આઝાદીના લડવૈયા સુભાષચંદ્ર બોઝની આજે જન્મજયંતિ

” તુમ મુજે ખૂન દો, મેં તુમે આઝાદી દૂંગા” નું સૂત્ર આપનારા દેશના મહાન વીર નેતાજી સુભાષ ચંદ્ર બોઝની આજે 126મી જન્મજયંતિ છે.
નેતાજી સુભાષ ચંદ્ર બોઝની 126મી જન્મજયંતિ આજે દેશભરમાં બહાદુરી દિવસ તરીકે ઉજવવામાં આવી રહી છે. આ પ્રસંગે રાષ્ટ્રીય સ્વયંસેવક સંઘ (RSS) દ્વારા એક કાર્યક્રમનું આયોજન કરવામાં આવ્યું હતું. સંઘના વડા મોહન ભાગવતે કાર્યક્રમમાં સુભાષ ચંદ્ર બોઝને પ્રણામ કર્યા હતા. તેમણે કહ્યું હતું કે જેમના બલિદાન અને તપ પર આજે આપણો દેશ અને આપણું જીવન ઊભું છે, આપણે તેમને યાદ કરવા જોઈએ. નેતાજી જે સપનાંનું ભારત ઇચ્છતા હતા તે હજુ અધૂરું છે, આપણે તે કાર્ય પૂર્ણ કરવાનું છે. આપણે બધાએ સાથે મળીને ભારતને વિશ્વમાં સ્થાન અપાવવાનું છે. આ માટે દેશ માટે જાન ન્યોછાવર કરનારા બહાદુર વીરોને યાદ કરવા પડશે. નાનપણમાં, કુટુંબના સંસ્કારો અને શિક્ષકો પાસેથી મળેલા શિક્ષણને કારણે નેતાજીને સમાજ પ્રત્યે સહાનુભૂતિ હતી. તેનો સર્વશ્રેષ્ઠ વિકાસ કરતી વખતે, નેતાજીએ પોતાને દેશ માટે સમર્પિત કરી દીધા હતા.
નેતાજીનું મૃત્યુ દેશ માટે આજે પણ એક રહસ્ય છે. બ્રિટિશ સરકારના જણાવ્યા મુજબ તેમનું મૃત્યુ 1945માં એક પ્લેન ક્રેશમાં થયું હતું, જ્યારે કેટલાક રિપોર્ટ મુજબ નેતાજી સોવિયેત રશિયાની જેલમાં સર્બિયામાં મૃત્યુ પામ્યા હતા.
તેમના જન્મદિને તેમના કેટલાક અમૂલ્ય શબ્દોને યાદ કરીએઃ
જીવનમાં સંઘર્ષ ના હોય, સામનો કરવાનો ડર ના હોય તો જીવનનો અડધો સ્વાદ ખતમ થઇ જાય છે.
તમારી તાકાત પર વિશ્વાસ કરો. ઉધાર લીધેલી તાકાત ઘાતક પુરવાર થાય છે.
જીવનમાં ક્યારેય નમવું પડે તો વીરની જેમ નમવું
જેનામાં ‘સનક’ નથી તે ક્યારેય મહાન બની શકતો નથી.
અન્યાય સહન કરવો અને ખોટા સાથે સમાધાન કરવું એ સૌથી મોટો ગુનો છે.