દક્ષિણ આફ્રિકાથી ભારતમાં સ્થાનાંતરિત નામિબિયન ચિત્તાઓમાંથી એકે મધ્યપ્રદેશના કુનો નેશનલ પાર્ક (કેએનપી)માં ચાર બચ્ચાને જન્મ આપ્યો છે. કિડનીની બિમારીને કારણે ચિત્તાઓમાંથી એક સાશાનું મૃત્યુ થયું તેના ત્રણ દિવસ પછી આ શુભ સમાચાર આવ્યા છે. બચ્ચાના જન્મ અંગેની માહિતી કેન્દ્રીય મંત્રી ભૂપેન્દ્ર યાદવે શેર કરી હતી, જેમણે ટ્વિટર પર બચ્ચાની તસવીરો પણ શેર કરી હતી.
સાત દાયકા પહેલા ભારતમાંથી ચિત્તાની વસતી લુપ્ત થઇ ગઇ છે. તાજેતરમાં ભારત સરકારે પ્રોજેક્ટ ચિત્તા શરૂ કર્યો છે, જેનો હેતુ વિશ્વના આ સૌથી ઝડપી પ્રાણીને ભારતની ભૂમિ પર વસાવવાનો છે. ગયા વર્ષે સપ્ટેમ્બરના મધ્યમાં નામિબિયાથી આઠ ચિત્તા લાવવામાં આવ્યા હતા અને શિયોપુર જિલ્લામાં કેએનપીમાં રાખવામાં આવ્યા હતા. અન્ય સાત ચિતાઓની તબિયત સારી છે. આ સાત પૈકી, ત્રણ નર અને એક માદાને ઉદ્યાનના ખુલ્લા જંગલ વિસ્તારમાં છોડવામાં આવ્યા હતા અને તેઓ “સંપૂર્ણ રીતે સ્વસ્થ, સક્રિય અને સામાન્ય રીતે શિકાર કરે છે”, એમ મુખ્ય મુખ્ય વન સંરક્ષક જેએસ ચૌહાણે એક નિવેદનમાં જણાવ્યું હતું.
Wonderful news. https://t.co/oPvVBNlhqC
— Narendra Modi (@narendramodi) March 29, 2023
ગયા મહિને દક્ષિણ આફ્રિકાથી KNPમાં લાવવામાં આવેલા બાર ચિત્તા હાલમાં ક્વોરેન્ટાઇન એન્ક્લોઝરમાં રાખવામાં આવ્યા છે અને તેઓ સ્વસ્થ અને સક્રિય છે, એમ એક અધિકારીએ જણાવ્યું હતું. આઠ નામીબિયન ચિત્તા – પાંચ માદા અને ત્રણ નર -ને 17 સપ્ટેમ્બરે વડા પ્રધાન નરેન્દ્ર મોદીની હાજરીમાં એક કાર્યક્રમમાં KNP ખાતે તેમના ઘેરામાં છોડવામાં આવ્યા હતા. ભારતમાં છેલ્લો ચિત્તો 1947 માં હાલના છત્તીસગઢના કોરિયા જિલ્લામાં મૃત્યુ પામ્યો હતો અને 1952 માં દેશમાંથી સૌથી ઝડપી જમીન પ્રાણી ચિત્તાને લુપ્ત જાહેર કરવામાં આવ્યો હતો.
