો. આમ વૈશ્ર્વિક નિરુત્સાહી અહેવાલે સ્થાનિક ઝવેરી બજારમાં પણ સોનાના ભાવમાં ૧૦ ગ્રામદીઠ રૂ. ૨૯૦થી ૨૯૧નો ઘટાડો આગળ ધપ્યો હતો. જોકે, સ્થાનિક ફોરેક્સ માર્કેટમાં ડૉલર સામે રૂપિયામાં ૧૦ પૈસાનો ઘટાડો આવ્યો હોવાથી સ્થાનિકમાં સોનાની આયાત પડતરમાં વધારો થવાને કારણે વિશ્ર્વ બજારની સરખામણીમાં ભાવઘટાડો મર્યાદિત રહ્યો હતો. વધુમાં આજે વૈશ્ર્વિક ચાંદીમાં ૦.૪ ટકા જેટલો ઘટાડો આવતાં સ્થાનિકમાં ચાંદીના ભાવ કિલોદીઠ રૂ. ૮૮૫ ઘટી આવ્યા હતા.
આજે સ્થાનિક સોના-ચાંદી બજારમાં વૈશ્ર્વિક નિરુત્સાહી અહેવાલે ખાસ કરીને સોનામાં સ્ટોકિસ્ટો, રોકાણકારો અને જ્વેલરી ઉત્પાદકોનો નવી લેવાલીમાં નિરુત્સાહ તેમ જ રિટેલ સ્તરની ખપપૂરતી માગ જળવાઈ રહેતાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૨૯૦ ઘટીને રૂ. ૫૫,૪૪૩ અને ૯૯.૯ ટચ સ્ટાન્ડર્ડ સોનાના રૂ. ૨૯૧ ઘટીને રૂ. ૫૫,૬૬૬ના મથાળે રહ્યા હતા. વધુમાં આજે .૯૯૯ ટચ ચાંદીમાં સ્ટોકિસ્ટોની સટ્ટાકીય વેચવાલીનું દબાણ તેમ જ ઔદ્યોગિક વપરાશકારો તથા જ્વેલરી ઉત્પાદકોની માગ ખપપૂરતી રહેતાં ભાવ કિલોદીઠ રૂ. ૮૮૫ તૂટીને રૂ. ૬૩,૪૪૬ના મથાળે રહ્યા હતા.
તાજેતરમાં જાહેર થયેલા અમેરિકાના આર્થિક ડેટાઓ પ્રોત્સાહક રહેતાં અમેરિકી ફેડરલ રિઝર્વ વધતા ફૂગાવાને ડામવા માટે આક્રમક નાણાનીતિ અપનાવીને વ્યાજદરમાં મોટો વધારો કરે તેવી ભીતિ સપાટી પર રહેતાં ન્યૂ યોર્ક મર્કન્ટાઈલ એક્સચેન્જના કૉમેક્સ વિભાગ પર સોનાના ભાવ બે મહિનાની નીચી સપાટીએ રહ્યા બાદ આજે લંડન ખાતે સત્રના આરંભે હાજર અને વાયદામાં સોનાના ઔંસદીઠ ભાવ અનુક્રમે ૧૮૧૧.૬૦ ડૉલર અને ૧૮૧૭.૯૦ ડૉલરની સપાટીએ ટકેલા રહ્યા હતા, જ્યારે હાજરમાં ચાંદીના ભાવ આગલા બંધથી ૦.૪ ટકા ઘટીને ઔંસદીઠ ૨૦.૬૯ ડૉલર આસપાસ ક્વૉટ થઈ રહ્યા હતા.
અમેરિકા ખાતે ક્ધઝ્યુમર સ્પેન્ડિંગ ઈન્ડેક્સ (ગ્રાહકલક્ષી ખર્ચના આંક)માં વધારો અને બેરોજગારી ભથ્થું મેળવનારાઓની સંખ્યામાં થયેલા અનપેક્ષિત ઘટાડાને ધ્યાનમાં લેતાં ફુગાવામાં થનારી અપેક્ષિત વૃદ્ધિને ધ્યાનમાં લેતાં ફેડરલ રિઝર્વ વ્યાજદર વધારવામાં આક્રમક વલણ અપનાવે તેવી શક્યતા વ્યક્ત કરતાં જિઓજીત ફાઈનાન્સિયલ સર્વિસીસના કૉમૉડિટી રિસર્ચ હેડ હરીશ વીએ વ્યક્ત કરતાં જણાવ્યું હતું કે ઊંચા વ્યાજદરને કારણે સોના જેવી વ્યાજની ઊપજ ન આપતી અસ્ક્યામતોમાં રોકાણકારો નવી ખરીદીથી દૂર રહેતાં હોય છે. અત્રે ઉલ્લેખનીય બાબત એ છે કે અમેરિકી ટ્રેઝરી સચિવ જૅનૅટ યૅલૅને જણાવ્યું હતું કે જાન્યુઆરી મહિનામાં ફુગાવામાં થયેલી વૃદ્ધિ દર્શાવે છે કે ફુગાવો ડામવા માટેની લડત વધુ ચાલશે. વિશ્ર્લેષકોના મતાનુસાર હાલને તબક્કે સોનાના વૈશ્ર્વિક વાયદામાં ઔંસદીઠ ૧૮૧૬ ડૉલરની સપાટી મહત્ત્વની ટેકાની સપાટી છે અને જો આ સપાટી તૂટે તો ભાવ ઔંસદીઠ ૧૭૯૩ ડૉલર સુધી ઘટી શકે છે.