2022-23નું ફાઈનાન્શિયલ યર ટૂંક સમયમાં જ પૂરું થવા જઈ રહ્યું છે અને પહેલી એપ્રિલથી જ 2023-24નું નવું નાણાંકીય વર્ષનો આરંભ થશે. આ નવા નાણાંકીય વર્ષમાં ઘણા બધા નિયમો બદલાવવા જઈ રહ્યા છે અને એમાં પણ આવકવેરા સંબંધિત અનેક નિયમોમાં મહત્ત્વના ફેરફાર થવા જઈ રહ્યા છે. આ ફેરફારો જાણી લેવા ખૂબ જ જરૂરી છે નહીં તો આવનારા વર્ષમાં તમે મુશ્કેલીમાં મૂકાઈ શકો છો. આ ફેરફારો ફેબ્રુઆરીમાં રજૂ કરવામાં આવેલાં કેન્દ્રીય બજેટ 2023માં પ્રસ્તાવિત કરવામાં આવ્યા હતા. તો ચાલો જાણીએ કે આગામી થોડા દિવસોમાં સામાન્ય ટેક્સપેયર્સ માટે શું ચેન્જિસ આવશે…
નોકરિયાત વર્ગ માટે ટીડીએસમાં ઘટાડો
આગામી મહિનાથી પગારદાર લોકોને નવી ટેક્સ વ્યવસ્થા હેઠળ ફાયદો થવાનો છે. આવા લોકો માટે હવે TDS કપાતમાં ઘટાડો થઈ શકે છે. આવા ટેક્સપેયર્સ કે જેમની કરપાત્ર આવક રૂ. 7 લાખથી ઓછી છે અને તેઓ નવી કર વ્યવસ્થા પસંદ કરશે તો તેમની પાસેથી ટીડીએસ નહીં વસૂલવામાં આવે. આ માટે આવકવેરા કાયદાની કલમ 87A હેઠળ વધારાની છૂટ આપવામાં આવી છે.
લિસ્ટેડ ડિબેન્ચર્સ પર TDS
આવકવેરા કાયદાની કલમ 193 હેઠળ અમુક સિક્યોરિટીઝના સંદર્ભમાં ચૂકવવામાં આવેલા વ્યાજ પર TDS મુક્તિ આપવામાં આવે છે. જો સિક્યોરિટી ડીમટીરિયલાઈઝ્ડ ફોર્મમાં હોય અને માન્ય સ્ટોક એક્સચેન્જમાં સૂચિબદ્ધ હોય, તો આવા કિસ્સાઓમાં ચૂકવવામાં આવતા વ્યાજ પર TDS નહીં કાપવામાં આવે. આ ઉપરાંત અન્ય તમામ પ્રકારના પેમેન્ટ પર 10 ટકા TDS કાપવામાં આવશે.
ઑનલાઇન ગેમિંગ પર ટેક્સ
ઓનલાઈન ગેમ રમનારા લોકો માટે પણ આ નવા નાણાંકીય વર્ષમાં ફેરફાર કરવામાં આવ્યો છે. જો તમે પણ ઓનલાઈન ગેમ રમો છો અને પૈસા જીતશો તો તમારે તેના પર ભારે ટેક્સ ચૂકવવો પડશે. આવકવેરા કાયદાની નવી કલમ 115 BBJ હેઠળ, આવી જીત પર 30% ટેક્સ ઓનલાઈન ગેમમાં વિજેતા થનાારા પાસેથી વસૂલવામાં આવશે. આ ટેક્સ TDS તરીકે કાપવામાં આવશે.
અહીંયા મળતા લાભ પર ચાલશે કાતર
આવકવેરા કાયદાની કલમ 54 અને 54F હેઠળ મળતા લાભોમાં નવા નાણાકીય વર્ષથી ઘટાડવામાં આવશે. પહેલી એપ્રિલથી, આ કલમો હેઠળ માત્ર રૂ. 10 કરોડ સુધીના મૂડી લાભને જ છૂટ આપવામાં આવશે. આનાથી ઉપરના કેપિટલ ગેઈન પર ઈન્ડેક્સેશનના લાભ સાથે 20 ટકાના દરે ટેક્સ લાગશે.
કેપિટલ ગેઈન પર વધુ ટેક્સ
પહેલી એપ્રિલ, 2023થી, પ્રોપર્ટીના વેચાણથી થયેલાં નફા પર વધુ કેપિટલ ગેઇન ટેક્સ ચૂકવવો પડશે. હવે કલમ 24 હેઠળ દાવો કરાયેલા વ્યાજને ખરીદી કે સમારકામના ખર્ચમાં સામેલ કરવામાં આવશે નહીં. આ સાથે, માર્કેટ-લિંક્ડ ડિબેન્ચર્સના ટ્રાન્સફર, રિડેમ્પશન અથવા પાકતી મુદતથી થતા મૂડી લાભો હવે ટૂંકા ગાળાના મૂડી લાભ કરને આકર્ષિત કરશે.
સોનાની ખરીદી બાબતે પણ કરાયો આ ફેરફાર
જો તમે એપ્રિલ મહિનાથી સોનાને EGR અથવા ઇલેક્ટ્રોનિક સોનાની રસીદને ભૌતિક સોનામાં રૂપાંતરિત કરો છો, તો તમારે તેના પર કોઈ મૂડી લાભ કર ચૂકવવો પડશે નહીં. જો કે, આનો લાભ લેવા માટે, તમારે સેબીના રજિસ્ટર્ડ વોલ્ટ મેનેજર પાસેથી રૂપાંતરણ કરાવવું પડશે.
